Ri Malaquiy 1 - Quiché Bible

Ri u lok'ok'ebal c'u'x ri Dios che ri Israel

¹ Are wa' tzijol ri xuya' u bixic ri Ajawaxel che ri tinimit Israel rumal ri Malaquiy ri k'axal tzij.

² Ri Ajawaxel jewa' cubij: “In quixinlok'ok'ej.” Are c'u ri ix quitzelej u bixic: “¿Jas cakaban che retamaxic chi cujulok'ok'ej la?” Ri Ajawaxel cutzelej u bixic: “In quixinlok'ok'ej rumal rech chi, cachalal c'u quib ri Esau xukuje' ri Jacob, xinlok'ok'ej ri Jacob,

³ xinwetzelaj c'u u wäch ri Esau. Are c'u ri rulew ri Esau, ri c'ache'laj, xinjalwächij pa jun chaki'j juyub, e are c'u tak ri e rechbal pa ulew ri xuwi utz chque juyubal tak awaj.”

⁴ We ta ri aj edomib, ri e rija'lil ri Esau, je ta caquibij wa': “Uj yojyobisam, cakaban c'u na u banic ri ka nim tinimit”, ri Ajawaxel ri c'o ronojel u cuinem cutzelej ta na u bixic: “Ri e are' quequiban na u banic, are c'u ri in quenwetzelaj chi na jumul. Ri qui ulew cabinax na ‘Ulew re etzelal’ xukuje' ‘Nim Tinimit re junalic royowarem ri Ajawaxel’.”

⁵ Ri ix quiwil na cuc' ri kas e i bak'wäch, quibij c'u na: “¡Chnimarisax u k'ij ri Ajawaxel c'ä je la chque ri e u c'ulbatil ri Israel!”

Ri Ajawaxel cutzelej c'u na u bixic chque ri e cojol tabal tok'ob

⁶ Ri Ajawaxel ri c'o ronojel u cuinem cubij chque ri e cojol tabal tok'ob: “Ri alc'ualaxelab nim chequila' ri qui tat qui nan, e are' c'u ri pataninelab nim chequila' wi ri e cajaw. We c'u ri in in i Tat, ¿Jas che ri ix man nim ta quiniwilo? We in Iwajaw, ¿Jasche man nim ta quiniwil wi? Ix quiwetzelaj nu wäch, c'ä quibij c'ut: ‘¿Jas ri ketzelam wi wäch la?’

⁷ Ri ix quebilicojo' wa puwi' ri nu porobal ri wech ri man ya'tal ta u c'amic ulok, c'ä quixc'otow c'u ne chi'aj: ‘¿Jas ri cakac'axc'obisaj wi la?’ Ri ix quinic'axc'obisaj aretak qui chomaj chi ri nu porobal ri wech cuya' man nim ta quil wi.

⁸ Chi man awas ta c'ut we quechi'x tak awaj chnuwäch moyab ch'oco'yib o yawabib.” ¡Jix ba', chebic'ama' bic chque ri e i k'atal tak tzij! ¡Chiwila' c'ut we quequic'am ri sipanic ruc' ronojel canima'!

⁹ Chitz'onoj ba ix che ri Dios chi chutok'obisala' ka wäch. We c'u je u wäch sipanic wa' quiban che, miweyej chi ri Dios quixuc'amowaj ruc' ronojel ranima'. Ri Ajawaxel ri c'o ronojel u cuinem je cubij wa':

¹⁰ “¡C'o ta banom wi chi c'o ta jun chiwe chi quebutz'apijtaj ri e u chi' ri wachoch, rech ma ta xak lok' caquitzij chic ri k'ak' re ri porobal ri wech! Man quinquicot ta c'ut iwuc' mawi quebentakej ta qui c'amowaxic tak ri e i sipanic.

¹¹ Pa conojel ri nimak tak tinimit re ri uwächulew nim quinil wi; pa ronojel c'olbal caporox c'oc' tak k'ol che u ya'ic nu k'ij queya' c'u tak sipanic chwe ri e takalic.

¹² Are' c'u ri ix, quinic'axc'obisaj, are c'u pa i c'u'x chi ri nu porobal, ri are nu mexa, cuya' man nim ta quil wi, xukuje' chi man nim ta quil wi ri wa ri c'o puwi'.

¹³ Ri ix je quibij wa': ‘¡Uj k'itajinak chic che ronojel wa'!’ Quiwetzelaj c'u nu wäch. Kas c'u are na pa i c'u'x chi quinequicotok aretak quixpe che u chi'xic jun eläk'am awaj chwe, o jun wacax ch'oco'j o yawab.

¹⁴ ¡C'okotajinak ri cojol c'amibal ri cuchi'j jun awaj ri man c'o ta u yab ri c'o chuxo'l ri u jumulaj cupil c'ut jun chwe ri c'o u yab! In ri' ri Ajawaxel ri nim nu k'ij, in c'u xibibal chquixo'l ri nimak tak tinimit.” Are wa' ri cubij ri Ajawaxel ri c'o ronojel u cuinem.