Ri Matey 22 - Quiché Bible

Ri c'ambal no'j chrij ri c'ulanem

¹ Ri Jesus xebutzijobej chi jumul, xebuch'abej ri winak pa c'ambal tak no'j, xubij chque:

² “Ri rajawibal ri Dios xa' junam ruc' jun ajawinel, ri xuban nimak'ij che ri u c'ulanem ri u c'ojol.

³ Xebutak bic ri u tako'n che qui siq'uixic ri winak ri bim chque chi quec'oji' pa ri c'ulanem. Man xcaj ta c'ut xepetic.

⁴ Xebutak chi bic niq'uiaj tako'n, xubij chque: ‘Chibij chque ri winak: Xepilitaj ri ama' tak wacax, xepilitaj ri awaj ri e nu k'obisam, ri wa utzirinak chic ronojel ri ula'bal c'o chic. Tisaj pa ri c'ulanem.’

⁵ Ri winak c'ut man xeboc ta il, xebec. Ri jun xbe pa ri rulew. Ri jun chic xbe che u banic u c'ay.

⁶ Niq'uiaj winak chic xequichap ri tako'n, xequiyok'o, xequicämisaj.

⁷ Ri ajawinel, aretak xuto, xpe royowal. Xebutak bic ri rajch'ojab, xequicämisaj ri cämisanelab ri', xequiporoj ri qui tinimit.

⁸ Xubij c'u ri ajawinel chque ri u tako'n: ‘Xutzir ronojel ri cäkacoj che ri c'ulanem. Ri winak c'ut ri e kula'm, man takal ta chque.

⁹ Jix ba' chuchi' tak ri be, chebisiq'uij ulok pa ri c'ulanem conojel ri winak ri quebiriko.’

¹⁰ Xebel bic ri tako'n pa tak ri be. Xequimulij conojel ri winak ri xequiriko, chi e utz chi man e utz taj. Jeri' xnoj ri ja che winak.

¹¹ Xoc bic ri ajawinel che quilic ri winak ri e ulam. Xril jun winak chila' ri man u cojom ta atz'iak ri cacoj pa ri c'ulanem.

¹² Xubij che: ‘Wachil, ¿jas xabano xatoc ulok waral, man a cojom ta c'u atz'iak ri cacoj pa ri c'ulanem?’ Ri are' man xch'awtaj.

¹³ C'äte ri' ri ajawinel xubij chque ri u tako'n: ‘Chebiyutu' ri rakan u k'ab, chiq'uiaka' apan pa ri k'eku'm jela'. Cok' c'u na chila', cukuch'uch'ej na ri u ware.’

¹⁴ E q'ui ri e siq'uim. Xak e quieb oxib c'ut ri e cha'om.”

Xquita' che ri Jesus we cäquitoj ri alcabal

¹⁵ Aretak oc'owinak chi wa', ri pariseyib xebec xquijunaj qui wäch che u cojic jun c'amibal rech cakaj ri Jesus pa qui k'ab cumal ri kas e u tzij rech c'o caquitzujubej rech.

¹⁶ Xequitak bic ri qui tijoxelab ruc' ri Jesus e cachil ri aj herodib, xquibij che: “Aj tij, keta'm chi ri lal cabij la ri kastzij. Keta'm chi ri lal quetijoj la ri winak ruc' kastzij che ri u be ri Dios, chi man coc ta la il chuwäch jachin jun, we nim u banic o man nim ta u banic, man are ta quil la qui wäch ri winak.

¹⁷ Bij ba la chke, ¿jas cächomaj la? ¿La takalic cakatoj ri alcabal che ri nimalaj ajawinel Sesar, o man takal taj?”

¹⁸ Ri Jesus xuch'ob ri itzel qui chomanic, xubij chque: “¿Jasche quic'am u pa nu chi'? Ix xa' quieb i wäch.

¹⁹ Chic'utu' ri puak re ri alcabal chnuwäch.” Xquic'am c'u ulok jun puak chuwäch.

²⁰ Xubij c'u ri Jesus chque: “¿Jachin u ca'yebal ri c'o chuwäch xukuje' ri bi'aj ri tz'ibatalic?”

²¹ Xquibij che: “Rech ri Sesar.” Xubij c'u ri Jesus chque: “Chiya' che ri Sesar ri rech ri Sesar; che ri Dios ri rech ri Dios.”

