Ri Matey 11 - Quiché Bible

Ri e u tako'n ri Xuan Bautist

¹ Ri Jesus, aretak xepixbetaj ri cablajuj u tijoxelab, xel bic chila' che u ya'ic tijonic pa tak q'ui tinimit.

² Ri Xuan, aretak c'o pa che', xuta' u tzijol ri u chac ri Crist; xebutak c'u bic ri u tijoxelab,

³ che u bixic che ri Jesus: “¿La lal ri' ri cäpe na, o cäkeyej chi na jun?”

⁴ Ri Jesus xubij chque: “Jix. Chiya' u tzijol che ri Xuan jas ri quito, jas ri quiwilo.

⁵ Ri moyab, queca'yic chic. Ri ch'ocojib quebin chic. Ri c'o ch'a'c chquij quecunatajic. Ri man queta'm taj, queta'm chic. Ri cäminakib quec'astajic. Chque ri mebayib cätzijox wi ri utzalaj tzijol.

⁶ Utz re ri man cuban ta quieb u c'u'x chwe.”

⁷ Aretak e benak chic ri u tijoxelab ri Xuan, ri Jesus xutzijoj ri Xuan chque ri winak: “¿Jas ri xixel bic che rilic pa ri chaki'j uwo sak? ¿La xiwila' jun aj ri cäslabisax rumal ri quiakik'?

⁸ ¿Jas c'ut ri xixel bic che rilic? ¿La xiwila' jun winak ri u cojom ch'uch'ujalaj tak atz'iak? Are c'u ri cäquicoj ch'uch'ujalaj tak atz'iak, pa tak cachoch ri ajawinelab e c'o wi.

⁹ ¿Jas c'u che xixel bic? ¿La xixbe che rilic jun k'axal tzij? Je, quincha chiwe, ri are nim na u banic chuwäch jun k'axal tzij.

¹⁰ Chrij we Xuan ri' are wa' ri cubij ri tz'ibatalic: ‘Chawilampe'. Quintak bic ri nu tako'n chawäch. Ri are cusuc'umaj na ri a be chawäch.’

¹¹ Kastzij quinbij chiwe, chi man c'o ta jun ri alam rumal jun ixok ri nim ta u banic chuwäch ri Xuan Bautist. Are c'u ri sibalaj ch'utin pa ri rajawibal ri Dios, are ri nim na u banic chuwäch ri Xuan.

¹² Kas pa tak ri u k'ijol ri Xuan Bautist c'ä camic, cäcoj chuk'ab che ri rajawibal ri Dios. E are c'ut ri cäquicoj c'u qui chuk'ab, caquitokij.

¹³ Conojel ri e k'axal tak tzij xukuje' ri pixab c'ä ruc' ri Xuan xquibij wi ri u tzij ri Dios chque ri winak.

¹⁴ We quiwaj c'ut quic'amo, are Eliy wa', ri xbixic chi cäpe na.

¹⁵ Apachin c'ut ri c'o u xiquin, chtatabenok.

¹⁶ ¿Jas c'u ruc' quinjunamaj wi ri winak ri e c'o camic? E junam cuc' ri ac'alab ri e t'uyul pa tak ri c'ayibal, quequich'abej ri cachil:

¹⁷ ‘Xkok'esaj su' chiwäch, man xixxojow ta c'ut. Xkabixoj u k'ojom cäminak, man xixok' ta c'ut.’

¹⁸ Xpe ri Xuan, ri man cäwa' taj, man cuq'uian taj. Cäbix c'ut: ‘C'o itzel uxlabal che.’

¹⁹ Xpe ri Rija'l winak, ri cäwa'ic, ri cuq'uianic. Cäbixic: ‘Chiwilampe'. Are jun ajwij xukuje' uq'uianel. Cachil tok'il tak alcabal. Cachil ajmaquib.’ Are c'u ri no'j cäk'alajisax cumal ri e u chac chi suc'.”

Ri tinimit ri man e nimanelab taj

²⁰ C'äte ri' ri Jesus xuchaplej qui yajic ri e tinimit jawije' ri e u banom wi q'ui nimak tak mayibal, rumal rech chi ri tinimit ri' man xquiq'uex ta qui c'u'x.

²¹ Ri Jesus xubij: “¡C'ax awe, tinimit Corazin! ¡C'ax awe, Betsaid! Ri nimak tak mayibal ri xinban iwuc' ix, we ta pa Tir, we ta pa Sidon xeban wi, ri e are ojer ta ri' xquiq'uex qui c'u'x. Rumal ri' xquicoj ta chaj xukuje' xquicoj ta wakwoj atz'iak ri' chquij.

²² Rumal ri' quinbij chiwe, chi ri c'äjisabal i wäch ix pa ri k'ij re ri k'atoj tzij, are nim na chuwäch ri que ri Tir, xukuje' ri Sidon.

²³ Are c'u ri at, tinimit Capernaum, ¿Ri at walijisam c'ä pa ri caj? Chupam ri nimalaj siwan catrokix wi na, we ta c'u pa Sodom xeban tak wi ri mayibal ri xeban tak awuc' c'ä c'o ta ri' ri Sodom camic.

²⁴ Rumal ri' quinbij chiwe, chi ri c'äjisabal i wäch ix pa ri k'ij re k'atoj tzij, are nim na chuwäch ri re ri Sodom.”

Tisaj wuc', chixuxlanok

²⁵ Pa ri k'ij ri' xch'aw ri Jesus, xubij: “Quink'ijilan che la, Tat, Rajaw caj ulew, chi xebec'u' la we jastak ri' chquiwäch ri c'o qui no'j xukuje' ri c'o qui ch'obobal, xebec'utinisaj c'u la chquiwäch ri ac'alab.

²⁶ Je, Tat, je c'u wa' xkaj chwäch la.

²⁷ Conojel ri jastak xejachtaj chwe rumal ri nu Tat. Man c'o ta jun kas etamaninak u wäch ri C'ojolaxel, xane' xak xuwi ri Tataxel. Man c'o ta jun kas etamaninak u wäch ri Tataxel, xane' xak xuwi ri C'ojolaxel xukuje' jachin tak ri craj wi ri C'ojolaxel u ya'ic retamaxic chque.

²⁸ Tisaj wuc', iwonojel ri ix cosinak, iwonojel ri c'o iweka'n. Quinya' c'u na uxlanem chiwe.

²⁹ Chic'amowaj ri weka'bal ri quinya' chiwij, chiwetamaj iwe wuc', chi in coch'onel xukuje' mach'al ri wanima'; quirik c'u na uxlanem che ri iwanima'.

³⁰ Are c'u ri weka'bal ch'uch'uj, ri weka'n man al taj.”