Ri Lucax 8 - Quiché Bible

Ri chuchuyib ri xquito' ri Jesus

¹ Aretak bantajinak chi wa', ri Jesus quebusolij conojel ri tinimit xukuje' ri alaj tak tinimit. Cutzijoj xukuje' cuk'alajisaj ri utzalaj tzij re ri rajawibal ri Dios, e rachilam c'u ri cablajuj.

² Xukuje' e rachilam jujun chuchuyib ri e utzirisam chque ri itzel tak uxlabal, chque ri qui yab. E are' ri Mariy Magdalen, ri esam wukub itzel tak uxlabal che,

³ ri Xua'n rixokil ri Cuz, ri cätakan paquiwi' ri jastak rech ri Herod, ri Susan, cuc' niq'uiaj ixokib chic ri cäquicoj ri jastak quech che u patanixic ri Jesus xukuje' ri u tijoxelab.

Ri c'ambal no'j chrij ri ticonijel

⁴ Xquimulij quib sibalaj q'ui winak. Xebel ulok pa tak ri tinimit, xebopan ruc' ri Jesus. Ri Jesus xebutzijobej pa jun c'ambal no'j:

⁵ “Jun ticonijel xel bic che u tiquic rija'. Aretak xjopinic, xkaj jubik' ri ija' pa ri be, xtac'alexic. Xepe c'u ri chicop aj uwo caj, xquitij bic.

⁶ Jubik' chic xkaj pa tak abaj. Xel ulok, xbayuk'ar c'ut, rumal rech chi man c'o ta u räxil ri ulew.

⁷ Jubik' chic ija' xkaj chquixo'l ri q'uix. Xel ulok junam cuc' ri q'uix, xjik'isax c'u cumal.

⁸ Jubik' chic xkaj pa ri utzalaj ulew. Xq'uiyic, chquijujunal c'ut xquiya' jujun tak sient qui wächinic.” Aretak xbitaj wa' rumal, co xch'awic, xubij: “apachin ri c'o u xiquin che u tatabexic, chutatabej.”

Ri Jesus xebutzijobej ri winak pa c'ambal tak no'j

⁹ Ri e u tijoxelab xquic'ot u chi' ri Jesus jas quel cubij we c'ambal no'j ri'.

¹⁰ Ri Jesus xubij chque: “Yo'm chiwe ix ri u ch'obic ri jastak re ri rajawibal ri Dios ri man e betamatal ta can nabe. Cäbix c'u we jastak ri' chque ri niq'uiaj winak chic pa c'ambal tak no'j, rech pune' ta ne queca'yic, man queilon taj, pune' ta ne quetanic, man quech'obon taj.”

Ri Jesus xubij jas quel cubij ri c'ambal no'j chrij ri ticonijel

¹¹ “Are c'u wa' ri quel cubij ri c'ambal no'j: Ri ija' are cuq'uexwächij ri tijonic ri cuya' ri Dios.

¹² Ri ija' ri xkaj pa ri be, are cuq'uexwächij ri winak ri cäquita' ri tzij, cäpe c'u ri itzel che resaxic ri tzij pa canima', rech man quecojon taj, man quecolotaj ta c'ut.

¹³ Ri ija' ri xkaj pa tak ri abaj, are cuq'uexwächij ri winak ri cäquita' ri tzij, cäquic'am ruc' quicotemal. Man c'o ta c'u qui c'amal benak pa ulew, xa' quieb oxib k'ij quecojonic. Aretak cäpe c'ambejebal, quetzelej chquij.

¹⁴ Ri ija' ri xkaj pa tak ri q'uix, are wa' ri winak ri cäquita' ri tzij. Are c'u queboc na il chque ri jastak aj uwächulew, benak qui c'u'x ruc' ri k'inomal xukuje' ri quicotemal aj uwächulew, quejik'isax c'u cumal. Man c'u quewächin taj.

¹⁵ Ri ija' ri xkaj pa ri utzalaj ulew, are cuq'uexwächij ri winak ri cäquita' ri tzij, cäquicoj ruc' ronojel canima'. Ri e are' cäquik'i ronojel u wäch c'ax, quewächin ruc' coch'onic.”

Ri c'ambal no'j chrij ri chäj

¹⁶ “Man c'o ta jun ri cutzij jun chäj, cuch'uk ta c'u ruc' jun subal o cuya' ta chuxe' ri ch'at. Xane' cuya' puwi' jun tzuc'ulibal, rech quilitaj ri u sakil cumal ri winak ri queboc pa ri ja.

¹⁷ Conojel ri jastak ri e c'utalic, quek'alajisax na. Conojel ri jastak ri e awatalic, quebel na chi sak rech quetamaxic.

