Ri Nehemiy 11 - Quiché Bible

Ri winak ri e c'o pa Jerusalen

¹ Ri e c'amal tak qui be ri aj israelib xquijekeba' quib pa Jerusalen; e are' c'u ri niq'uiaj winak chic xequiq'uiak ri taklebenic rech jun chque ri lajuj ja winak che jekel pa Jerusalen, ri tastalicalaj tinimit, are c'u ri belejeb che ri lajuj quebejekel chquipam ri niq'uiaj tak tinimit chic.

² Ri tinimit xebutewichi'j conojel ri pa quech wi, xquichi'j tak quib chi quejeki' can pa Jerusalen.

³ Are chi c'ut quekilo ri nimak tak c'ämal qui be ri xetzelej ulok pa ri patanijic ri xejeki' pa Jerusalen. Chquipam tak ri tinimit ri e c'o pa Juda ri xquijekeba' wi quib ri aj israelib, ri e cojol tabal tok'ob, ri aj levitib, ri e pataninelab chupam ri rachoch Dios xukuje' ri e quija'lil tak ri xepatanin ruc' ri Salomon, chquijujunal xejeki' chquipam tak ri kas qui tinimit ri quech.

⁴ Jujun chque ri aj Juda xukuje' aj Benjamin ri xejeki' pa Jerusalen e are' tak wa', ri e aj Juda: ri Ataiy, ri u c'ojol can ri Uziy, ri u c'ojol can ri Zacariy, ri are' u c'ojol can ri Sepatiy, ri u c'ojol can ri Mahalaleel, rija'lil can ri Pares;

⁵ xukuje' ri Maasiy, ri u c'ojol can ri Baruc, ri u c'ojol can ri Colos, ri u c'ojol can ri Hazaiy, ri u c'ojol can ri Adiy, ri u c'ojol can ri Joiarib, ri u c'ojol can ri Zacariy, ri u c'ojol can ri Silon.

⁶ Ri cajilabal ri e rija'lil ri Pares chnimalaj conojel ri xecanaj can pa Jerusalen e quiejeb sient oxc'al wajxakib (468) chnimalaj conojel, wa' e achijab ri cuya' quebe pa ri ch'o'j.

⁷ Ri e aj Benjamin: ri Salu, ri u c'ojol can ri Mesulam, ri u c'ojol can ri Joed, ri u c'ojol can ri Pedaiy, ri u c'ojol can ri Colaiy, ri u c'ojol can ri Maasiy, ri u c'ojol can ri Itiel, ri u c'ojol can ri Jesaiy,

⁸ xukuje' tak ri e rachalal ri Gabay xukuje' ri Salay. Chnimalaj conojel: e belejeb sient juwinak wajxakib (928).

⁹ Ri c'ämal qui be are' ri Joel u c'ojol ri Zicr; xukuje' ri Juda u c'ojol ri Senu, ucab c'ämal be pa ri tinimit.

¹⁰ Chque tak ri e cojol tabal tok'ob: ri Jedaiy, u c'ojol ri Joiarib, ri Jaquin,

¹¹ xukuje' ri Seraiy, u c'ojol ri Hilsiy, ri u c'ojol can ri Mesulam, ri u c'ojol can ri Sadoc, ri u c'ojol can ri Meraiot, ri u c'ojol can ri Ahitob, ri c'amal be chupam can ri rachoch Dios.

¹² Xukuje' tak ri e rachil, ri quechacun pa ri patanijic chupam ri rachoch Dios e wajxakib sient juwinak quieb; (822) xukuje' ri Adaiy, ri u c'ojol can ri Jeroham, ri u c'ojol can ri Pelaliy, ri u c'ojol can ri Amsi, ri u c'ojol can ri Zacariy, ri u c'ojol can ri Pasur, ri u c'ojol can ri Malquiy.

¹³ Ri e cachalaxic c'amal tak qui be jun ja winak, ri cajilabal e quieb sient cawinak quieb; (242) are' ri Amasay, ri u c'ojol can ri Azareel, ri u c'ojol can ri Azay, ri u c'ojol can ri Mesilemot, ri u c'ojol can ri Imer.

¹⁴ Ri e tak cachalaxic ri e achijab ri queta'm quech'ojinic, ri cajilabal e jun sient juwinak wajxakib (128) winak, are' c'u ri c'amal qui be are' ri Zabdiel, ri u c'ojol ri Jedolim.

