Ri Matey 6 - Quiché Bible

Ri cäban che qui banic ri utzalaj tak chac

¹ “Chichajij iwib miban ri i suq'uil chquiwäch ri winak rech quixca'yex cumal. We je quiban wa', man c'o ta tojbal iwe ruc' ri i Tat ri c'o pa ri caj.

² Aretak c'ut caban tok'ob chque ri mebayib, mawesaj u tzijol ruc' trompet, je jas ri cäquiban ri quieb qui wäch xo'l tak ri be xukuje' pa tak ri ja ri cäquitijoj wi quib ri aj judeyib che ri pixab, rech cänimarisax qui k'ij cumal ri winak. Kastzij quinbij chiwe, chi c'o chic ri tojbal quech.

³ Ri at c'ut aretak caban tok'ob chque ri mebayib, märetamaj ri a mox k'ab jas ri cuban ri awiquiak'ab.

⁴ Jeri' chabana' ri a tok'ob chi c'uyal. Ri a Tat c'ut ri quilow ri caban chi c'uyal, are cäyo'w na tojbal awech.”

Jesus cuya' tijonic jas cäban che ri ch'awem ruc' Dios

⁵ “Aretak ri ix quiban ch'awem ruc' Dios, je mibano jas ri quieb qui wäch, utz cäquil ri e are' cäquitac'aba' quib pa tak ri ja ri cäquitijoj wi quib ri aj judeyib che ri pixab, cäquitac'aba' quib pa tak ri qui ch'u'c ri c'ayibal, rech quebil cumal ri winak. Kastzij quinbij chiwe chi c'o chic ri tojbal quech.

⁶ Ri at c'ut, aretak caban ch'awem ruc' Dios, chatoc pa ri awachoch; chatz'apij ri uchi'ja, chabana' ch'awem ruc' ri a Tat ri c'o chic'uyal. Are c'u ri a Tat ri caril ri caban chi c'uyal, cuya' na ri tojbal awech.

⁷ Aretak quiban ch'awem ruc' Dios, mibij q'ui tzij ri man c'o ta qui patan, je jas ri cäquiban ri e k'ijilal tak diosib. Ri e are cäquichomaj chi cumal ri qui bixic q'uialaj tak tzij ri man c'o ta qui patan quetatajic.

⁸ Mijunamaj ba' iwib cuc'. Are c'u ri i Tat reta'm chic jachique tak ri jastak ri e rajawaxic chiwe c'ä majok chi tz'onoj che.

⁹ Ri ix c'ut je ch'awem wa' chibana': ‘Ka Tat ri c'o la pa ri caj, chtastaj ri bi' la.

¹⁰ Chpet ri ajawibal la. Chban ri rayibal la cho ri uwächulew, jacha' ri cäban chicaj.

¹¹ Ya' la ri ka wa re camic ri cajwataj chke.

¹² Checuyu' la ri e ketzelal jacha' xukuje' ri uj quekacuy ri etzelal ri e banom chke.

¹³ Mujya' la chuwäch ri takchibal macaj, xane' chujto' la chujesaj la pa u k'ab ri banal etzelal.’

¹⁴ We ri ix quebicuy ri etzelal ri e banom chiwe, ri i Tat ri c'o pa ri caj quixucuy na ix.

¹⁵ We man quebicuy ri winak, xukuje' ri i Tat man quebucuy ta na ri e iwetzelal ix.”

Ri Jesus cuya' ri tijonic puwi' ri man tijow ta wa

¹⁶ “Aretak man quitij ta i wa, mibisarisaj ri i palaj, jacha' caquiban ri quieb qui wäch. Ri e are' xak chubanic caquetzelaj ri qui palaj rech caquil ri winak chi man quewa' taj. Kastzij quinbij chiwe chi c'o chic ri tojbal quech.

¹⁷ Ri at c'ut aretak man catij ta a wa, chabila' ri a jolom, chach'aja' ri a palaj utz c'u u suc'umaxic awib chabana'.

