Ri Matey 1 - Quiché Bible

Ri ija'lil ri xpe wi ri Jesucrist

¹ Are wuj wa' ri cutzijoj ri ija'lil ri xpe wi ri Jesucrist, ri rija'lil ri David, rija'lil ri Abraham.

² Ri u c'ojol ri Abraham are' ri Isaac. Ri u c'ojol ri Isaac are' ri Jacob. Ri u c'ojol ri Jacob are' ri Juda, xukuje' ri e rachalal.

³ Ri e u c'ojol ri Juda are' ri Pares xukuje' ri Zar; ri qui nan are' ri Tamar. Ri u c'ojol ri Pares are' ri Esrom. Ri u c'ojol ri Esrom are' ri Aram.

⁴ Ri u c'ojol ri Aram are' ri Aminadab. Ri u c'ojol ri Aminadab are' ri Naason. Ri u c'ojol ri Naason are' ri Salmon.

⁵ Ri u c'ojol ri Salmon are' ri Booz; ri u nan ri Booz are' ri Rahab. Ri u c'ojol ri Booz are' ri Obed; ri u nan ri Obed are ri Rut. Ri u c'ojol ri Obed are' ri Isayi.

⁶ Ri u c'ojol ri Isayi are' ri ajawinel David. Ri u c'ojol ri David are' ri Salomon; ri u nan ri Salomon are' ri rixokil canok ri Uriy.

⁷ Ri u c'ojol ri Salomon are' ri Roboam. Ri u c'ojol ri Roboam are' ri Abiy. Ri u c'ojol ri Abiy are' ri As.

⁸ Ri u c'ojol ri As are' ri Josapat. Ri u c'ojol ri Josapat are' ri Joram. Ri u c'ojol ri Joram are' ri Uziy.

⁹ Ri u c'ojol ri Uziy are' ri Jotam. Ri u c'ojol ri Jotam are' ri Acaz. Ri u c'ojol ri Acaz are' ri Ezequiy.

¹⁰ Ri u c'ojol ri Ezequiy are' ri Manases. Ri u c'ojol ri Manases are' ri Amon. Ri u c'ojol ri Amon are' ri Josiy.

¹¹ Ri e u c'ojol ri Josiy are' ri Jeconiy, xukuje' ri e rachalal, pa ri k'ijol aretak xebek'axex ri aj Israel pa Babilon.

¹² Aretak bantajinak chic ri k'axetajem pa Babilon, ri u c'ojol ri Jeconiy are' ri Salatiel. Ri u c'ojol ri Salatiel are' ri Zorobabel.

¹³ Ri u c'ojol ri Zorobabel are' ri Abiud. Ri u c'ojol ri Abiud are' ri Eliaquim. Ri u c'ojol ri Eliaquim are' ri Azor.

¹⁴ Ri u c'ojol ri Azor are' ri Sadoc. Ri u c'ojol ri Sadoc are' ri Aquim. Ri u c'ojol ri Aquim are' ri Eliud.

¹⁵ Ri u c'ojol ri Eliud are' ri Eleazar. Ri u c'ojol ri Eleazar are' ri Matan. Ri u c'ojol ri Matan are' ri Jacob.

¹⁶ Ri u c'ojol ri Jacob are' ri Jose, ri rachajil ri Mariy, are' wa' ri u nan ri Jesus, ri cakabij Crist che.

¹⁷ Je c'u wa' conojel ri ija'lil ruc' ri Abraham c'ä ruc' ri David cajlajuj (14) ija'lil. Kas ruc' ri David c'ä pa ri k'axetajem pa Babilon cajlajuj (14) ija'lil. Kas ruc' ri k'axetajem pa Babilon c'ä ruc' ri Crist cajlajuj (14) ija'lil.

Xalax ri Jesucrist

¹⁸ Jewa' xc'ulmaxic aretak xalax ri Jesucrist: Ri Mariy, u nan ri Jesus, tz'onom chic che c'ulanem rumal ri Jose. Maja' c'u cäquirik quib aretak ri Mariy yawab winak chic rumal ri Ruxlabal ri Dios.

¹⁹ Ri Jose ri rachajil are jun suc'alaj achi. Man xraj taj xresaj u q'uixbal ri Mariy chquiwäch conojel ri winak. Xuchomaj c'ut cuya' canok chi c'uyal.

²⁰ Aretak ri Jose cätajin cuchomaj wa', xpe jun tako'n aj caj re ri Ajawaxel, xuc'ut rib chuwäch pa ichic', xubij: “Jose, rija'l ri David, maxe'j awib che u c'amic ri Mariy che awixokil. Rumal rech chi ri ral ri cäc'oji' na are rumal ri Ruxlabal ri Dios.

²¹ Ri Mariy cäc'oji' na jun ral ala. Jesus ri u bi' cacoj na. Jewa' ri u bi' rumal rech chi are cacolow na ri u tinimit ri c'o chupam ri qui mac.”

²² Ronojel wa' xc'ulmaxic rech cäbantajic jas ri u tzijom can ri Ajawaxel rumal ri k'axal tzij, ri xubij:

²³ “Ri k'apoj ali cux na yawab winak. Cäril na u wäch jun ral ala. Cucoj na Emanuel che u bi'.” Ri tzij Emanuel je quel cubij wa': “Ri Dios c'o kuc'.”

²⁴ Xc'astaj c'u ri Jose che ri waram, xubano jas ri xtak wi rumal ri tako'n aj caj re ri Ajawaxel. Xuc'am ri Mariy che rixokil.

²⁵ Ri Jose man xurik ta rib ruc' ri Mariy, c'ä xralaj na ri ral ala. Ri Jose xucoj “Jesus” che u bi'.