¹⁸ Chiwila' ba' jas ri quiban che u tatabexic ri nu tzij. Apachin ri c'o jas c'o ruc', cäya' chi na niq'uiaj che. Apachin c'u ri man c'o ta c'o ruc', xukuje' ne ri cuchomaj chi c'o jas c'o ruc', quesax na che.”

Ri u nan xukuje' ri e rachalal ri Jesus

¹⁹ Xopan ri u nan ri Jesus xukuje' ri e rachalal jawije' ri c'o wi. Man quecuin ta c'ut quekeb ruc', rumal rech chi e q'ui ri winak e c'olic.

²⁰ Xbix c'u che ri Jesus: “Ri a nan e rachil ri e awachalal e tac'atoj apan cho ja, cäcaj caquil a wäch.”

²¹ Ri are' xubij chque: “Ri nu nan xukuje' ri e wachalal e are ri' ri cäquita' ri u tzij ri Dios, caquiban c'ut ri cubij.”

Ri Jesus xtakan puwi' ri quiakik' xukuje' ri cho

²² Pa jun chque ri k'ij, ri Jesus xoc pa jun jucub e rachilam ri u tijoxelab, xubij chque: “Chujk'ax ch'akäp che ri cho.” Xebel c'u bic.

²³ Aretak e benak puwi' ri cho, ri Jesus xc'amtaj che waram. Xpe jun nimalaj quiakik' puwi' ri cho, xnoj ri jucub che ja', xak quieb cubij chi paquiwi'.

²⁴ Xekeb ruc' ri Jesus, xquic'asuj, xquibij: “¡Kajtij, Kajtij, cäsach ka wäch!” Aretak xc'astajic, xuyaj ri quiakik', xuyaj ri u k'et ri ja'. Xetänic, ri c'ax xelilobic c'ut.

²⁵ Xubij chque ri u tijoxelab: “¿Jawije' c'o wi ri i cojonic? Xquixe'j quib, xquimayo, xquibila' chquixo'l: ¿Jachin lo wa', chi cutak ri quiakik', ri ja', cäquinimaj c'u ri u tzij?”

Jun achi e c'o itzel tak uxlabal che

²⁶ Aretak xek'ax ch'käp che ri cho, xebopan pa ri culew ri aj Jeras, ri c'o apan chuwäch ri Galiley.

²⁷ Aretak ri Jesus xel pa ri jucub, xel ulok pa ri tinimit jun achi che u c'ulaxic, ri e c'o itzel tak uxlabal che. Q'ui junab chic e c'o ri itzel tak uxlabal che, man cucoj ta ratz'iak, mawi cäjeki' cho rachoch, xane' chquixo'l ri mukubal cäc'oji' wi.

²⁸ Ri achi, aretak xril apan ri Jesus, xurak u chi', xutzak rib cho ri ulew chuwäch, xubij ruc' nimalaj chuk'ab: “¿Jas awe chwe, Jesus, u C'ojol ri Dios aj chicaj? Catinbochi'j chi maban c'ax chwe.”

²⁹ Xubij wa' rumal rech chi ri Jesus xutak ri itzel uxlabal chi chel bic che ri achi. Q'ui mul c'ut c'o ri u cuinem ri itzel uxlabal puwi' ri achi. Pune' cäxim cuc' tikom tak ch'ich', ruc' chapbal akanaj, ri achi quebut'okopij wa', quel bic, cäc'am bic rumal ri itzel uxlabal pa tak chaki'j uwo sak.

³⁰ Ri Jesus xuta' che, xubij: “¿Jas ri a bi'?” Ri are' xubij: “Sibalaj Uj Q'ui ri nu bi'.” Xubij wa' rumal rech chi e q'ui ri itzel tak uxlabal e c'o che.

³¹ Ri itzel tak uxlabal xquibochi'j ri Jesus chi mebutak bic pa ri k'ekumalaj c'olbal.

³² C'o c'u jumulaj ak chila', cätajin queyuk'ux pa ri juyub, e q'ui c'ut. Ri itzel tak uxlabal xquibochi'j ri Jesus rech cuya' c'olbal chque chi queboc chquipam tak ri ak. Xuya' c'u chque.

³³ Xebel c'u bic ri itzel tak uxlabal che ri achi, xeboc chquipam tak ri ak. Ri jumulaj ak xquiq'uiak bic quib tza'm tak ri tanatak, xetzak bic pa ri cho, xejik'ic.

³⁴ Ri ajyuk'ab, aretak xquil ri xc'ulmatajic, xebanimajic, xequiya' u tzijoxic pa ri tinimit xukuje' pa tak ri juyub.

³⁵ Xebel ulok ri winak che rilic ri xc'ulmaxic. Xebopan ruc' ri Jesus. Xequirika' ri achi ri xebel wi ri itzel tak uxlabal, u cojom chi ratz'iak, utz chi u chomanic, t'uyul chuwäch ri Jesus. Aretak xquilo, xquixe'j quib.

