Ri Miquey 6 - Quiché Bible

Ri u ch'o'j ri Dios ruc' ri Israel

¹ Chitatabej ix camic ri cubij ri Ajawaxel: “¡Chatwalijok chak'alajisaj chquiwäch tak ri juyub ri cac'ulmaj na, chiquitatabej tak c'ut ri juyub ri ch'abal la!”

² ¡Chixtatabenok tak ix, ri juyub! xukuje' ri e co tak u tac'alibal ri ulew: ri Ajawaxel cujekeba' na jun c'ulelam ib ruc' ri u tinimit, cujekeba' na jun ch'o'j ruc' ri Israel.

³ Are wa' cubij ri Ajawaxel: “Chaq'uiaka' chi nu palaj, nu tinimit, ¿Jas ri nu banom chawe o jas ri latz' ri nu yo'm chawe?

⁴ In xatinwesaj ulok pa Ejipt, xatinto'tajisaj man xatcanaj ta che lok'om pataninel; ri in xebentak bic ri Moises ri Aaron xukuje' ri Mariy, rech quequic'am i be.

⁵ Nu tinimit, chnataj chawe camic ri e u chomanic tak ri Balac, ajawinel re Moab, xukuje' ri xutzelej u bixic ri Balaam che ri u c'ojol ri Beor. Chnataj chawe aretak xatoc'ow pa Sitim xatopan pa Jilgal, chebaya' qui k'ij ri e u ch'äcanic ri Ajawaxel.”

Ri cäreyej ri Ajawaxel che ri winak

⁶ ¿Jas ta lo ri wuc'am quinopan che u k'ijilaxic ri Ajawaxel, ri Dios ri c'o pa ri caj? ¿La quinopan ta lo chuwäch e wuc'am alaj tak ama'ib tak wacax re jujun qui junab, che qui chi'xic tabal tak tok'ob che ri quechajirisaxic?

⁷ ¿La caquicot ta lo ri Ajawaxel, we ta quebenchi'j jun mil (1,000) ama'ib tak chij che o lajuj mil nima' aseit che? ¿O we ta quinchi'j ri nabeal nu c'ojol che, che u tojic ri nu c'ulelanic xukuje' ri nu mac?

⁸ Ri Ajawaxel u bim chic chawe o winak, jachique ri' ri utz xukuje' jachique ri careyej ri are' chawe: chi chabana' ri suq'uilal, xukuje' chi chatux jic xukuje' xa jun awanima' xukuje' chi chanimaj ri a Dios ruc' mach'ibalil.

⁹ Ri Ajawaxel cätajin cusiq'uij ri winak c'o c'ut u no'j ri cätataben ruc' nimilic: “Chixtatabenok, winak xukuje' ya'l tak no'j re ri tinimit;

¹⁰ pa ri rachoch ri itzel winak e c'o tak k'inomal ri xa' e t'orim xukuje' tak pajbal ri xa' quesubunic ri quinwetzelaj qui wäch.

¹¹ ¿La cuya' ta lo quinsach u mac ri quebucoj tak pajbal ri e jech'obisam xukuje' alal ri xa' quesubunic?

¹² Ri k'inomab ri e c'o chupam we tinimit ri' conojel e k'ipinelab; banal tak tzij xukuje' e subunelab conojel ri e c'o chupam we tinimit ri'.

¹³ Rumal ri' quenc'äjisaj a wäch; quenbana' c'ax chawe rumal quech tak ri e a mac.

¹⁴ Catwa'ic, man c'u catnoj taj, catakej c'u na u coch'ic numic; quebamulij ri catijic man catcuin ta c'ut c'o ta catanij, man catcuin ta c'ut c'o ta catanij canok, we c'u c'o jubik' catanij canok quinban na chi ri ch'o'j cusachisaj u wäch.

¹⁵ Catticonijic man c'o ta c'u wächinic cayaco; caque'j ri aseitun, man c'u cawechbej taj ri aseit; capitz'itz'ej na ri uva man c'u cawuq'uiaj ta ri u wa'l uva.

¹⁶ Rumal rech chi e a takem ri e u takanic xukuje' tak ri e u banoj ri Omri xukuje' ri xequiban ri e ralaxic ri Acab, xaban c'u awe jacha' ri xequiban tak we winak ri'. Rumal ri' in quenbana' na chawe xukuje' chque ri e a winak chi quixux jun xibibal ib xukuje' yacbal tze', are c'u ri u q'uixbal ri nu tinimit cakaj na pawi'.”