Ri Miquey 5 - Quiché Bible

Ri Dios quebuya' na e u k'atal tak tzij ri Israel

¹ “Are c'u ri camic, Jerusalen chasuc'umaj ri u to'ic awib, at c'u sutital chic c'axalaj u c'äjisaxic u wäch ri c'amal u be ri Israel quebanok.

² Are c'u ri at Belen Eprat, man nim ta a k'ij chquixo'l ri nimak qui k'ij pa Juda, chawe at quel wi na jun takanel ri catakan na puwi' ri Israel ri petinak che jun ojer alaxic.”

³ Camic ri Ajawaxel quebuya' canok ri e rech, xuwi c'u calan na ri ixok ri xak reyem chic ral. C'äte c'u ri' caquijunaj quib cuc' tak ri e qui winakil ri e aj israelib ri e c'o chupam jun ulew chic.

⁴ Ri ajawinel cawalij na che u yuk'uxic ri u tinimit ruc' ri cuinem xukuje' ri nimalaj u banic ri Ajawaxel ri u Dios, ri e are' quecuinic quejeki' na pa jamaril, rumal rech chi canimarisax na u k'ij ri Ajawaxel c'ä chupam ri q'uisbal jutz' re ri uwächulew.

⁵ Ri are' cuc'am na ulok ri jamaril. Aretak ri e aj asiriyab caquimajij ri kulew queboc c'u chquipam tak ri e cachoch tak ri kajawinelab, quekatak c'u na bic chquij wukub e c'amal tak be xukuje' wajxakib achijab nimak qui k'ij.

⁶ E are' quebajawin na puwi' ri Asir, ri rulew ri Nimrod, ruc' ch'ich' re ch'o'j ri cäjaw u pa u chi', cujquito'tajisaj c'u na pa qui k'ab ri aj asiriyab ri e qui xalk'atim tak ri e ka c'ulbat ri e qui majim tak ri kulew.

⁷ Chquixo'l c'ut, ri e q'ui tinimit, ri quecanaj che ri u tinimit ri Jacob quebux na e jacha' ri räxk'ab ri cutak ulok ri Ajawaxel, e jacha' ri jäb ri cakaj puwi' ri k'ayes, ri man are taj ri u rayibal ri winak cabanowic.

⁸ Chquixo'l c'ut ri e q'ui nimak tak tinimit, ri e to'tajinak can che ri u tinimit ri Jacob cux na jacha' jun coj chquixo'l ri juyubal tak awaj, jacha' jun coj chquixo'l jumulaj chij, chi aretak queboc'owic quebujiso, quebut'okopij, man cuya' ta c'u c'olbal chi man c'o ta jun cäto'taj ta ri u c'aslemal.

⁹ Je ch'äcanic wa' cäban na la, Ajawaxel, cäsachisaj c'u na la qui wäch conojel tak ri caquiban qui c'ulel che la.

¹⁰ Are' wa' ri cujiquiba' u bixic ri Ajawaxel: “Pa ri k'ijol ri' quebencämisaj tak na ri e a quiej quebensachisaj c'u na qui wäch tak ri e carwaj quech tak ch'o'j;

¹¹ quebenyojij na tak ri a tinimit, quebent'akij na conojel ri e a cowirisabal;

¹² quinq'uis na tzij paquiwi' tak ri e awitzibal xukuje' man e c'o ta chi a ch'obonelab quebenya' ta chi canok;

¹³ quebensachisaj na qui wäch tak ri e diosib ri e c'o awuc' xukuje' tak ri tastalicalaj tak abaj, rech mawi ta chi jumul quebak'ijilaj ta chic ri diosib tak ri kas xebaban at.

¹⁴ Quebenbok tak na ri e juwi' tak a che' ri e tastalic kas c'u quebensachisaj tak na qui wäch ri e a tinimit.

¹⁵ Chupam ri woyowal, quinc'äjisaj na qui wäch ri nimak tak tinimit ri man xcaj taj xeniman ta chwe.”