³⁶ Ri winak ri xquil ri xbantajic, xquiya' u tzijol chque ri niq'uiaj chic, jas xuban ri achi ri xec'oji' ri itzel tak uxlabal che, xto'tajic.

³⁷ Are c'u ri q'ui winak ri e jekel chrij ri culew ri aj Jeras, xquibochi'j ri Jesus rech quel bic chquixo'l, rumal rech chi sibalaj xquixe'j quib. Xoc c'u ri Jesus pa jun jucub, xtzelejic.

³⁸ Ri achi ri xebel wi ri itzel tak uxlabal, xubochi'j ri Jesus chi cuya' che chi cäbe ruc'. Ri Jesus c'ut xujach bic, xubij:

³⁹ “Chattzelej cho awachoch, chatzijoj ronojel ri xuban ri Dios chawe.” Ri are' xel bic, xresaj u tzijoxic pa ronojel ri tinimit, ronojel ri xuban ri Jesus che.

Ri u mia'l ri Jair, xukuje' ri ixok ri xunak ocok ri ratz'iak ri Jesus

⁴⁰ Aretak xtzelej bic ri Jesus, xc'ulax ruc' quicotemal cumal q'ui winak, conojel c'ut queyem.

⁴¹ Te c'u ri' xpe jun achi Jair u bi', are qui nimal ri winak pa ri ja ri cäquitijoj wi quib ri aj judeyib che ri pixab. Ri are' xxuqui' chuwäch ri Jesus, xubochi'j chi chopan pa ri rachoch.

⁴² Xa' c'u jun u mia'l c'olic, cäraj cablajuj u junab, xa' jubik' man quel ranima'. Benak c'u ri Jesus, cäpitz' cumal ri q'uialaj winak.

⁴³ Xpe c'u jun ixok, c'o chi cablajuj junab xak quel u quiq'uel. Man c'o ta jun cuininak ta che u cunaxic.

⁴⁴ Ri are' xkeb chrij ri Jesus, xunak ocok ri u chi' ri u k'u'. Chanim xtäni' ri u quiq'uel ri quelic.

⁴⁵ Xubij c'u ri Jesus: “¿Jachin ri' ri xinnakowic?” Conojel c'ut xquibij chi man quinakomtaj. Xubij ri Lu' xukuje' ri e rachil: “Kajtij, ri q'uialaj winak ri quepitz'on la, quepakchi'n la pa ronojel c'olbal.”

⁴⁶ Ri Jesus xubij: “C'o jun ri xinunako. Xinna' c'ut chi xel chuk'ab chwe.”

⁴⁷ C'äte ri' ri ixok, aretak xrilo chi xetamatajic, xpetic cäbirbitic, xutzak rib cho ri ulew chuwäch ri Jesus. Xuk'alajisaj chquiwäch conojel ri winak jasche xunak ocok ri Jesus, xubij chi rumal ri' chanim xcunatajic.

⁴⁸ Ri Jesus xubij che: “Nu mia'l, xatto'taj rumal ri a cojonic. Jät ruc' jamaril.”

⁴⁹ C'ä cätajin cätzijonic, xpe jun aj uwo rachoch ri Jair, ri cätakan pa ri ja ri caquitijo wi' quib ri aj judeyib. Ri jun aj uwo rachoch ri Jair xubij che: “Ri mia'l la xcämic. Maya' chi la latz' che ri Ajtij.”

⁵⁰ Aretak xuta' wa' ri Jesus, xch'awic, xubij che ri Jair: “Maxe'j awib. Xuwi chatcojonok. Ri a mia'l cäto'taj c'u na.”

⁵¹ Aretak xoc pa ja, man xraj ta ri Jesus chi c'o jun chic coc bic ruc', xane' xuwi ri Lu', ri Santiag, ri Xuan xukuje' ri u tat u nan ri ali.

⁵² Conojel ri e c'o chila' cäquiq'uis quib che ok'ej. Ri Jesus xubij: “Mixok' chic. Ri ali man cäminak taj, xa' cäwaric.”

⁵³ Ri winak xquitze'j u wäch. Queta'm c'ut chi cäminak chic.

⁵⁴ Ri Jesus xuc'am ri u k'ab ri ali, co xubij: “Ali, chatwalijok.”

⁵⁵ C'äte ri' xtzelej ulok ri ranima'. Chanim xwalijic. Ri Jesus xtakan c'u che u ya'ic u wa ri ali.

⁵⁶ Ri u tat u nan ri ali xquimayo. Ri Jesus c'ut xebutako chi c'o mäquibij wi jas ri xc'ulmaxic.