Ri Nahum 3 - Quiché Bible

¹ ¡Tok'ob a wäch, tinimit tixol quic', nojinak che banoj tzij xukuje' tokinic; ri e aweläk'anic man c'o ta u q'uisic!

² ¡U pak'alejic rapubal, u tararem quetet! ¡u pa cakan quiej, carwaj tak ri quepixc'onic!

³ ¡Queka'n tak ri quiej! ¡Jolk'inic quech tak ch'ich' re ch'o'j, repc'unic quech tak tz'imaj! ¡E q'uia mil tak socotajic, mulaj tak cäminakib! ¡Cäminakib ri man c'o ta qui q'uisic! ¡Ri winak quetzak tak paquiwi'!

⁴ Ronojel qui mac quech tak ri qui mac quech ri nim ch'utin ri' ri nojinak che nimal xukuje' u jelisam rib, ajtij re itzinic, ri cumal tak ri e u mac ri quech ri nim ch'utin xukuje' tak ri e ritzinic quebusub tak tinimit xukuje' nimak tak tinimit.

⁵ Ri Ajawaxel ri c'o ronojel u cuinem cujiquiba' u bixic: “Waral in c'o che u banic c'ax chawe: quenjolo' ri awatz'iak quenpakaba' c'ä chapalaj, rech ch'analic catquil ri nimak tak tinimit, e are' tak c'ut ri ajawibal chquila' ri a q'uixbal.

⁶ Quinjamij c'u na ch'uluch'ujil pawi'; catinch'uk c'u na che esbal q'uixbal quinban c'u na chawe xak xuwi chi c'u ri at catca'yexic.

⁷ Conojel ri catilowic quebanimaj na chawäch, je caquibij wa': ‘¡Ri Ninibe yojyobitisam chic! ¿Jachin ta lo ri quel ta u c'u'x che? ¿Jawije' ta lo cäriktaj wi jachin taj ri cacu'bisan ta u c'u'x?’

⁸ ¿La xa' ta pu lo at utz na ri at chuwäch ri Tebs, ri tinimit ri c'o chuxcut ri nima' Nil, ri sutital rij cumal q'ui tak ja', ri c'o ri nima' che k'atibal rij xukuje' ri ja' che u nim tapia?

⁹ Ri Etiopiy xukuje' ri Ejipt are' cowirisabal rib ri man c'o ta qui k'ilk'obic; ri e aj Pot, ri e aj libiyib, e are' tak wa' ri junam qui wäch ruc'.

¹⁰ Xc'am c'u ne bic ri Tebs, pa jun ulew chic; xec'äjix c'u ne ri e alaj tak ralc'ual cho tak ri qui xquina tak ri be; paquiwi' ri nimak tak qui k'ij xq'uiak taklebenic e re tak c'ut ri c'amal tak qui be xecoj tza'm tikom ch'ich'.

¹¹ Xukuje' c'u ri at catek'abarisaxok; sachinak a no'j, cac'ula' tak awib catzucuj jawije' ta ri catto'taj ta wi rech ma ta cätkaj pa u k'ab ri a c'ulel.

¹² Conojel ri e a cowirisabal xak e junam cuc' ri e u che'al tak higo ri e bejel chque tak higo ri c'a e t'on, ri quepulpubic we queyicopisax pa ri u chi' ri quetijowic.

¹³ Ri e awajch'ojab e je ta ne ri xa' ta e ixokib conojel; ri e oquibal chupam ri ulew e jakatal chuwäch ri c'ulel; ri k'ak' e u sachom qui wäch tak ri e a c'opibal.

¹⁴ Chac'olo' ja', rech catcuinic cach'ij lak'apupibal chebacowirisaj tak ri to'bal tak awib. Chanima' awib chupam ri xok'ol, chayak'a' ri t'ac, chac'ama' ri banbal tak xan.

¹⁵ Chila' cäsachisax wi na a wäch rumal ri k'ak'. Ri ch'ich' re ch'o'j, jacha' sac' cuq'uis c'u na u sachisaxic a wäch. ¡Chatpok'colijok e jacha' ri sac'! ¡Chatpok'colijok e jacha' ri alaj tak sac'!

¹⁶ Ri e awajc'ayib sibalaj xepok'colij na chquiwäch tak ri ch'imil ri e c'o cho ri caj. (Ri sac' cujal ri u tz'umal, carapin c'ut.)

¹⁷ Ri e chajil tak awech xak e junam cuc' tak ri sac'; e are' tak c'ut ri quemulin ri e awajch'ojab e jacha' sutz' tak chicop: aretak cuban tew, caquinac'ala' quib chuwäch tak ri tapia; aretak quel ulok ri k'ij, quebec; man c'o ta jun reta'm jawije' ri quebe wi'.

¹⁸ ¡Nimalaj waram quimajim ri e wajyuk'ab o ajawinel re Asir! Ri e to'l tak awech e uxlaninak, ri awajch'ojab quijabulam tak quib pa tak ri juyub man c'o ta c'u jachin ta quemulinic.

¹⁹ ¡Man c'o ta cunabal che ri a socotajic; ri a ch'a'c man cunatajel taj! Conojel ri caquita' u tzijol ri a quiäkasakil quequipak'apa tak ri qui k'ab rumal quicotemal, ¿jachin ta lo ri ma ta xurik c'ax rumal ri awetzelal ri man c'o ta u q'uisic?”