²² Aretak xquito, xquimayo, xquiya' canok, xebel bic.

C'otoj chi'aj chrij ri c'astajibal

²³ Pa ri k'ij ri' xebopan ri saduseyib ruc' ri Jesus. Ri e are cäquibij chi man quec'astaj taj ri cäminakib. Xquita' c'u che ri Jesus:

²⁴ “Ajtij, ri Moises xubij: ‘We c'o jun achi cäcämic, we c'u man e c'o ta can ralc'ual ruc' ri rixokil, ri rachalal cäc'uli' na ruc' ri malca'n ixok. Jeri' ri e ralc'ual ri quec'oji' na ruc', cuban na chque chi e je ta ne e ralc'ual ri rachalal ri xcämic.’

²⁵ E c'o c'u wukub achijab chkaxo'l, e cachalal quib. Xc'uli' ri nabeal, xcämic. Man c'u xc'oji' ta ralc'ual, xuya' c'u can ri rixokil che ri rachalal.

²⁶ Junam xukuje' ri ucab, ri urox, c'ä ruc' ri uwuk achalaxel.

²⁷ E cäminak chi conojel, xcäm bic ri ixok.

²⁸ Xux c'u na quixokil conojel, aretak quec'astaj ri cäminakib, ¿jachin c'u lo chque ri wukub achijab ri' cux na rachajil ri ixok?”

²⁹ Ri Jesus xubij chque: “Ri ix ix sachinak rumal rech chi man iweta'm ta ri Tz'ibatalic, mawi ri u cuinem ri Dios.

³⁰ Aretak quec'astaj na ri cäminakib, man quec'uli' ta chic, mawi cäquiya' quib che c'ulanem, xane' je jas ri e tako'nib aj caj.

³¹ Chrij ri qui c'astajic ri cäminakib: ¿La ma ta i siq'uim ri u bim ri Dios?:

³² ‘In ri' ri u Dios ri Abraham, ri u Dios ri Isaac, xukuje' ri u Dios ri Jacob.’ Ri Dios c'ut man are ta qui Dios ri cäminakib, xane' are ri qui Dios ri e c'aslic.”

³³ Aretak xquita' wa', ri winak xquimay ri u tijonic ri Jesus.

Ri nimalaj takomal

³⁴ Ri pariseyib, aretak xquetamaj chi xtz'apix u pa qui chi' ri saduseyib rumal ri Jesus, xquimulij quib.

³⁵ Jun chque, are ajtij re ri pixab, cäraj cuc'am u pu chi' ri Jesus, xuc'ot u chi':

³⁶ “Ajtij, ¿jachique ri nimalaj takomal pa ri pixab?”

³⁷ Ri Jesus xubij che: “ ‘Chalok'ok'ej ri Awajaw a Dios ruc' ronojel awanima', ruc' ronojel a c'aslibal, ruc' ronojel a chomanic.’

³⁸ Are wa' ri nim na xukuje' nabe chque ri takomal.

³⁹ Ri ucab xa' junam ruc' wa': ‘Chalok'ok'ej ri awajil a tz'akat je jas ri u lok'ok'exic awib chbil awib.’

⁴⁰ We quieb takomal ri' e are wa' ri e u nimal ronojel ri pixab, xukuje' ri e quech ri e qui tijonic ri e k'axal tak tzij.”

¿Jachique ija'lil cäpe wi ri Crist?

⁴¹ C'ä qui mulin quib ri pariseyib, ri Jesus xuc'ot qui chi':

⁴² “¿Jas quichomaj che ri Crist? ¿Rija'l jachinok?” Xquibij che: “Are Rija'l ri David.”

⁴³ Ri Jesus xubij chque: “¿Jas c'u che cäbix Wajaw che rumal ri David, rumal ri Uxlabaxel? Xubij c'ut ri David:

⁴⁴ ‘Xubij ri Ajawaxel che ri Wajaw: Chatt'uyul pa ri nu wiquiak'ab, c'ä quebenya' na ri e a c'ulel chquixe' ri awakan.’

⁴⁵ We ri Crist xbix ‘Wajaw’ che rumal ri David, ¿la rija'l ta c'ut?”

⁴⁶ Man c'o ta jun xcuin che u tzelexic u wäch ri u tzij ri Jesus. Kas chi' c'ut pa ri k'ij ri', man c'o ta chi jun xucoj u chuk'ab che u c'otic u chi' ri Jesus.