Ri Miquey 7 - Quiché Bible

Ri retzeletajic ri Israel

¹ ¡Tok'ob nu wäch! In jacha' banal pich'ol aretak cäyactaj ri u wäch ulew, man quenrik ta chi uva mawi higo, we wächinic tak ri' ri are ta quinwaj quebentijo.

² Man e c'o ta chic pa ri uwächulew winak ri e suc' mawi ri e jic ta che ri Dios; conojel xak queyem ri jok'otaj che u banic tokinic; quequicoj c'amibal chquibil tak quib.

³ E ajtijab che u banic ri lawaloyil; ri nimak qui k'ij quequitok'ij tak sipanic chque tak ri winak, ri k'atal tak tzij cäban na u pa qui k'ab che u banic k'atan tzij, ri e c'o qui cuinem caquibano jachique ri cäkaj chquiwäch caquetzelaj c'ut ri tinimit.

⁴ Ri utz na chquixo'l xak junam ruc' jun q'uix; ri sibalaj tz'akat pa ronojel, xak junam ruc' ri chocol. Cäpe c'u na ri k'ij ri quetz'akatisax ri ajilanic, ri k'ij ri xuya' u bixic ri yuxlenel chawe. C'äte c'u ri' cajawin na ri yojcorem chquixo'l.

⁵ Macoj ri cubij ri awajil a tz'akat mawi majiquiba' a c'u'x chrij jun ri awachil; chachajij c'u ne awib che ri catzijoj ruc' ri awixokil.

⁶ Ri c'ojolaxelab c'ut caquetzelaj u wäch ri qui tat, ri mialaxelab quequic'ulelaj ri qui nan, ri alibatzib caquiwalijisaj quib chquij ri alib chuchuyib, e are c'ut ri qui c'ulel chquijujunal e are' ri kas e cachalaxic quib cuc'.

⁷ Are c'u ri in quineyem na che ri Ajawaxel; quincoj na ri weyebal c'uxaj chrij ri Dios ri nu Colonel, rumal rech chi ri are' quinutatabej na.

Ri jicalaj u ch'äcanic ri Israel

⁸ Nim tinimit ri a banom a c'ulel chwe mat jajat che ri nu quiäkasakil, pune' ba', in tzakinak, quenewalij na; pune' in u mojcolim ri k'ekumalil, ri Ajawaxel are' nu chaj.

⁹ In macuninak chuwäch ri Ajawaxel, rumal ri' quincoch' na ri royowal; c'ä cuk'at na tzij panuwi', cuban c'u na suq'uilal chwe. Ri Ajawaxel qui nu c'am na bic chwäch ri chäj, cuban na chwe chi quinwil ri ch'äcanic.

¹⁰ Cäril c'u na ri u banom u c'ulel chwe, are c'u wa' cach'ukuw na che q'uixbal. Ri are' ri u bim ulok chwe: “¿Jawije' c'o wi ri a Dios?”, are c'u ri camic quinrik na ri quicotemal che rilic xak'alem jacha' ri t'ac ri c'o xo'l tak ri ja.

¹¹ Jerusalen petem cuban ri k'ij aretak ri e nimak tak a tapia queban chi na qui yaquic ri e a c'ulbat queyukupij na.

¹² Petinak chic ri k'ij aretak quepe na conojel ri winak che awilic: c'ä pa Asir c'ä pa Ejipt, c'ä ruc' ri nima' Nil c'ä ruc' ri Euprats, chuchi' ri plo c'ä chuchi' ri plo, chuchi' ri juyub c'ä chuchi' ri juyub.

¹³ Ri ulew cux na chaki'j uwo sak qui mac quech ri winak ri e c'o chuwäch, are c'u banowinak ri quetzelal.

¹⁴ ¡Ajawaxel, chajij la ri tinimit la, ri e chij la ri e ech la, ri e c'o qui tuquiel pa ri c'ache'laj, ri e sutital quij cumal wächinelalaj tak ulew! Chec'ama' la bic jacha' ri xban la chque pa ri ojer tak k'ij, pa tak ri echabal ri c'o pa Basan xukuje' pa Galaad.

¹⁵ Bana' la chque chi quequil mayibal, jacha' ri pa tak ri k'ij ri xebesaj la ulok pa Ejipt.

¹⁶ ¡Chi ri niq'uiaj nimak tak tinimit chic chequila', quenoj c'u na che q'uixbal pune' c'u ne c'o ronojel ri qui cuinem! ¡Che canaj canok e jacha' ta ne memab xukuje' tz'orab!

¹⁷ ¡Quicatza' ri puc'uc' ulew jacha' ri caquiban ri cumätz xukuje' jacha' ri caquiban ri jule' tak awaj chic ri caquijurula' tak quib! ¡Quebirbitic quebel ulok pa tak ri qui soc, e nojinak c'u che xe'n ib catzucux c'u la cumal, Ajawaxel ka Dios!

Ri Dios cusach u mac ri u tinimit

¹⁸ Man c'o ta chi c'u jun Dios jacha' ta ri lal, quecuy c'u la ri etzelal, quesach c'u pa jolom la ri qui walijisam tak quib ri ch'utinalaj u tz'akatil ri tinimit la. Lal cac'ut la ri lok'ok'ebal c'u'x la chkawäch man c'u cajekeba' ta la ri oyowal la chbe k'ij sak.

¹⁹ Jumul chi ba' chel c'u'x la chke chemuku' ba' la ri ketzelal. Cheq'uika' la bic tak ri e ka mac chupam ri u choil ri plo.

²⁰ ¡Ajawaxel, jekeba' la, ri jiquil xukuje' ri lok'ok'ebal c'uxaj ri xchi'j la ulok ojer chque ri e ka mam ri Abraham xukuje' ri Jacob!