Ri Malaquiy 4 - Quiché Bible

Ri u petic ri u k'ij ri Ajawaxel

¹ Ri Ajawaxel ri c'o ronojel u cuinem je cubij wa: “Canakajin ri k'ij, ri canicowic jacha' jun jorno, ri quenicow wi na conojel ri caquiban nimal xukuje' ri e banal tak etzelal jacha' ri pajo chupam jun poro'n. Ri k'ij ri' ri cäpe na quebujarisaj na, man c'o ta c'u cacanaj na chque.

² Are c'u ri ix ri nim quiniwil wi, ri nu suq'uilal cajuluw na chiwe jacha' ta ne ri chaj ri cuya' ri k'ij, ri quebuc'am ulok rutzil wächaj chquipam tak ri e u tun. Are c'u ri ix quixch'opin na che quicotemal e jacha' ri alaj tak ama'ib wacax ri quebel ulok chupam ri qui warabal.

³ Pa ri k'ij ri' ri cätajin quinsuc'umaj, ri ix quebitac'alej na ri e banal tak etzelal jacha' ta ne chi e puc'uc' ulew.

⁴ Chnataj ri pixab chiwe ri xinya' che ri pataninel wech ri Moises puwi' ri juyub Horeb. ¡E pixab ri e banom xukuje' tak takanic ri rajawaxic chi ronojel Israel quebunimaj!

⁵ Chiwila' ix: Quintak bic ri k'axal nu tzij chiwe ri Eliy, c'a majok chopan ri u k'ij ri Ajawaxel, ri cux na jun nimalaj k'ij xukuje' xibibal.

⁶ Cuban c'u na ri are' chi ri tataxelab xukuje' ri alc'ualaxelab quebutzir na, quequich'abela' na quib. We ta c'u mat jewa' quinpe na quinc'äjisaj c'u na u wäch ri culew, quinsachisaj c'u na u wäch chnimalaj ronojel.”