¹⁸ Rech man caquil ta ri winak chi man a tijom ta a wa. Xane' xak xuwi ri a Tat ri quilowic ri c'o awuc' chi c'uyal. Ri are' c'ut cayo'w na ri tojbal awech.”

Ri k'inomal pa ri caj

¹⁹ “Mimulij i k'inomal waral cho ri uwächulew jawije' ri quechicopir wi, cuchuluj wi rib, jawije' ri queboc wi ri eläk'omab che reläk'axic bic.

²⁰ Xane' chimulij i k'inomal pa ri caj, ri man cächicopir ta wi, man cuchuluj ta wi rib, man queboc ta wi eläk'omab che reläk'axic bic.

²¹ Jawije' c'ut ri c'o wi ri i k'inomal, chila' c'o wi ri iwanima'.”

Ri u chäj ri cuerp

²² “Ri u chäj ri cuerp are ri bak'wächaj. We c'u utz ri a bak'wäch, ronojel ri' ri a cuerp c'o u chäj.

²³ We man utz ri a bak'wäch, ronojel ri a cuerp ri' c'o pa ri k'eku'm. We c'u k'eku'm ri chaj ri c'o awuc', sibalaj ba nim na ri' we k'ekumalil ri'.”

Ri Dios xukuje' ri k'inomal

²⁴ “Man c'o ta jachin jun cäcuinic quebupatanij quieb ajawib, rumal rech chi cäretzelaj na u wäch ri jun, culok'ok'ej c'u na ri jun chic, o cäruc'aj rib ruc' ri jun, man nim ta c'u cäril wi ri jun chic. Man quixcuin taj quipatanij ri Dios xukuje' ri k'inomal.”

Ri Dios quebuchajij ri ralc'ual

²⁵ “Rumal ri' quinbij chiwe: Mixoc il che ri i c'aslemal, jas ri quitij na, o jas ri quiwuq'uiaj na; mawi che ri i cuerp, jas atz'iak ri quicojo' na. ¿La ma ta are nim na u k'ij ri c'aslemal chuwäch ri cätijic? ¿La ma ta are xukuje' nim na u k'ij ri cuerp chuwäch ri atz'iak?

²⁶ Chiwilampe' ri chicop aj uwo caj ri e c'o qui xic'. Ri e are' man queticonij taj, man quek'atow taj, man quemulin ta pa c'uja. Ri i Tat c'ut ri c'o chila' chicaj quetzukuwic. ¿La ma ta are nim na i k'ij ix chquiwäch ri e are'?

²⁷ Jachin ta jun chiwe pune' ta sibalaj coc il, ¿Jas ta lo ri cubano che u tikic niq'uiaj bara' che ri rakan?

²⁸ Xukuje' ri atz'iak, ¿jasche quixoc il che? Chiwesaj i no'j chque ri juyubal tak cotz'i'j, jas ri cäquibano queq'uiyic: man quechacun taj, man quebatz'am taj.

²⁹ Quinbij c'u chiwe, chi mawi ri ajawinel Salomon je ta ratz'iak wa' xucojo, pune' sibalaj nim u k'ij.

³⁰ We ri k'ayes re ri juyub, ri c'o camic, chwek c'ut cäq'uiak pa k'ak', je ratz'iakixic wa' rumal ri Dios, ¡e ta c'u lo ri ix; ay ri ix, xa' jubik' i cojonic!

³¹ Mixoc il, mibij: ‘¿Jas cäkatijo, jas cäkuq'uiaj, jas katz'iak cäkacojo?’

³² Conojel we jastak ri' are sibalaj quequitzucuj ri man queta'm ta u wäch ri Dios; ri i Tat c'ut ri c'o chila' chicaj reta'm chi conojel we jastak ri' quebajwataj chiwe.

³³ Rumal c'u ri' are chicojo' i chuk'ab che u rikic ri rajawibal ri Dios chibana' c'ut ri cutok'ij ri Dios, quebic'am c'u na xukuje' conojel tak we jastak ri'.

³⁴ Je c'u ri', mixoc il che ri k'ij re chwek; ri k'ij c'ut re chwek cuc'am na ulok ri roquem il. Ri retzelal ri jun k'ij chubana' wa' che.”