Ri Miquey 2 - Quiché Bible

Ri qui cuinem ri e banal c'ax

¹ ¡Tok'ob qui wäch ri winak ri xukuje' ne pa tak ri quichic' caquitakej qui chomaxic tak qui banic tak ri etzelal, aretak c'u cäsakaric caquichaplej u banic ri xquichomaj rumal rech chi c'o ri cuinem pa qui k'ab che u banic!

² Quequirayij tak ulew, quequitokij c'ut; quequirayij tak ja, quequeläk'aj c'ut. Quequiban tak c'ax chque ri winak xukuje' tak ri e cachalaxic xukuje' tak ri jastak quech.

³ Rumal ri' cubij ri Ajawaxel: “Xukuje' ri in e c'o tak nu chomanic chiwe. Quentaka ulok jun quiäkasakil piwi' ri man quixcuin ta wi quito'tajisaj ta ri i kul, man quixcuin ta c'ut quixbin ta chi na ruc' banoj nimal rumal rech chi e k'ijol tak wa' rech c'axc'olil.

⁴ Pa ri k'ij ri' quebixox tak na bix chiwe re juyuwem. Cäbix c'u na chiwe: ‘Q'uisnak tzij pakawi'; ri ka tinimit, ri rech ri Ajawaxel, u q'uexom rajaw ri man c'o ta c'u jachin ta cak'atinic; ri e kulew e qui jachom tak chquiwäch ri e ch'äcal tak kech.’ ”

⁵ Rumal ri' man c'o ta chi ri wulew pa ri u tinimit ri Ajawaxel.

Ri itzel tak k'axal tzij

⁶ Quecha' ri e are: “¡Mixpe che u k'axexic tzij chke! ¡Ri quiäkasakil man cacuin taj cujuriko!”

⁷ ¿La xa' ta pu c'okotajinak ri u tinimit ri Jacob? ¿La xa' ta pu q'uistajinak ri u coch'onic ri Dios? ¿La je ta pu wa' ri cuban ri Dios? ¿La ma ta cuban utzil ri u tzij puwi' ri colom cabinic?

⁸ Ix iwalijisam iwib chrij ri nu tinimit. Quebitokij tak ri atz'iak chque ri e petinak pa ri ch'o'j ri pakal cajil qui chomaj c'ut chi man c'o ta chi jachin cäch'ojinic.

⁹ Quequesaj bic tak ri ixokib chquipam ri e lok'alaj tak cachoch, mawi jubik' caquiya' ta chi chque ri calc'ual chi caquirik ri utzil ri nu yo'm chque.

¹⁰ Chixwalijok chitakej ri i be, chi we c'olbal ri man che ta uxlanibal; sibalaj nim ri etzelal ri c'o chupam, chi chuwirinak ronojel.

¹¹ We c'o jachin jun cuban banoj tzij, cubij c'ut: “In quinya' u bixic u wa'l uva xukuje' tzam”, are' k'axal tzij wa' ri takal che we tinimit ri'.

Ri Dios cuchi'j u to'tajisaxic ri u tinimit

¹² Quenmulij ronojel ri u tinimit ri Jacob; quenmolo' ri ch'utinalaj quieb oxib aj israelib ri e canajinak. Quebenmulij na e jacha' chij chupam ri qui warabal, jacha' jumulaj chupam ri yuk'bal, quetilil c'u na e jacha' jumulaj winak.

¹³ Ri Dios are' ri cajakow na ri qui be, queteri c'u na chrij quebel c'u na bic chuchi' ri oquibal chupam ri tinimit. Ri cajawinel, ri Ajawaxel, cänebej na chquiwäch conojel.