Ri Matey 4 - Quiché Bible

Ri Jesus xtakchi'x che macaj

¹ C'äte ri' ri Uxlabaxel xuc'am bic ri Jesus pa ri chaki'j uwo sak, rech cac'ambejex rumal ri itzel.

² Cawinak (40) k'ij cawinak ak'ab ri Jesus man xwa' taj, xpe c'u u numic.

³ Xopan c'u ri itzel ruc' ri Jesus che u c'ambejexic. Xubij che: “We at u C'ojol ri Dios, chabana' chi we abaj tak ri' chebux caxlanwa.”

⁴ Ri Jesus xubij che: “Tz'ibatalic: Man xuwi ta rumal ri wa cäc'asi ri winak, xane' rumal ronojel tzij ri quebel ulok chuchi' ri Dios.”

⁵ Ri itzel xuc'am bic chupam ri tastalicalaj tinimit Jerusalen, xuc'am c'u bic puwi' ri tz'ukutz'ic ri naj elinak chicaj puwi' ri rachoch Dios.

⁶ Xubij c'u che: “We at u C'ojol ri Dios, chaq'uiaka' bic awib iquim; rumal rech chi tz'ibatalic: ‘Chi quebutak ri e u tako'n aj caj rech catquichajij, catcuc'aj na bic pa qui k'ab, rech man cachak'ij ta ri awakan cho abaj.’ ”

⁷ Ri Jesus xubij che: “Xukuje' tz'ibatalic: ‘Mac'ambejej ri Ajawaxel a Dios.’ ”

⁸ Jumul chic ri itzel xuc'am bic puwi' jun juyub naj ak'aninak. Xebuc'ut conojel ri ajawibal ri e c'o cho ri uwächulew chuwäch ri Jesus, ruc' ri qui juluwem.

⁹ Ri itzel xubij che: “Conojel wa' quebenya' chawe we catxuqui' chnuwäch, quinak'ijilaj c'ut.”

¹⁰ Xubij c'u ri Jesus che: “¡Jät, Satanas! Tz'ibatal c'ut: ‘Chak'ijilaj ri Ajawaxel a Dios, xak xuwi c'u ri are capatanij.’ ”

¹¹ Xutas c'u rib ri itzel che ri Jesus, xebopan jujun tak tako'n aj caj che u patanixic.

Ri Jesus xuchap ri u chac

¹² Aretak xuta' ri Jesus chi ri Xuan xcoj pa che', xtzelej pa Galiley.

¹³ Xuya' can ri Nazaret, xbec xec'ol pa Capernaum, ri c'o chuchi' ri cho, chupam ri rulew ri Zabulon xukuje' ri Neptali.

¹⁴ Xbantaj wa' rech catz'akat ri u tz'ibam ulok ri Isaiy ri k'axal tzij:

¹⁵ “Ulew re Zabulon, ulew re Neptali ri c'o chuchi' ri plo, ri c'o ch'käp che ri nima' Jordan, Galiley quech ri man aj judeyib taj.

¹⁶ Tinimit ri cäbin pa ri k'ekumalil, xril jun nimalaj chäj, jun chäj ri cajuluwic chque ri e jekel chupam ri u mu'jal ri cämical.”

¹⁷ Chi' c'ut ri Jesus xuchaplej tzijonic, xubij: “Chiq'uexa' i c'u'x, nakaj chi c'ut c'o wi ri rajawibal ri Dios.”

Ri Jesus xebusiq'uij quiejeb chapal tak cär che u tijoxelab

¹⁸ Ri Jesus cätajin cäbin chuchi' ri cho re Galiley, xeril quieb achijab cachalal quib. Ri jun are ri Simon ri xukuje' cäbix Lu' che, ri jun chic are ri Trix. Cätajin cäquiq'uiak ri qui c'at chapbal cär pa ri cho, e cäranelab c'ut.

¹⁹ Ri Jesus xubij chque: “Tisaj wuc', quinban c'u na chi quixux cäral tak winak.”

²⁰ Chanim xequiya' canok ri qui c'at, xquiterenej.

²¹ Xbin chi apan jubik' ri Jesus, xeril chi quieb cachalal quib: Ri Santiag ruc' ri Xuan, e u c'ojol ri Zebedey. E c'o chupam ri jucub ruc' ri Zebedey ri qui tat, cätajin quequic'ojoj tak ri qui c'at. Ri Jesus xebusiq'uij.

²² Chanim xquiya' can ri jucub xukuje' ri qui tat, xquiterenej ri Jesus.

Ri Jesus quebutijoj q'uialaj winak

²³ Ri Jesus xusolij ronojel ri Galiley. Quebutijoj ri winak pa tak ri ja ri cäquitijoj wi quib ri aj judeyib che ri pixab. Quebucunaj c'u conojel ri winak che ronojel ri qui yabilal xukuje' tak ri qui k'oxomal.

²⁴ Xel c'u u tzijol ri Jesus pa ronojel ri Siriy; xec'am ulok conojel ri c'o itzel tak yabil chque, conojel ri qui rikom nimak tak c'ax, conojel ri c'o itzel tak uxlabal chque, conojel ri xak c'ätetal quetzakic, conojel ri cäminak qui cuerp. Ri Jesus xebucunaj.

²⁵ Q'ui winak re Galiley, que ri Lajuj Tinimit, re Jerusalen, re Judey, xukuje' e re ch'käp che ri Jordan, xeteri' chrij.