Ri Miquey 3 - Quiché Bible

Tzijol che qui c'ulelaxic ri e itzel k'atal tak tzij

¹ Chixtataben camic, k'atal tak tzij xukuje' c'amal tak be pa Israel, ¿la ma ta pu ya'tal chiwe ix retamaxic jachique ri suq'uilal?

² Man je ta c'u qui bano, quiwetzelaj u wäch ri utzil are c'u quilok'ok'ej ri lawaloyil; qui ch'ol ri u tz'umal ri nu tinimit kululem ri e u bakil quebiya' canok.

³ C'asal ri nu tinimit quitijo; qui t'ubij ri u tz'umal quebik'aj tak ri qui bakil; je quiban che jacha' ri cäban che ri ti'j ri caya' pa ri t'uy.

⁴ C'o jun k'ij ri ix quisiq'uij na ri Ajawaxel, are c'u ri are' man cutzelej ta na u wäch ri i tzij. Pa ri k'ijol ri' cuc'u' na rib chiwäch rumal ri etzelal ri e i banom.

⁵ Ri nu tinimit e u takem tak ri be ri man e are taj qui mac quech tak ri e k'axal tak tzij ri quesubuwic, ri caquibij chque ri quetzukuwic chi c'o jamaril jachin tak c'ut ri man cäcaj taj quequitzuku caquibij chque chi cäpe ri ch'o'j paquiwi'. Ri Ajawaxel cubij chque tak we e k'axal tak tzij ri':

⁶ “Ri ix man quebiwil ta china' c'utwächinic chak'ab mawi quebiya' ta chi na u bixic ri cac'ulmataj pa ri k'ekumalil.” Ri k'ij cäkaj na chque tak we e k'axal tzij ri', ri k'ij cäk'ekumar na chque.

⁷ Wa queca'y pa che' pa abaj ri xukuje' e ch'obonelab quecanaj can pa jun tz'akatalaj conil. Conojel man quech'aw ta chic aretak man catzelex ta u wäch qui tzij rumal ri Dios.

⁸ Are c'u ri chwe in, ri ruxlabal ri Ajawaxel qui nu nojisaj che chuk'ab, suq'uilal xukuje' cuinem, rech quinq'uiak chi qui palaj ri aj israelib ri man qui nimanic taj xukuje' ri qui mac.

⁹ Chitatabej c'u wa' camic, k'atal tak tzij xukuje' e c'amal tak be pa Israel, ix ri itzel quiwil wi ri suq'uilal quijech'obisaj c'ut ronojel ri colom c'olic.

¹⁰ Ri quiban u banic ri Jerusalen, ri tinimit ri c'o pa ri juyub rech Sion, puwi' ri tac'alibal re ri il patan xukuje' ri re ri man suq'uil taj.

¹¹ Ri k'atal tak tzij rech ri tinimit caquiya' quib cäban u pa qui k'ab, ri e cojol tabal tok'ob xuwi quetijonic we quetojic are c'u ri e k'axal tzij quequic'ayij tak ri quequiya' u bixic caquicoj c'u pa qui tzij chi e takom rumal ri Ajawaxel, je c'u caquibij wa': “Ri Ajawaxel c'o kuc'; man c'o ta lawaloyil cakataklebej ta na.”

¹² Man je ta c'u ri', u mac iwech ix, ri Jerusalen, ri tinimit aj juyub Sion, cacanaj canok jacha' jun c'upuj, pa jumulaj etzeletajic, are c'u ri juyub ri' ri c'o wi rachoch Dios cach'ukutaj na cumal patzapak tak k'ayes.