Ri Nehemiy 3 - Quiché Bible

Xjach u wäch ri chac

¹ Are' c'u ri Eliasib ri qui nimal ri e cojol tabal tok'ob xukuje' ri e rach tak e cojol tabal tok'ob, xquiban u yaquic ri Coquibal ri Chij. Xequicoj tak tem che, xquiban u yaquic ri tapia ruc' ri tac'atic ja ri re jun Sient c'ä ruc' ri tac'atic ja re Hananeel.

² Ri jun ch'akap chi tapia xban u yaquic cumal ri achijab aj Jerico, are c'u ri jun ch'akap chic are' xyacow ri Zacur, u c'ojol ri Imri.

³ Ri e rija'lil ri Sena xquiban u yaquic ri Coquibal ri Cär. Xequicoj tak tem che xequitac'aba' ri e u tz'apibal tak ri oquibal, xecachilaj ri e c'opibal tak rech ri e re ch'ich'.

⁴ Ri ch'akap tapia chic ri cätakenic xban u yaquic rumal ri Meremot, u c'ojol ri Uriy, ri' u mam c'ut ri Cos; ri ch'akap chic rumal ri Mesulam, u c'ojol ri Berequiy ri' u mam c'ut ri Mesezabeel; ri ch'akap chic ri cätakenic are xbanow u yaquic ri Sadoc, u c'ojol ri Baan.

⁵ Ri u ch'akap chic ri cätakenic e are' ri aj Teco xebanowic, pune' ri cachijab ri nimak tak qui banic man xcaj taj xequito' taj ri xec'amow u be ri chac.

⁶ Ri Joiad u c'ojol ri Pasey, xukuje' ri Mesulam u c'ojol ri Besodiy, xquiban u yaquic ri Oquibal re Jesan. Xequicoj tak tem che, xequitac'aba' ri u tz'apibal ri oquibal xequicoj tak c'opibal tak re ri e re ch'ich'.

⁷ Ri ch'akap chic ri xcanaj che ri tapia xban u yaquic rumal ri Melatiy aj Gabaon xukuje' ri Jadon aj Meronot, xukuje' ri winak aj Gabaon xukuje' ri e aj Mizpa, c'olbal wa' ri e c'o chuxe' ri u takanic ri takanel ri c'o pa ri elebal k'ij che ri Euprats.

⁸ Ri ch'akap chic ri cataken che ri tapia xuban u yaquic ri Uziel, u c'ojol ri Haraiy ri ch'ayal sak puak; are chi c'u ri cätakenic xban u yaquic rumal ri Hananiy, ri banal c'oc'al; we quieb ri' xquiban u yaquic ri nim tapia re Jerusalen c'ä xopan na ruc' ri tapia ri nim u wäch.

⁹ Ri jun ch'akap chic xban u yaquic rumal ri Repaiy, u c'ojol ri Hur, ri are' alcalte che ri pa niq'uiaj che ri Jerusalen.

¹⁰ Ri jun ch'akap chic xban u yaquic rumal ri Jedaiy, u c'ojol ri Harumap, rumal chi c'o apan chuwäch ri rachoch, are c'u ri jun ch'akap chic xban u yaquic rumal ri Hatus u c'ojol Hasabniy.

¹¹ Ri Malquiy u c'ojol ri Harim, xukuje' ri Hasub u c'ojol ri Pahat-moab, are' xebanow u yaquic ri ch'akap chic xukuje' ri tac'atic ja que tak ri Jorno.

¹² Ri ch'akap chic xban u yaquic rumal ri Salum u c'ojol ri Halohes, ri are' alcalte re ri jun pa niq'uiaj chic che ri Jerusalen, xukuje' tak ri u mia'l.

¹³ Ri Hanun xukuje' tak ri winak ri e aj Zano xquiban u yaquic ri Oquibal re ri Beya'; xquiban u yaquic xequicoj c'ut ri e u tz'apibal ri oquibal xukuje' tak ri c'opibal ri e re ch'ich', xquiban u yaquic job sient ruc' jumuch' (580) bara' tapia, c'ä chuchi' ri Oquibal ri Cäya' wi ri Mes.

¹⁴ Ri Malquiy u c'ojol ri Recab, xuban u yaquic ri Oquibal ri Cäya' wi ri Mes, xebucoj ri tz'apibal tak re ri oquibal xukuje' ri c'opibal tak rech ri e re ch'ich'.

¹⁵ Ri Salum u c'ojol ri Colos, takanel pa Mizpa, xuban ri Roquibal ri Ja': Xuban u yaquic xukuje' xucoj ri u wi', xebucoj ri e u tz'apibal ri oquibal xerachilaj tak ri e c'opibal rech ri e re ch'ich', xuban c'u u yaquic ri tapia re ri atinibal Siloe ri c'o chunakaj ri Ticbal u Cotz'i'j ri Ajawinel, c'ä ruc' ri tanatak ri cakaj ulok che ri u Tinimit ri David.

¹⁶ Ri Nehemiy, u c'ojol ri Azbuc, takanel re pa niq'uiaj che ri Bet-sur, xuban u yaquic ri ch'akap chic re ri nimalaj tapia c'ä chuwäch ri e u mukbal ri David, c'ä ruc' ri c'olbal ja' xukuje' c'ä ruc' ri cachoch ri ajch'ojab.

