Ri Miquey 1 - Quiché Bible

Ri u k'atan tzij ri Dios puwi' ri Samar

¹ Are tzijol wa' ri xuya' u bixic ri Ajawaxel che ri Miquey aj Moreset xukuje' ri rumal c'utwächinic xuk'alajisaj chuwäch che ri cuc'ulmaj na ri Samar xukuje' ri Jerusalen, pa ri k'ijol aretak ri Jotam, ri Acaz xukuje' ri Ezequiy xebajawin pa Juda.

² Tinimit tak iwonojel, chitatabej wa'; ri e u winakil conojel ri ulew, kas chixtatabenok: Ri Ajawaxel c'ä pa ri tastalicalaj rachoch, cuya' na k'alajisanic che i c'ulelaxic.

³ Ri Ajawaxel quel na chupam ri c'olbal ri jekel wi cäpe c'u na cäbin paquiwi' tak ri juyub.

⁴ Chquixe' tak ri rakan quelebebic tak na ri juyub jacha' ri xcab ri cäcoj puwi' ri k'ak', e are tak c'ut ri beya' quejakjob na pa cacab je ta ne ri queramix ta rumal jun nimalaj nima'.

⁵ Ronojel wa' rumal rech ri man u nimanic taj ri u tinimit ri Jacob, xukuje' cumal quech tak ri qui mac ri aj Israel. ¿Jawije' c'o wi ri man u nimanic taj ri Jacob? ¡Chupam ri tinimit Samar! ¿Jawije' tak e c'o wi ri e subunelab tak u k'ijilabal ri Jacob? ¡Kas pa ri Jerusalen!

⁶ Rumal ri' cubij ri Ajawaxel: “Quinban na che ri Samar jumulaj etzeletajic, jun tek'etic ulew ri quetic wi tak uva. Quebenjabuj na ri abaj ri e cojom che u yaquic ri tinimit pa ri beya' quebenya' c'u na ri e u tac'alibal chisak.

⁷ Conojel tak ri e diosib ri e c'o ruc' quech'atix tak na, queporox c'u na xukuje' conojel tak ri e tastalicalaj tak qui cuta'm. E banom c'u wa' cumal tak ri qui rajil ri e quech ri nim ch'utin, quinban c'u na chque chi quebux chi na qui rajil ri e quech ri nim ch'utin.”

Ri u juyuwem ri Miquey

⁸ Rumal ri' quinok' na ruc' nimalaj bis; rumal ri' quet'anacat na ri wakan, qui nawinic jacha' jun xexalaj awaj quinjix u pa nu chi' jacha' jun ral abestrus.

⁹ Rumal rech chi ri u socotajic ri Samar man c'o ta u cunatajic; u rikom ri Juda xukuje' opaninak c'ä pa Jerusalen, ri tinimit jawije' ri e jekel wi ri nu winak.

¹⁰ Mibij wa' chque ri winak ri e c'o pa Gat; mixkaj che ok'ej. Chiwolkotij iwib rumal k'oxomal chupam ri puc'uc' ulew re Bet-le-apr.

¹¹ ¡Winak re Sapir, jix pa jun ulew chic, ix ch'anach'oj ix nojinak che q'uixbal! ¡Man quebel ta na bic ri e jekel pa Zaanan! ¡C'o juyuwem pa Bet-esel, are c'u ri ix quixcanaj canok man c'o ta chi cäyo'w ri to'banic chiwe!

¹² Ri e jekel pa Marot caquibakatij na quib rumal k'oxomal are ta cacaj quel ri c'ax chquij rumal rech chi ri Ajawaxel u banom chi ri etzelal copan kas chi qui chi' tak ri oquibal re Jerusalen.

¹³ Ix, ri ix jekel pa Lacs, ri man xixux ta nimanelab ix jacha' ri Israel, ri xixux ajchak'mac che ri macaj pa Sion, chebinuc'u tak ri quiej chque tak carwaj.

¹⁴ Kas xa' jumul chiya' can ri Moreset-gat. Ri tinimit Aczib cajwataj na che c'amibal chque tak ri ajawinelab aj Israel.

¹⁵ Ri Ajawaxel je cubij wa': “Piwi' ix ri ix jekel pa Mares, quintak chi na jun c'ac' ch'äcanel, e are' tak c'ut ri sibalaj e chatal na chquixo'l tak ri e aj israelib quequinima' na quib chupam ri pec ri c'o pa Adulam.

¹⁶ Are c'u ri at, tinimit re Sion, chabana' tol che ri a jolom che u c'utic ri k'oxomal, rumal quech ri c'ojolab ri sibalaj quebalok'ok'ej. Chabana' tol che ri a jolom jacha' che c'utbal re c'axc'ol, rumal rech chi ri e a c'ojol quec'am na bic pa jun ulew chic.”