Ri Matey 14 - Quiché Bible

Xcämisax ri Xuan Bautist

¹ Pa tak ri k'ij ri' ri Herod ri k'atal tzij xuta' u tzijol ri cuban ri Jesus.

² Xubij chque ri e c'o ruc': “Are wa' ri Xuan Bautist. Xc'astaj chquixo'l ri cäminakib. Rumal c'u ri', cäcuin che u banic nimak tak mayibal.”

³ Ri Herod c'ut u chapom can ri Xuan, u ximom, u cojom pa che'. Xuban c'u wa' u mac rech ri Herody, rixokil ri Pelip ri rachalal ri Herod.

⁴ Rumal rech chi u bim ri Xuan che ri Herod: “Awas che la chi cäc'oji' ri Herody uc' la che ixokil la.”

⁵ Ri Herod aretak xraj xucämisaj ri Xuan, xuxe'j c'u rib chquiwäch ri winak, rumal rech chi ri winak cäquicojo chi ri Xuan are jun k'axal tzij.

⁶ Xopan ri nimak'ij re ri u junab ri Herod. Ri ral ali ri Herody xxojow chquiwäch ri winak ri e rula'm. Xkaj c'u chuwäch ri Herod.

⁷ Jeri' chi xuchi'j, ruc' jun chi'nic ri kas cäban na, u ya'ic che ri ali apachique jasach ri cutz'onoj.

⁸ Ri ali, cojom chi u c'u'x rumal ri u nan, xubij: “Chya' la chwe waral pa jun liq'uilic lak ri u jolom ri Xuan Bautist.”

⁹ Sibalaj xbison ri ajawinel. Xuya' takanic chi chyok ri xutz'onoj rumal c'u rech ri e u chi'nic ri kas cäban na, xukuje' rumal quech ri winak ri e t'uyul pa ri mexa ruc'.

¹⁰ Xtakan c'u che resaxic ri u jolom ri Xuan pa che'.

¹¹ Xuc'a'x ulok ri u jolom pa jun liq'uilic lak, xya' che ri ali. Ri are' c'ut xruc'aj bic, xuya' che ri u nan.

¹² Xebopan c'ut ri u tijoxelab ri Xuan, xquic'am bic ri cäminak, xquimuku c'ut. Xebec, xquiya' u tzijol che ri Jesus.

Ri Jesus xuya' qui wa job mil achijab

¹³ Xetamataj c'ut rumal ri Jesus ri xc'ulmatajic, xel bic chila' pa jun jucub man c'o ta jun xnabenic, xbe pa ri chaki'j uwo sak pa u tuquiel wi. Aretak xetamataj cumal ri winak, xebel ulok pa tak ri tinimit. Xquiterenej chicakan.

¹⁴ Ri Jesus, aretak xel pa ri jucub, xeril sibalaj q'ui winak. Xel u c'u'x chque, xebucunaj ri qui yawabib.

¹⁵ Xk'ekal chi c'ut, xekeb ri u tijoxelab ruc', xquibij: “Waral chaki'j uwo sak. Benak chi ri k'ij, che jacha' la bic ri winak, rech quebe pa tak tinimit che u lok'ic ri cäquitijo.”

¹⁶ Ri Jesus xubij chque: “Man rajawaxic taj chi quebec; chiya' ix chque ri cäquitijo.”

¹⁷ Xquibij c'u ri u tijoxelab che: “Man c'o ta c'o kuc' waral, xane' xa' job caxlanwa ruc' quieb cär.”

¹⁸ Ri Jesus xubij chque: “Chebic'ama' ulok.”

¹⁹ Xebutak c'u ri winak chi quet'uyi' puwi' ri k'ayes. Xebuc'am ri job caxlanwa cuc' ri quieb cär, xca'y chicaj, xuya' maltioxinic che ri Dios. Xebupir ri caxlanwa, xebuya' chque ri u tijoxelab. Ri u tijoxelab c'ut xequiya' chque ri winak.

²⁰ Xewa' c'u conojel, xenojic; xebequiyac ri ch'akatak ri xeto'tajic e cablajuj (12) chicäch nojinak.

²¹ Ri xewa'ic cäraj e c'o job mil achijab, man xebajilax ta c'ut ri ixokib mawi ri ac'alab.

Ri Jesus xbin puwi' ri ja'

²² Ri Jesus xebucowij ri u tijoxelab chi cheboc pa ri jucub, chenabej chuwäch, chek'ax ch'käp che ri cho; are c'u ri are xcanaj na canok, xebujach na can ri winak.

²³ Aretak xebujach can ri winak, xpaki' puwi' jun juyub pa u tuquiel wi che u banic ch'awem ruc' Dios. Xk'ekal chic, c'o chila' u tuquiel.

²⁴ Ri jucub sibalaj naj chic c'o wi che ri ulew, cäban c'ax che cumal ri k'et ri cäpe puwi' ri cho. Chuwäch c'u petinak wi ri quiakik'.

²⁵ Pa ri u sakaribal c'ut ri ucab k'ij, ri Jesus xbe cuc', cäbin puwi' ri ja'.

²⁶ Ri u tijoxelab xquilo chi cätajin cäbin puwi' ri cho, xk'oxow ri canima', xquixe'j quib, xquirak qui chi', xquibij: “Jun xibinel wa'.”

²⁷ Ri Jesus c'ut chanim xebuch'abej, xubij: “Chijiquiba i c'u'x. In wa'; mixe'j iwib.”

²⁸ Ri Lu' xubij che: “Wajaw, we lal ri', chtakan ba la chi quinbe uc' la puwi' ri ja'.”

²⁹ Ri Jesus xubij: “Tasaj.” Ri Lu' xkaj bic chrij ri jucub, xuchaplej binem, che u bic ruc' ri Jesus.

³⁰ Aretak c'ut xrilo ri quiakik', xuxe'j rib, xuchaplej bik'tajic. Xurak u chi', xubij: “¡Chincolo' la, Wajaw!”

³¹ Ri Jesus xuc'am che ri u k'ab, xuchapo, xubij che: “Ri at, xa' jubik' a cojonic, ¿jasche xuban quieb a c'u'x?”

³² Xuwi c'u xeboc bic pa ri jucub, xtäni' ri quiakik'.

³³ C'äte ri' ri e c'o pa ri jucub xquik'ijilaj ri Jesus, xquibij: “Kastzij lal ri' ri u C'ojol ri Dios.”

Ri Jesus xebucunaj ri yawabib pa Jenesaret

³⁴ Xek'ax c'u ch'käp che ri cho, xebopan pa ri ulew Jenesaret.

³⁵ Ri achijab chila' xquich'ob c'u u wäch ri Jesus, xquesaj u tzijol chque conojel ri e c'o chila'. Xequic'am c'u ulok chuwäch ri Jesus conojel ri yawabib.

³⁶ Xquibochi'j chi xak xuwi ta ne cäquichap ocok ri u chi' ri ratz'iak cumal ri yawabib; joropa' c'ut ri quechapowic quecunatajic.