Ri Nehemiy 2 - Quiché Bible

Ri Artajers cuya' che ri Nehemiy cabe' pa Jerusalen

¹ In c'ut ri in k'axal ri cuq'uian wi ri ajawinel Artajers. Pa jun k'ij re ri ic' Nisan, chupam ri u juwinak junab ri rajawinic, aretak cätajin quincoj ri u wa'l uva chuwäch, ri ajawinel xrilo chi sibalaj bis ri nu palaj

² xuc'ot c'u ne nu chi', xubij: “Quinwilo chi sibalaj bis at c'olic. ¿Jas ri xac'ulmaj? Quinwilo chi man at ta yawab, c'o ba' jun u q'ueyowal ri' a rikom.” Pa ri jok'otaj ri', xina' jun nimalaj xe'n ib,

³ xinbij c'u che ri ajawinel: “¡Amak'el chc'asal la, ajawinel! ¿Jas ta c'u che chi ma ta in c'o pa bis, we ri tinimit jawije' ri e mukutal tak wi ri e nu mam c'o pa yojyobic xukuje' tak ri e roquibal e porotajinak?”

⁴ “¿Jas ri catinto' wi?” xcha' ri ajawinel. Xintz'onoj c'ut ri u to'banic ri Dios ri c'o pa ri caj,

⁵ xintzelej c'u u bixic che ri ajawinel: “We utz cuta' ri ajawinel, xukuje' we c'u nu rikom ri tok'ob la, quintz'onoj che la chi chintaka' la bic pa Juda, pa ri tinimit jawije' ri e mukutal tak wi ri e nu mam, rech quenbana' u yaquic.”

⁶ Ri ajawinel, ri t'uyul ri ajawinel ixok pa u xcut, xutzelej u bixic chwe: “¿Joropa' lo k'ij catebeytajok? ¿Jampa' cattzelej ulok?” In xinya' u bixic ri k'ijol che, xunimaj c'ut ri nu tzokopixic bic.

⁷ Xinbij chi c'u che, chi we cakaj pa u jolom, chi chiyok bic jun wuj pa nu k'ab ri tz'ibatalic ri catak wi u bixic chque ri e takanelab ri e c'o pa ri elebal k'ij che ri nima' Euprats, rech caquiya' chwe chi quinoc'owic ma ta quinquik'atij c'ä quinopan ta na pa Juda;

⁸ jun ta chi c'u wuj cätz'ibax ta chi bic ri caya' che ri Asap, ri chajil u c'ache'laj ri ajawinel, chi chebuya' ta ri che' chwe che qui ch'ukic ri oquibal tak ri c'o wi ri rachoch Dios, xukuje' ri rech ri nim tapia rech ri tinimit xukuje' ri rech ri ja ri quinejekel wi na. Are c'u ri ajawinel ronojel xuya' chwe rumal rech chi c'o ri utzalaj u to'banic ri nu Dios wuc'.

⁹ Aretak xinetac'atob chquiwäch ri e takanelab ri e c'o pa ri elebal k'ij che ri Euprats, xebenjach tak ri u wuj ri ajawinel chque, ri xebutak ulok chque, ri xukuje' e u takom ulok ajch'ojab wuc' che nu chajixic ri e quiejeninak chquij tak quiej ri e c'o chquixe' ri qui takanic tak ri qui nimakil tak ajch'ojab.

¹⁰ Aretak c'u xquitawa' ri Sanbalat ri aj Horon rachil ri Tobiy, ri takanel aj amon, sibalaj xpe coyowal rumal rech chi c'o xopan che qui to'ic tak ri aj israelib ri queboc il.

Cäban u yaquic ri nim tapia

¹¹ Xinopan c'u na pa Jerusalen. Churox c'u k'ij ri wopanem chila',

¹² xinwalij chak'ab, in achilatal cumal jujun tak achijab, man c'o ta c'u jachin che wi ri u yo'm ri Dios pa ri wanima' ri quinban che ri Jerusalen. Man c'o ta chi jun quiejebal wuc'am xane' xak xuwi ri quinquiejebej.

¹³ Kas pa ri chak'ab ri', xinel bic chuchi' ri Oquibal re ri Beya' che u suq'uil ri u Ja' ri Dragon xukuje' chuchi' ri Oquibal ri Cäya' wi ri Mes, xinsolij c'ut ri u nim tapia ri Jerusalen, ri wulijinak xukuje' tak ri roquibal ri e c'atinak.

¹⁴ Xintakej c'u nu bic chusuq'uil ri Roquibal ri Ja' xukuje' ri c'o wi ri u Ja' ri Ajawinel; are c'u ri nu quiej man cacuin taj coc'ow chila'.

¹⁵ C'ä chak'ab c'u na, xinpaki'c, xintakej ri u chi' ri alaj nima', aretak c'u solitajinak chic ri nim tapia wumal, xintzelejic, xinoc c'u chupam ri Oquibal re ri Beya'.

¹⁶ Ri e takanelab man xquetamaj taj jawije' ri xinbe wi, mawi ri cätajin quibano. Mawi c'u ne c'o ta nu yo'm u bixic chque tak ri aj judeyib, ri u bixic wa' ri e cojol tabal tok'ob, ri nimak tak qui k'ij, e takanelab xukuje' tak chque niq'uiaj winak chic ri rajawaxic quetoban pa ri chac.

¹⁷ Xinbij c'u chque: “Ri ix kas iweta'm ri c'axalaj c'ulmatajic ri uj riktajinak wi, ri Jerusalen e yojyobinak, ri e roquibal e ak'alirinak. Chijunaj iwib wuc', kabana' u yaquic ri u nim tapia ri Jerusalen, rech ma ta cätakex ka yok'ic.”

¹⁸ Aretak c'u xintzijoj chque ri u banom ri ch'uch'ujalaj ranima' ri Dios che nu to'ic xukuje' tak ri tzij ri e u bim ri ajawinel chwe, ri e are' xquitzelej u bixic chwe: “¡Cakachaplej u banic ri yacanic!” Ruc' utzalaj canima' xquiya' qui chuk'ab chquixo'l.

¹⁹ Aretak c'ut xquita' ri Sanbalat ri aj Horon, ri Tobiy ri aj amon ri takanel, xukuje' ri Jesem ri aj arab, xa xujquiyok'o, xquitze'j ka wäch: “¿Jas ta ri iwuc'am ulok pa i k'ab? ¿La xa ta c'u lo chi are ta quiwaj quiwalijisaj ta iwib chrij ri ajawinel?”

²⁰ Xintzelej c'u u bixic chque: “Ri Dios ri c'o pa ri caj cuya' na chke chi utz cujel na puwi' ri cakabano. Uj, ri uj u pataninelab, cäkachaplej na u banic ri yacanic, ri ix man c'o ta jubik' iwe che ri Jerusalen.”