Ri Matey 17 - Quiché Bible

Xq'uextaj ri u wächbal ri Jesus

¹ Oc'owinak chi wakib k'ij, ri Jesus xuc'am ri Lu', ri Santiag xukuje' ri Xuan ri rachalal ri Santiag. Xebuc'am bic pa qui tuquiel wi puwi' jun juyub naj elinak chicaj.

² Xq'uextaj c'u ri u wächbal ri Jesus chquiwäch; xjuluw ri u palaj je jas ri k'ij, ri ratz'iak xebux sakloloj je jas ri sakil.

³ Xquil c'u ri Moises xukuje' ri Eliy, quetzijon ruc' ri Jesus.

⁴ Ri Lu' xubij che ri Jesus: “Kajaw utz ri' chi chujcanaj can waral. We caj la, cäkaban oxib cäbal waral. Cäkaban jun ech la, jun re ri Moises, jun re ri Eliy.”

⁵ C'ä cätajin cätzijon ri Lu', xpe c'u jun sutz' ri cäjuluwic, xebuch'uku. Xtataj c'u jun ch'abal pa ri sutz' ri xubij: “Are lok'alaj nu C'ojol wa', ri cäkaj chnuwäch. Chitatabej ba ri u tzij.”

⁶ Ri u tijoxelab, aretak xquita' wa', xexuquic, xquiya' ri qui palaj cho ri ulew, sibalaj xquixe'j quib.

⁷ Xkeb c'u ri Jesus cuc', xebuchap ocok, xubij chque: “Chixwalijok, mixe'j iwib.”

⁸ Xeca'yic, xquil ri Jesus xak u tuquiel chic, man c'o ta chi jun xquilo.

⁹ Aretak cätajin quekaj ulok puwi' ri juyub, ri Jesus xebupixbej ri u tijoxelab, xubij: “Mibij ri xiwilo che e jachin jun, c'ä chc'astaj na ri Rija'l winak chquixo'l ri cäminakib.”

¹⁰ Ri u tijoxelab xquic'ot u chi' ri Jesus: “¿Jas c'u che cäquibij ri ajtijab re ri pixab chi rajawaxic nabe cäpe na ri Eliy?”

¹¹ Ri Jesus xubij chque: “Kastzij ri Eliy cäpetic quebeluya' c'u na conojel ri jastak pa ri qui c'olbal.

¹² Ri in quinbij chiwe, chi xul ri Eliy. Ri winak c'ut man xquich'ob ta u wäch, xane' xquiban che ronojel ri xcaj xquibano. Je c'u ri' xukuje' ri Rija'l winak curik na c'ax cumal.”

¹³ C'äte ri' xquich'ob ri u tijoxelab chi are xubij ri Xuan Bautist.

Ri Jesus xucunaj jun ala ri c'o jun itzel uxlabal che

¹⁴ Aretak xebopanic jawije' e c'o wi ri winak, xpe c'u jun achi, xxuqui' chuwäch ri Jesus,

¹⁵ xubij che: “Wajaw, chel c'u'x la che ri nu c'ojol. Rumal rech chi u rikom itzel yabil, curik sibalaj c'ax. Q'uialaj mul cätzak pa ri k'ak' xukuje' pa ri ja'.

¹⁶ Xinc'am ulok chquiwäch ri tijoxelab la, e are' c'ut man xecuin ta che rutzirixic.”

¹⁷ Ri Jesus xubij chque: “¡Pe xibano, jech'alaj tak winak man ix cojonelab taj! ¿C'ä joropa' k'ij quinc'oji' chi na iwuc'? ¿C'ä jampa' quintakej na i coch'ic? Chic'ama' ulok ri ala waral.”

¹⁸ Ri Jesus xuyaj ri itzel uxlabal. Ri uxlabal c'ut xel che ri ala, xutzir c'ut pa ri jok'otaj ri'.

¹⁹ Xekeb c'u ri tijoxelab ruc' ri Jesus pa qui tuquiel wi, xquic'ot u chi': “¿Jas c'u che ri uj man xujcuin ta che resaxic ri itzel uxlabal?”

^20-21 Xubij ri Jesus chque: “Rumal rech chi xa' jubik' ri i cojonic. Kastzij quinbij chiwe, chi we ta c'o i cojonic je jas ri u nimal ri rija' ri moxtansa, quibij na ri' che we juyub ri': ‘Chatel bic waral, chatk'ax chila'’, cäk'ax c'u na. Ma ta c'o jun jasach ri' ri ma ta quixcuin che u banic.”

Ri Jesus cucamulij u bixic ri u cämical

²² Cätajin c'u quebin junam pa Galiley, ri Jesus xubij chque ri u tijoxelab: “Ri Rija'l winak cäjach na pa qui k'ab ri winak.

²³ Caquicämisaj na, pa oxib k'ij c'ut cac'astaj na.” Sibalaj xebison ri u tijoxelab.

Ri Jesus xutoj ri alcabal

²⁴ Aretak xebopan pa Capernaum, xepe ri tok'il tak alcabal re ri rachoch Dios, xebopan ruc' ri Lu', xquibij: “Ri iwajtij ¿la man cutoj ri alcabal che ri rachoch Dios?”

²⁵ “Cutojo'”, xcha' ri Lu'. Aretak xoc ri Lu' pa ri ja, nabe xch'aw ri Jesus, xubij che: “¿Jas cachomaj at, Simon? Ri ajawinelab quech ri nimak tak tinimit ri e c'o cho ri uwächulew, ¿jachin chque cäquitok'ij wi ri alcabal o tojbal? ¿La chque ri e qui winakil o chque ri man e qui winakil taj?”

²⁶ Ri Lu' xutzelej u bixic: “Chque ri man e qui winakil taj.” Ri Jesus xubij che: “Man ba' ya'tal ta chque ri alc'ualaxelab chi quetojonic.

²⁷ Man cäkaj ta c'ut chi cäquiban quieb qui c'u'x chkij. Jät ba'. Chaq'uiaka' ri chapbal cär pa ri cho. Ri nabe cär c'ut ri cäriko, chac'ama', chajaka' ri u chi', cärik c'u na jun puak. Chaya' ba chque ri tok'il tak alcabal, catojbej can re ri wech in xukuje' ri awech at.”