Ri Nehemiy 4 - Quiché Bible

Ri qui yok'onic ri c'ulel

¹ Aretak xretamaj ri Sanbalat chi cätajin cakaban u banic ri nimalaj tapia, xyactaj royowal, nojinak c'u che ch'ujilal, xuchaplej qui yok'ic ri aj judeyib.

² Jewa' xubij chquiwäch ri e rachil xukuje' chquiwäch ri ajch'ojab aj Samar: “We aj judeyib ri' ri cämic caquiban rumal wi'jal, ¿la caquichomaj chi c'o qui banic? ¿La are ta c'u lo pa qui c'u'x chi queyok ta chque chi quequichi'j ta chi jumul tabal tak tok'ob? ¿O chi quecuin ta che u q'uisic ri qui chac pa jun k'ij? ¿O chque ta ri jujun tak mulaj ch'akatak tak abaj ri xekawic quequesaj ta wi c'ac' tak abaj?”

³ Pa u xcut c'o wi ri Tobiy, ri aj amon, ri xubij chic: “Xak chi c'u che u tz'akat, chica'yej ri tapia ri cätajin caquiyaco; ¡Cacuin c'u ne xa jun yac che u wulixic we capaki' puwi'!”

U ch'awem ri Nehemiy ruc' Dios

⁴ Ri in c'ut xinban ch'awem ruc' Dios: “Ka Dios: tatabej la ri ka yok'ic cumal. Chbana' la chi che quikajbej tak ri e qui yok'onic, xukuje' chi chekaj ta pa u k'ab ri c'ulel chec'am ta c'u bic che pataninelab pa jun ulew chic.

⁵ Mecuy la ri quetzelal, mawi mechupisaj la ri qui mac ri e c'o chwäch la, e qui yok'om ri cätajin caquiban u yaquic ri nimalaj tapia.”

Catzucux qui cämisaxic cumal ri qui c'ulel

⁶ Xkatakej u banic u yaquic ri nimalaj tapia, ri opaninak chic u yaquic c'ä pa niq'uiaj. Ri winak quechacun ruc' ronojel ri canima'.

⁷ Aretak c'ut ri Sanbalat, ri Tobiy, ri aj arabib, ri e aj Amon xukuje' ri e aj Asdod xquetamaj chi benak u yaquic ri nimalaj tapia re Jerusalen cätajin cabin u yaquic xukuje' chi xchaplex qui c'ojoxic tak ri e tek'etoj wi', sibalaj xpe coyowal,

⁸ conojel c'ut junam xquichomaj u banic jun banel che u banic ch'o'j ruc' ri Jerusalen caquiban ta c'u c'ax che.

⁹ Xkaban c'u ch'awem ruc' ri ka Dios, xekacoj c'u chajinelab chi pa k'ij chi chak'ab che u to'ic kib rech man cujkaj ta pa qui k'ab.

¹⁰ Ri winak ri e aj Juda jewa' caquibij: “Ri e u chuk'ab ri ekanel quechukchub chuwäch ri jujun tak tunaj ch'akatak tak abaj rachil ulew, man cujcuin ta c'u che u yaquic ri nimalaj tapia.”

¹¹ Are c'u pa qui c'u'x ri e ka c'ulel chi ma ta cakanabej, mawi ma ta c'o jas cakilo c'ä caquinim ta na quib chakaxo'l che ka cämisaxic quequik'atij ta c'ut ri chac.

¹² E are' tak c'ut ri aj judeyib ri e jekel tak chquinakaj xepe che u bixic chke, jumul camul chi we winak ri' quepe na che u banic ch'o'j kuc' pa ronojel c'olbal,

¹³ xinya' takanic chque ri winak pa cachalaxic tak quib chi chquiya' quib chrij ri nimalaj tapia, pa tak ri c'olbal ri c'amaja' naj cak'an chicaj, xukuje' ri e c'o wi tek'etak, cuc'am tak ri qui ch'ich', ri tz'imaj ch'ich', xukuje' tak q'uiakbal ch'ab.

¹⁴ Aretak c'u xinwilo chi caquixe'j quib, xintac'aba' wib xinbij chque ri nimak tak qui banic, chque ri quek'atow tak tzij xukuje' chque ri e u tz'akatil ri tinimit: “Mixe'j iwib chquiwäch. Chnataj chwe chi ri Ajawaxel nimalaj xukuje' xibibal, chicojo' i chuk'ab che qui q'uexwäch ri e i winakil che qui q'uexwäch tak ri e i c'ojol ri e i mia'l, ri e iwixokil xukuje' tak ri e iwachoch.”

¹⁵ Aretak ri qui banom qui c'ulel chke, xquetamaj chi uj c'o che queyexic xukuje' chi ri Dios xebuyojij tak ri banel, ri e qui chomam tak qui banic chke konojel, xujtzelej chic chi ka jujunal che u takexic ri ka chac pa ri nimalaj tapia.

¹⁶ Xchapletaj kas pa ri jok'otaj ri', pa niq'uiaj chque ri wachijab quechacun pa ri chac, ri pa niq'uiaj chic e cuc'am tz'imaj tak ch'ich', quetecak tak ch'ich', ri q'uiakbal tak qui ch'ab xukuje' to'bal tak uwo c'uxaj. Ri e c'amal tak be caquiya' ronojel ri qui to'banic chque ri winak aj Juda

¹⁷ ri cätajin caquiban u yaquic ri nimalaj tapia. Ri e ajekomal tak qui takem qui c'amic tak bic ri eka'n, ruc' c'ut ri jun qui k'ab quechacunic, ruc' c'ut ri jun chic cuc'am bic ri ch'ojibal.

¹⁸ Conojel ri cätajin quechacun pa ri yacanic xequel ri qui ch'ich' re ch'o'j xe'quipam, c'o c'ut ri ok'isal trompet pa nu xcut,

¹⁹ nu yo'm c'u u bixic chque ri nimak qui banic xukuje' takanelab, xukuje' ri u tz'akatil ri tinimit: “Ri chac tak e nimak xukuje' queliq'uiq'uic, kajabum c'u tak kib puwi' ri tapia, u jachalam c'u rib tak ka wäch.

²⁰ Rumal c'u ri' chila' jawije' ri quita' wi ri rok'ibal ri trompet, chimulij iwib kuc', are' c'u ri ka Dios cucoj na u chuk'ab pa ka xcut.”

²¹ Je c'u ri', ri uj xuwi quel ulok ri k'ij cakachap chac c'ä cäkaj c'u na ri k'ij cakatanaba', pa niq'uiaj chque ri winak xak e cuc'am ri qui tz'imaj ch'ich' pa qui k'ab.

²² Pa ri k'ijol ri' xinbij chque ri winak chi conojel xukuje' tak ne ri e to'l tak quech, rajawaxic cacoc'owisaj ri chak'ab pa ri Jerusalen, rech cujquichajij na chak'ab, quechacun c'u na pa k'ij.

²³ Xak u wi' chi wa' mawi ri in, mawi ri e wachalaxic xukuje' ri quechacun tak wuc', mawi ri achijab ri quechajinic ri quincachilaj, man quekesaj ta ri katz'iak, chkajujunal c'ut kuc'am ri tz'imaj ch'ich' pa qui k'ab.