Ri Matey 3 - Quiché Bible

Ri Xuan Bautist cätzijonic

¹ Pa tak ri k'ij ri' xopan ri Xuan Bautist, pa Judey pa ri chaki'j uwo sak, cätzijon chila'.

² Je c'u cubij wa': “Chiq'uexa' i c'u'x, rumal rech chi nakaj chic c'o wi' ri rajawibal ri Dios.”

³ Are wa' ri xutzijoj ri Isaiy ri k'axal tzij aretak xubij: “Jun ch'abal curak u chi' pa ri chaki'j uwo sak, ‘Chisuc'umaj ri u be ri Ajawaxel, chijicomisaj ri u be.’ ”

⁴ Ri Xuan rismal camey ri ratz'iak, tz'um ri ximibal u pam. Ri u wa ri cutijo are sac' xukuje' juyubal räx cab.

⁵ Xebel c'u ulok ri aj Jerusalen, xebel ulok ri winak pa tak ri rulewal ri Juda xukuje' pa tak ri culewal ri e c'o chuchi' ri nima' Jordan. Xebopan ruc' ri Xuan.

⁶ Xquik'alajisaj ri qui mac, xban ri qui bautism rumal ri Xuan pa ri nima' Jordan.

⁷ Aretak xril ri Xuan chi e q'ui chque ri pariseyib xukuje' ri saduseyib xepetic rech cäban ri qui bautism. Aretak ri Xuan xerilo xubij chque: “¡Quija'l tak cumätz! ¿Jachin xbin chiwe chi chixanimaj chuwäch ri c'äjisabal wächaj ri cäpe na?

⁸ Chebibana' ba wächinic ri takal che q'uexoj c'uxaj.

⁹ Michomaj u bixic pa iwanima': ‘Ri Abraham are' ri ka mam.’ Quinbij c'u chiwe, chi ri Dios cäcuinic cuban rija'l ri Abraham chque tak we abaj ri'.

¹⁰ Camic yo'm chic ri icäj che qui t'oyic bic ri che' c'ä chaquixe'. Ronojel che' ri man cuya' ta utzalaj u wächinic, cächoy na, cäq'uiak pa ri k'ak'.

¹¹ Ri in kastzij quinban i bautism pa ri ja', c'utbal wa' chi i q'uexom i c'u'x i yo'm c'u can ri i mac; are c'u ri jun ri petinak chwij, c'o na u cuinem chnuwäch. Man takal ta chwe quinwuc'aj bic ri u xajäb. Ri are' quixucoj na pa ri Ruxlabal ri Dios; o quixucoj na pa ri k'ak'.

¹² C'o ri u jopibal pa u k'ab, ri trico xukuje' cutas che ri pajo. Cuc'ol c'u na ri u trico pa ri u c'uja, cuporoj c'u na ri pajo pa ri k'ak' ri mawi jubik' cächupic.”

Xban u bautism ri Jesus pa ri ja'

¹³ Xel ulok ri Jesus pa Galiley, xopan chuchi' ri nima' Jordan rech cäban ri u bautism rumal ri Xuan.

¹⁴ Ri Xuan are ta xraj xuk'ilo, xubij c'u che ri Jesus: “In ta ri' ri rajawaxic cäban la ri nu bautism. ¿Are c'u ri lal cäpe la wuc'?”

¹⁵ Ri Jesus xutzelej u bixic che: “Chaya' c'olbal camic; takalic chi jewa' cakabano rech suc' u banic ronojel cakabano.” Xunimaj c'ut ri Xuan ri xubij che.

¹⁶ Xuwi c'u xbantaj ri u bautism ri Jesus, xel ulok pa ri ja'. Chanim c'ut ri caj xjaktajic, xril c'u ri Jesus chi ri Ruxlabal ri Dios xkaj u ulok puwi' jacha' jun palomax.

¹⁷ Xtataj c'u jun ch'abal chicaj ri xubij: “Are lok'alaj nu C'ojol wa' ri sibalaj quinquicot ruc'.”