¹⁷ Ri ch'akap chic ri catakenic xquiban u yaquic ri aj levitib: ri Rehum u c'ojol ri Bani; ri cäteken chic ri Hasabiy, takanel re pa niq'uiaj che ri Keil, ri xuban pa u bi' ri u tinimit.

¹⁸ Ri ch'akap chic ri catakenic xban u yaquic cumal ri e rach ri takanel: ri Babay, u c'ojol ri Henadad, takanel che ri niq'uiaj chic che ri Keil;

¹⁹ are' chi c'u ri Ezer u c'ojol ri Jexu, takanel re Mizpa, xuban u yaquic ri jun ch'akap chic ri c'o chuwäch ri pakalic ri cabe pa ri c'olbal ri c'olom wi ri ch'ojibal ri c'o pa ri xquina.

²⁰ Ri xtaken chi c'u chrij are', ri Baruc u c'ojol ri Zabay xuban u yaquic ri jun ch'akap chic, ri xchaptaj bic ruc' ri u xquina c'ä ruc' ri oquibal pa ri rachoch ri Eliasib, ri qui nimal ri e cojol tabal tok'ob;

²¹ xukuje' ri Meremot u c'ojol ri Uriy, ri ri' u mam c'ut ri Cos, xuban u yaquic ri jun chi ch'akap, xchaptaj bic chuchi' ri rachoch ri Eliasib c'ä chuq'uisbal we ja ri'.

²² Ri ch'akap chic ri cätaken che ri nimalaj tapia xquiban u banic ri e cojol tabal tok'ob ri e jekel pa ri beya' ri c'o chuchi' ri Jordan.

²³ Ri xetaken chic chquij wa', ri Benjamin xukuje' ri Hasub xquiban u yaquic ri nimalaj tapia ri c'o chuwäch ri cachoch. Ri xtaken chic chquij are', are' ri Azariy u c'ojol ri Maasiy ri xukuje' ri' u mam c'ut ri Hananiy, xuban ri u yaquic ri tapia ri c'o chunakaj ri rachoch.

²⁴ Ri ch'akap chic xuban u yaquic ri Binuy u c'ojol ri Henadad, xchaptaj bic ruc' ri rachoch ri Azariy xetakal c'ä pa ri ch'ococh'ic pa ri xquina.

²⁵ Ri xtaken chrij are', are' ri Palal, u c'ojol ri Uzay, xuban u banic ri nimalaj tapia ri c'o chuwäch ri xquina xukuje' xuban u yaquic ri tac'atic ja ri coc'ow na ri u taq'ui'c chuwäch ri rachoch ri ajawinel, ri c'o chuwäch ri ja ri e c'o wi ri chajinelab. Ri ch'akap chic xuban u yaquic ri Pedaiy, u c'ojol ri Pars,

²⁶ xetakal c'ä chuwäch ri Roquibal ri Ja', chusuq'uil ri elebal k'ij, xukuje' che ri tac'atic ja ri naj quel na u wi'. (Ri e jekel pa Opel e are' tak ri quepatanij chupam ri rachoch Dios.)

²⁷ Ri aj Teco e are' xebanow u yaquic ri ch'akap chic, ri cächaptaj bic ruc' ri nimalaj tac'atic ja c'ä ruc' ri nimalaj tapia re Opel.

²⁸ Ri e cojol tabal tok'ob xquiban u yaquic ri nimalaj tapia ri c'o chuwäch ri cachoch, cachaptaj ruc' ri Coquibal ri Quiej.

²⁹ Ri xtaken chi chquij are', are' ri Sadoc u c'ojol ri Imer, xuban u yaquic ri nimalaj tapia ri c'o chuwäch ri rachoch; are chi c'u ri ch'akap ri catakenic xban u yaquic rumal ri Semaiy u c'ojol ri Secaniy, ri are chajinel re ri Oquibal pa ri Elebal K'ij.

³⁰ Chrij are', xban chi u yaquic jun ch'akap rumal ri Hananiy c'ojol ri Selemiy, xukuje' ri Hanun, ri are' uwak u c'ojol ri Salap; ri xtaken chi c'u chquij wa', are ri Mesulam, u c'ojol ri Berequiy, xuban u banic u yaquic ri c'o chuwäch ri rachoch.

³¹ Ri Malquiy, ri ch'ayal sak puak, xuban u yaquic ri ch'akap ri c'o che ri nimalaj tapia ri xopan c'ä chuwäch ri cachoch ri e pataninelab rech ri rachoch Dios, xukuje' chque ri cachoch ri aj c'ayib, chuwäch ri Oquibal ri Nic'onic copan c'ä pa ri c'olbal ri cäban wi chajinic pa ri xquina.

³² Ri e ch'ayal tak sak puak xukuje' ri e ajc'ayib xquiban u yaquic ri ch'akap chic, cachaptaj bic rumal ri c'olbal ri che ri u bic ruc' ri c'olbal ri e c'o wi ri e chajinelab re ri xquina c'ä ruc' ri Coquibal ri Chij.