Ri Matey 7 - Quiché Bible

Mik'at tzij paquiwi' niq'uiaj winak chic

¹ “Mik'at tzij paquiwi' jule' chic, rech man cäk'at ta tzij piwi' ix.

² Je c'ut jas quiban ix che u k'atic tzij paquiwi' jule' chic, je cäban na chiwe ix, cak'at na tzij piwi', jas ri pajbal xicoj ix, je cäcoj na chiwe.

³ ¿Jasche caca'yej ri mes ri c'o pa ri u bak'wäch ri awachalal, man cawil ta c'ut ri cuta'm ri c'o chupam ri a bak'wäch at?

⁴ We c'u ri at c'o jun cuta'm chupam ri kas a bak'wäch, ¿jas ta c'u ri cabano catcuinic cabij che ri awachalal: ‘Chaya' c'olbal chwe quinwesaj ri pajo ri c'o chupam ri a bak'wäch?’

⁵ ¡Quieb a wäch! Nabe chawesaj ri cuta'm ri c'o pa ri a bak'wäch. C'äte ri' kas catca'y che resaxic ri mes pa ri u bak'wäch ri awachalal.

⁶ Mebiya' ri tastalicalaj tak jastak chque ri tz'i'. Mebiquiäk tak ri e i perl chquiwäch ri ak. Ri e are c'ut quequitac'alej, quetzelej c'u chiwij, cäquiban ch'akatak chiwe.”

Tz'ononic, tzucunic xukuje' c'orc'otem chuchi' ri oquibal

⁷ “Chixtz'ononok, cäyataj c'u na chiwe; chixtzucunok, quixrikon c'u na; chixc'orc'ot chuchi' ri oquibal, cäjaktaj c'u na chiwäch.

⁸ Ronojel ri catz'ononic, cac'amanic; xukuje' ri catzucunic cärikonic; ri cäc'orc'otic, cäjaktaj na chuwäch.

⁹ ¿Jachin ta jun winak chiwe, we ri ralc'ual cuta' u wa che, cuya' ta jun abaj che?

¹⁰ ¿O la cuya' lo jun cumätz che, aretak cutz'onoj jun cär che?

¹¹ We c'u ri ix, ri ix lawalo, iweta'm quebiya' utzalaj tak jastak chque ri e iwalc'ual, ¡e ta c'u lo ri i Tat ri c'o pa ri caj, quebuya' na utzalaj tak jastak chque ri caquitz'onoj che!

¹² Je c'u ri', ronojel ri quiwaj chi cäquiban ri winak chiwe, jeri' xukuje' chibana' ix chque. Are c'u wa' ri cätakan wi ri pixab xukuje' ri xquitz'ibaj ri e k'axal tak tzij.”

Ri oquibal ri latz' u wäch

¹³ “Chixoc chupam ri oquibal ri latz' u wäch. Nim c'u qui wäch xukuje' nim qui pam ri oquibal xukuje' ri be ri cäc'aman bic chupam ri sachbal wächaj, e q'ui c'ut ri queboc bic chupam.

¹⁴ Latz' c'u u wäch ri oquibal, xukuje' alaj u wäch ri be ri quec'aman bic pa ri c'aslemal. Man e q'ui ta c'ut ri querikowic.”

Ri che' xa' rumal ri u wächinic quetamataj u wäch

¹⁵ “Chichajij iwib chquiwäch ri winak ri cäquijaluj quib chi e k'axal tak tzij. Ri e are quebul iwuc', je ta ne e chij, are c'u ri chquipam e tokinelab tak utiw.

¹⁶ Cumal tak ri e qui wächinic quiwetamaj qui wäch, man c'u quech'up ta uva chque tak ri q'uix, mawi higo chque tak ri tzacam.

¹⁷ Je c'u ri', ronojel utzalaj che' cuya' utzalaj u wächinic. Are c'u ri che' ri man utz taj, cuya' u wächinic ri man utz taj.

¹⁸ Man cäcuin taj ri jun utzalaj che' cuya' wächinic ri man utz taj, mawi cäcuintaj ri jun che' ri man utz taj cuya' utzalaj u wächinic.

¹⁹ Ronojel che' ri man cuya' ta utzalaj u wächinic, cächoy na bic, cäq'uiak pa k'ak'.

²⁰ Je c'u ri', rumal ri qui wächinic, quiwetamaj wi qui wäch.”

Man conojel taj queboc na pa ri rajawibal ri Dios

²¹ “Man ronojel taj ri cabin chwe: ‘Wajaw, Wajaw’, coc ta na pa ri rajawibal ri Dios, xane' xuwi ri quebanow ri u rayibal ri nu Tat ri c'o pa ri caj.

²² E q'ui c'ut cäquibij na chwe pa ri k'ij ri': ‘Wajaw, Wajaw, ¿la ma ta xkak'axej ri tzij la chque ri winak pa ri bi' la? ¿La ma ta xekesaj itzel tak uxlabal pa ri bi' la? ¿La ma ta xkaban q'uialaj mayibal pa ri bi' la?’

²³ Ri in c'ut quinbij na chque: ‘Mawi jumul xinch'ob i wäch. Chixel chnuwäch, ix banal tak etzelal.’ ”

Ri qui tac'alibal ri quieb ja

²⁴ “Ronojel jachin ri cutatabej we nu tzij ri', cunimaj c'ut, are' je jas jun achi utz u chomanic. Ri achi ri' xuyac jun rachoch puwi' jun nimalaj abaj.

²⁵ Xkaj ri jäb, xnimar ri nima', xpe nimalaj quiakik' chrij ri ja ri'. Man xtzak ta c'ut, rumal rech chi ri u tac'alibal c'o puwi' ri abaj.

²⁶ Ronojel ri cutatabej we nu tzij ri', man cunimaj ta c'ut, are' je jas jun conalaj achi ri xuyac jun rachoch puwi' ri sanyeb.

²⁷ Xkaj ri jäb, xnimar ri nima', xpe nimalaj quiakik' xuq'uiak rib chrij ri ja ri'. Xtzak c'ut. Sibalaj nim ri u tzakic.

²⁸ Aretak ri Jesus xuq'uis u bixic we tzij ri', conojel ri winak e mayinak che ri u tijonic.

²⁹ Rumal rech chi quebutijoj je jas ri jun c'o u takanic, man je ta c'ut e jacha' ri ajtijab re ri pixab.”