Ri Malaquiy 2 - Quiché Bible

Ri e cojol tabal tak tok'ob rajawaxic u nimaxic ri Dios cumal

¹ “Camic, ix cojol tabal tak tok'ob, are iwech wa':

² Ri ix quixniman na chwe rajawaxic c'ut chi quixoc na il chi nim quiniwil wi na, we man quibano, in quixinc'okoj na. U mac c'u rech chi man ix oquinak ta il chi man nim ta quiniwil wi in quinban na chiwe chi quixux c'okobal xukuje' ne ri utzil ri quiriko chi ix cojol tabal tok'ob.” Are' cäbin ri Ajawaxel ri c'o ronojel u cuinem.

³ “Quenwesaj ri takanic pa i k'ab quenq'uiaka' ri qui mes ri awaj chi palaj ri quebic'am ulok che tabal tak tok'ob. ¡Junam c'ut xukuje' ruc' ri qui mes ri awaj, xukuje' ri ix quixmes na bic!

⁴ Jeri' quiwetamaj na chi in in yowinak we takomal ri' chiwe rech co cäc'oji' ri nu c'ulwächinic ruc' ri Levi.” Are cabin ri Ajawaxel ri c'o ronojel u cuinem.

⁵ “Ri nu c'ulwächinic c'aslemal xukuje' jamaril che ri Levi. Xebenya' che rech cuya' nu k'ij xukuje' chuna' ta rib chnuwäch, ri are' xuc'ut chnuwäch chi xuna' rib xukuje' chi nim xinril wi.

⁶ Ri Levi are xutijoj ri kastzij, man xc'oji' ta c'u etzelal pa u chi'. Xjeki' pa jicalaj jamaril wuc' e q'ui c'ut ri xebuk'il che u banic ri etzelal.

⁷ Are wa' ri takal u banic cumal ri e cojol tabal tak tok'ob ri quitijoxic ri winak rech caquetamaj nu wäch, conojel c'ut rajawaxic quebetzucun chque che u c'amic tijonic, e are' tak c'ut ri e u tako'n ri Ajawaxel ri c'o ronojel u cuinem.

⁸ Are c'u ri ix, ri ix cojol tabal tak tok'ob, i jaluch'um iwib i yo'm can ri utzalaj be; cumal tak ri e i tijonic i banom chque q'ui winak chi e tzakinak. Jeri' ri ix i q'uexom ri nu c'ulwächinic ri xinban ruc' ri Levi.

⁹ Rumal ri', rumal rech chi man e nimaninak ta chwe xukuje' chi xak c'u u wi' chic, aretak quetijon chque ri winak man junam ta caquiban chque conojel, in quinban na chi ronojel ri tinimit itzel che il cumal chetzelex c'u qui wäch cumal.” Are' cabin ri Ajawaxel ri c'o ronojel u cuinem.

Ri man u jiquil taj ri Israel

¹⁰ ¿La ma ta xa' jun ka Tat, ri are' ri Dios ri konojel uj u winakirisam? ¿Jas ta c'u che, cakasubula' tak kib, xeboc'ow c'ut puwi' ri c'ulwächinic ri xuban ri Dios cuc' ri e ka mam?

¹¹ Ri Juda man jic taj xbin chuwäch ri Dios, queban c'u xibibalalaj tak jastak pa Jerusalen xukuje' pa Israel. Ri Juda rawasim ri u tastajic ri rachoch Dios ri lok' chuwäch ri Ajawaxel, e are tak c'ut ri achijab aj Juda e qui c'amom tak ixokib che quixokil ri quequik'ijilaj tak diosib ri e subunelab.

¹² ¡C'o ta banom wi chi ri Ajawaxel cusachisaj ta qui wäch ri je tak caquiban wa' pa ri nim ka tinimit, e apachin tak ta ne pune' ta c'u ne quequic'am ulok tak sipanic che ri Ajawaxel ri c'o ronojel u cuinem!

¹³ Are c'u ri ix c'o chi na jubik' u wi ri qui bano: quich'akakisaj ri porobal ri rech ri Ajawaxel cuc' tak ri u wa'l tak i wäch, quixjuyuw c'u ruc' nimalaj ok'ej rumal rech chi ri Ajawaxel man quebuc'amowaj ta chic ri e i sipanic ruc' ronojel ranima'.

¹⁴ ¿La c'ä quixc'otow c'u chi'aj ix jasche? Rumal c'u rech chi ri Ajawaxel are' k'alajisanel chi ri at man a tz'akatisam taj ri chi'nic ri xaban che ri awixokil ri xat c'uli' ruc' aretak c'ä at ac'al. ¡Are' c'u awachil canok, a re c'u ri at xachi'j jiquil che!

¹⁵ ¿La ma ta pu xa' junam Dios ri xbanow ri cuerp xukuje' ri uxlabal? ¿Jas c'ut ri sibalaj coc wi il we Dios ri' chi curiko xane' e ija'lil ri chquitasa' quib che? ¡Chichajij ba' ix, ri kas iwuxlabal, c'u ma ta chi tz'akatisaj ri chi'nic ri xiban che ri iwixokil re ri i c'ojolal!

¹⁶ Ri Ajawaxel re Israel ri c'o ronojel u cuinem, je cubij wa': “¡Chichajij ba', ri iwuxlabal, mixux c'u ma ta ix jic; are c'u ri in quinwetzelaj u wäch ri cuban wuj che u jachic bic ri rixokil cuxok'olej c'u rib aretak cuban we etzelal ri'!”

Ri k'ij re ri k'atan tzij

¹⁷ Ri Ajawaxel cosinak chic che i tatabexic; c'ä qui ban c'ut ix ri c'otoj chi'aj: “¿Jas ri ka bim chi cosinak che ka tatabexic?” Are' c'u ri ix i bim chi ri Ajawaxel quekaj chuwäch chi quequiban tak ri etzelal, chi xukuje' caquicot cuc'. ¡Ri ix man quixcojon taj chi suc' ri Dios!