Ri Matey 19 - Quiché Bible

Ri Jesus xuya' tijonic chque ri caquijach quib

¹ Ri Jesus, aretak xebuq'uis we tzij ri', xel bic pa Galiley. Xopan pa jun c'olbal re Judey ri c'o ch'käp che ri nima' Jordan.

² Sibalaj e q'ui winak xeteri bic chrij, xebucunaj c'u q'ui yawabib chila'.

³ Xebopan ri pariseyib ruc' ri Jesus, xquic'am u pu chi', xquibij che: “¿La cuya' chi jun achi cujach bic ri rixokil rumal rech apachique jasach?”

⁴ Ri Jesus xubij chque: “¿La ma ta i siq'uim ix chi ri xebanow ri winak aretak xtiquiritaj ri uwächulew, chi achi chi ixok xebubano?”

⁵ Xubij c'ut: “Rumal ri' ri achi cuya' can ri u nan u tat, curik na rib ruc' ri rixokil, ri quieb c'ut xa' e jun winak chic.

⁶ Je c'u ri' man e quieb ta chic, xane' xa' e jun winak chic. Ri xutunuba' ri Dios, man ya'tal ta chque ri winak chi cäquitaso.”

⁷ Xquic'ot c'ut u chi': “¿Jas c'u che xtakan ri Moises che u ya'ic jun wuj che u jachic ri ixokilaxel quesax c'u bic?”

⁸ Ri Jesus xubij chque: “Rumal rech chi co ri iwanima', ri Moises xuya' chiwe chi quijach bic ri iwixokil; nabe man je ta wa'.

⁹ Ri in c'ut quinbij chiwe, chi apachin ta ne cujach bic ri rixokil, we man rumal ruc'axic rib ri ixokil ruc' jun achi che u banic macunic, we cäc'uli' chi ruc' jun ixok chic, cäkaj pa mac. Ri achi c'ut ri cäc'uli' ruc' ri ixok ri jachom bic, xukuje' cäkaj pa mac.”

¹⁰ Ri tijoxelab xquibij che ri Jesus: “We jewa' ri u banic jun achi ruc' ri rixokil, man utz ta ba ri' we cäc'uli'c.”

¹¹ Ri Jesus xubij c'u chque: “Man conojel taj cäquich'ob we jasach ri', xane' xak xuwi ri winak ri ya'tal chque caquic'amo.

¹² E c'o jujun man quecuin taj quec'uli'c rumal rech chi kas quech wi ulok pa ri calaxic, e c'o jujun ri xa' caban chque cumal ri winak, e c'o niq'uiaj chic man quec'uli' taj rumal rech ri rajawibal ri Dios. Apachin ri cäcuin che u c'amic we tijonic ri' chuc'amowaj.”

Ri Jesus quebutewichi'j ri ac'alab

¹³ Xec'am ulok jujun ac'alab chuwäch ri Jesus, rech quebuya' ri u k'ab paquiwi', cuban c'u ch'awem ruc' Dios paquiwi'. E are c'u ri u tijoxelab xequiyaj ri winak ri xec'amow ulok.

¹⁴ Ri Jesus xubij c'u chque: “Chiya' chi quepe ri ac'alab wuc', mebik'atij, quech c'ut ri rajawibal ri Dios ri e je tak wa'.”

¹⁵ Xuya' c'u ri u k'ab paquiwi' ri ac'alab xel c'u bic chila'.

Jun achi k'inom xtzijon ruc' ri Jesus

¹⁶ Xpe c'u jun c'ojol ala, xopan ruc' ri Jesus, xubij che: “Utzalaj Ajtij, ¿jas ri utz quinban na rech quinwechbej ri junalic c'aslemal?”

¹⁷ Ri Jesus xubij che: “¿Jasche cabij utz chwe? Xa' jun ri utz c'olic, are ri Dios. We c'u cawaj catoc pa ri c'aslemal, chebanimaj ri takomal.”

¹⁸ Ri c'ojol ala xubij che: “¿Jachique tak?” Ri Jesus xubij: “Matcämisanic; matkaj pa mac ruc' jun winak chic; mateläk'anic; mayac tzijtal chrij jun winak chic.

¹⁹ Nim chebawila' wi ri a nan a tat. Chalok'ok'ej ri awajil a tz'akat je jas u lok'ok'exic awib chbil awib.”

²⁰ Xubij c'u ri c'ojol ala che: “Ronojel wa' nu banom ulok. ¿Jas chi c'ut ri rajawaxic quinbano?”

²¹ Xubij ri Jesus che: “We cawaj catux tz'akat, jät, chac'ayij ri jastak awe, chajacha' chque ri mebayib rech cäc'oji' na a k'inomal pa ri caj. Tasaj c'ut, chinaterenej.”

²² Ri c'ojol ala, aretak xuta' we tzij ri', xbisonic, xbec, rumal rech chi e q'ui ri jastak rech e c'olic.

²³ Xubij c'u ri Jesus chque ri u tijoxelab: “Kastzij quinbij chiwe, chi ruc' sibalaj c'ax coc jun k'inom pa ri rajawibal ri Dios.

²⁴ Xubij chi c'u na chque, chi man c'ax taj che jun camey cäk'ax pa ri u julil jun bak, chuwäch jun k'inom coc ta pa ri rajawibal ri Dios.”

²⁵ Ri u tijoxelab c'ut, aretak xquita' wa', sibalaj xquimayo, xquibij: “¿Jachin ta ba' lo ri cäcuinic cäcolotajic?”

²⁶ Ri Jesus xca'y chque, xubij: “Ri winak man quecuin ta wa' che u banic, are c'u ri Dios cäcuin che u banic ronojel.”

²⁷ Xubij c'u ri Lu' che: “Ri uj ka yo'm can ronojel, lal ka terenem. ¿Jas c'ut ri cäkarik na?”

²⁸ Ri Jesus xubij chque: “Kastzij quinbij chiwe: Aretak cac'ac'arisax ronojel, aretak cät'uyi' na ri Rija'l winak puwi' ri u tem, ri sibalaj nim u k'ij, xukuje' ri ix ri in i terenem quixt'uyi' na paquiwi' cablajuj tem che u k'atic tzij paquiwi' ri cablajuj amak' re Israel.

²⁹ Conojel ri qui yo'm can cachoch, o cachalal, o canab, conojel ri qui yo'm can qui nan qui tat, conojel ri qui yo'm can quixokil, o calc'ual, o culew, rumal rech ri nu bi', caquic'am na jun sient chi je tak wa' xukuje' cäquechbej na ri junalic c'aslemal.

³⁰ E q'ui ri e nabe quebux na q'uisbal; e are' c'u ri e q'uisbal quebux na nabe.”