Ri Matey 16 - Quiché Bible

Ri pariseyib xukuje' ri saduseyib cäcaj cäquil jun etal

¹ Xepe ri pariseyib xukuje' ri saduseyib, xebopan ruc' ri Jesus, cäcaj cäquic'am u pu chi'. Xquita' jun tok'ob che chi chc'utu' jun etal aj chicaj chquiwäch.

² Ri Jesus xubij chque: “Aretak xk'ekal chic, quibij: ‘Man c'o ta jäb cäpetic, rumal rech chi quiäk u pam ri caj.’

³ Ak'ab c'ut quibij: ‘Cuban na k'ekal jäb camic, rumal rech chi quiäk u pam ri caj, cäk'ekumar c'ut.’ We ri ix iweta'm u ch'obic u wäch ri caj, ¿Jas c'u che man quixcuin ta che qui ch'obic tak ri etal quech tak we k'ij ri'?

⁴ We itzel tak winak ri' xukuje' man e jic taj caquitz'onoj jun etal; man cäyataj ta c'u etal chque xuwi ri etal re ri Jonas.” Xebuya' canok, xbec.

Ri qui ch'am ri pariseyib

⁵ Xek'ax ri tijoxelab ch'käp che ri cho. Ri are xsach pa qui jolom ri u c'amic bic ri qui caxlanwa.

⁶ Ri Jesus xubij chque: “Chiwila', chichajij iwib chuwäch ri qui ch'am ri pariseyib xukuje' ri saduseyib.”

⁷ Ri u tijoxelab c'ut xquichap c'u u chomaxic, xquibij: “Rumal rech chi man xkac'am ta ulok ka caxlanwa.”

⁸ Xuch'ob ri Jesus jas ri cätajin cäquichomaj, xubij chque: “Ri ix, xak jubik' i cojonic, ¿jasche quichap u chomaxic chi man c'o ta i caxlanwa?

⁹ ¿La man quich'obo? ¿La man cänataj chiwe ri job caxlanwa ri xquitij ri job mil achijab? ¿La man cänataj chiwe joropa' chicäch ri caxlanwa xebiyico ri man xquiq'uis taj?

¹⁰ ¿Mawi cänataj chiwe ri wukub wa ri xquitij ri quiejeb mil achijab? ¿La man cänataj chiwe joropa' chicäch ri caxlanwa xebiyico ri man xquiq'uis taj?

¹¹ ¿Jas c'u che man quich'ob taj chi man are ta ri caxlanwa ri xinbij chiwe? Chichajij ba' iwib chuwäch ri qui ch'am ri pariseyib xukuje' ri saduseyib.”

¹² C'äte ri' xquich'obo chi man are ta xubij chi cäquichajij quib chuwäch ri ch'am re ri caxlanwa. Xane' xubij chi cäquichajij quib chuwäch ri qui tijonic ri pariseyib xukuje' ri saduseyib.

Ri Lu' cuk'alajisaj chi ri Jesus are' ri Crist

¹³ Aretak xopan ri Jesus pa ri rulewal ri Sesarey re Pilip, xuta' c'u ri Jesus chque ri u tijoxelab: “¿Jachin ri Rija'l winak cäquibij ri winak?”

¹⁴ Ri e are xquibij: “Niq'uiaj winak cäquibij chi are ri Xuan Bautist. Niq'uiaj chic cäquibij chi are ri Eliy. E c'o niq'uiaj chic cäquibij chi are ri Jeremiy o jun chque ri k'axal tak tzij.”

¹⁵ Ri Jesus xubij chque: “E c'u ri ix, ¿jachin ri in quibij?”

¹⁶ Ri Simon Lu' xubij che: “Lal ri' ri Crist, ri u C'ojol ri c'aslic Dios.”

¹⁷ Ri Jesus xubij che: “Utz awe, Simon, u c'ojol ri Jonas. Man xc'ut ta wa' chawäch cumal ri winak, xane' xc'ut wa' chawäch rumal ri nu Tat ri c'o pa ri caj.

¹⁸ In quinbij chawe, chi at Lu'. Puwi' c'u we nimalaj abaj ri' quinyac wi na ri nu comon cojonelab chi nimalaj conojel. Mawi c'u ne ri u cuinem ri cämical cäch'äcan ta na puwi'.

¹⁹ Quebenya' c'u na ri e u laweyil ri rajawibal ri Dios chawe. Ri caxim cho ri uwächulew, cäximitaj na pa ri caj. Ri caquir cho ri uwächulew, cäquiritaj na pa ri caj.”

²⁰ Ri Jesus xebupixbej c'u ri u tijoxelab chi c'o jun mäquibij wi chi are ri Crist.

Ri Jesus xuya' u bixic ri u cämical

²¹ Kas chi' c'ut ri Jesucrist xuchaplej bic ri u k'alajisaxic chquiwäch ri u tijoxelab chi rajawaxic chi cäbe na pa Jerusalen, caban c'u na nimak tak c'ax che cumal ri nimak tak tatayib xukuje' ri qui nimakil ri e cojol tak tabal tok'ob xukuje' ri ajtijab re ri pixab. Rajawaxic c'ut chi cäcäm na, pa oxib k'ij c'ut cäc'astajisax na.

²² Ri Lu' xuc'am bic ri Jesus, xuchaplej u pixbexic je xubij wa': “Ma ta chuya' ri Dios chi je cac'ulmaj la wa', Wajaw.”

²³ Ri Jesus xutzolk'omij rib, xubij che ri Lu': “Chatel chnuwäch, Satanas. Quinaya' pa takchibal mac. Are c'u ri at man cachomaj ta ri e jastak re ri Dios, xane' ri jastak que ri winak.”

²⁴ Xubij c'u ri Jesus chque ri u tijoxelab: “We c'o jun cäraj cäpe wuc' in, rajawaxic chi are' muban ri u rayibal, xane' rajawaxic chi cutelej ulok ri u ripibal, chinuterenej c'ut.

²⁵ Apachin ta ne ri cäraj u colic ri u c'aslemal, cusachisaj na u wäch, apachin ta ne ri cusachisaj u wäch ri u c'aslemal rumal wech, curik na.

²⁶ ¿Jas ta c'u lo cärechbej na jun winak, we cuch'äc ronojel ri uwächulew, cutzak c'u ri ranima'? ¿Jas ta lo cuya' na ri winak che u q'uexwäch ri ranima'?

²⁷ Ri Rija'l winak cäpe cuc' ri tako'nib aj caj, ruc' ri u juluwem ri u Tat, c'äte c'u ri' quebutoj na ri winak chquijujunal je jas ri qui chac ri qui banom.

²⁸ Kastzij quinbij chiwe: E c'o jujun chque ri e c'o waral, c'ä maja' quecämic cäquil na ri Rija'l winak petinak pa ri rajawibal.”