¹⁵ Chque ri aj levitib: ri Semaiy, ri u c'ojol can ri Hasub, ri u c'ojol can ri Azricam, ri u c'ojol can ri Hasabiy, ri u c'ojol can ri Buni;

¹⁶ ri Sabetay xukuje' ri Josabad, ri are' e c'ämal qui be ri aj levitib, are c'u jachom ri chac pa qui k'ab ri naj queban wi che ri rachoch Dios;

¹⁷ ri Mataniy, ri u c'ojol can ri Micaiy, ri u c'ojol can ri Zabdi, ri u c'ojol can ri Asap, are' ri c'ämal qui be ri bixonelab ri caquibixoj ri k'ijilabal xukuje' ri u ya'ic ri maltioxinic aretak curik ri k'ijol che u banic ri ch'awem ruc' Dios; ri Bacbuquiy, ri are' ucab pa ri alaxic, xukuje' ri Abda, ri are' u c'ojol ri Samu, u c'ojol can ri Galal, u c'ojol can ri Jedutun.

¹⁸ Ri cajilabal ri aj levitib chnimalaj conojel ri xecanaj can chupam ri tastalic tinimit e quieb sient jumuch' quiejeb (284).

¹⁹ Ri e chajil tak oquibal: ri Acub, ri Talmon xukuje' tak ri e cachalaxic, ri quequichajij tak ri oquibal e jun sient oxc'al cablajuj (172).

²⁰ Ri niq'uiaj aj israelib chic chnimalaj conojel, xukuje' ri e qui tz'akatil chic ri e cojol tabal tok'ob xukuje' ri aj levitib, xequijekebela' tak quib chquipam ri niq'uiaj tak tinimit chic re Juda, chquijujunal chquipam tak ri quechbal;

²¹ pune' ri pataninelab pa ri rachoch Dios, ri e are' c'amal tak qui be ri Ziha xukuje' ri Jispa, xquijekeba' quib pa Opel.

²² Ri c'ämal qui be ri aj levitib ri e c'o pa Jerusalen are' ri Uz, ri u c'ojol ri Bani, u c'ojol can ri Hasabiy, u c'ojol can ri Mataniy, u c'ojol can ri Micaiy, ri e rija'lil ri Asap, c'amal qui be ri quebixonic ri caquibixoj ri bix re k'ijilanic chupam ri rachoch Dios,

²³ are c'u ri ajawinel u yo'm can takanic che ri rajawaxic u banic cumal ri e bixonelab k'ij chi k'ij.

²⁴ Ri cojol tzij chuwäch ri ajawinel che apachique rajawaxic pa ri tinimit, are' ri Petaiy, u c'ojol ri Mesezabeel, ri rija'lil c'ut ri Zera, u c'ojol ri Juda.

Tinimit ri xeban wi jekelem man xuwi ta ri Jerusalen

²⁵ Jujun chque ri aj ramak' ri Juda xquijekeba' quib pa Quiriat-arb, pa Dibon, pa Jecabseel,

²⁶ pa Josue, pa Molad, pa Bet-pelet,

²⁷ pa Hazar-sual, pa Beerseb,

²⁸ pa Siclag, pa Mecon,

²⁹ pa En-rimon, pa Zor, pa Jarmut,

³⁰ pa Zano, pa Adulam, pa Lacs xukuje' pa Azec, e cachil ri alaj tak qui tinimit xukuje' tak ri e culew ri cajwataj chque. Xequijekeba' tak quib kas pa Beerseb c'ä pa ri beya' re Hinom.

³¹ E are' tak c'ut ri e aj ramak' ri Benjamin xequijekeba' tak quib pa Jeb, pa Micmas, pa Aiy, pa Betel e rachil ri e alaj tak u tinimit;

³² xukuje' pa Anatot, pa Nob, pa Ananiy,

³³ pa Hazor, pa Rama, pa Jitaim,

³⁴ pa Hadid, pa Seboim, pa Nebalat,

³⁵ pa Lod, pa On, xukuje' chupam ri beya' ri e c'o wi ri nawinelabalaj tak aj chaquib.

³⁶ E c'o chi c'u ne jujun aj levitib xeya' tak culew pa Juda xukuje' pa Benjamin.