Ri Lucax 5 - Quiché Bible

Xequichap q'uialaj cär

¹ Aretak ri Jesus tac'al chuchi' ri cho re Galiley, xebopan q'ui winak ruc', cäpitz' c'u cumal ri q'uialaj winak che u tatabexic ri u tzij ri Dios.

² Ri Jesus xeril quieb jucub ri e c'o chuchi' ri cho. Ebelinak ulok ri chapal tak cär pa ri jucub che u ch'ajic tak ri qui c'at.

³ Xoc c'u ri Jesus pa jun chque ri jucub, ri rech ri Simon. Xubochi'j chi chukebisaj jubik' che ri ulew. Xt'uyic, xebutijoj ulok ri winak pa ri jucub.

⁴ Aretak xutanaba' ri u tzijonic, xubij che ri Simon: “Chakebisaj ri jucub pa ri u choil cho, chikasaj ri i c'at che qui chapic cär.”

⁵ Ri Simon xubij che: “Kajtij, xujchacun ronojel ri jun ak'ab, man c'o ta c'u ka chapom. We c'u jeri' cäbij la, pa ri tzij ba' la quinkasaj ri c'at.”

⁶ Aretak xquiban wa', sibalaj e q'ui ri cär xeboc chupam ri qui c'at, chi quet'okopitaj ri c'at.

⁷ Xequisiq'uij apan ri cachil ri e c'o pa ri jun jucub chic, rech quebopan che qui to'ic. Xepetic, xequinojisaj ri quieb jucub, jeri' chi xa' jubik' man quebik'tajic.

⁸ Ri Simon Lu', aretak xrilo, xutzak rib cho ri ulew chuwäch ri Jesus, xubij: “Tasa' ib la chwe, Wajaw, in c'u ajmac.”

⁹ Xumay c'u ri Lu' xukuje' conojel ri e rachil, xquixe'j quib, rumal rech ri jumulaj cär ri xequichapo.

¹⁰ Xukuje' xumay ri Santiag xukuje' ri Xuan ri e u c'ojol ri Zebedey, ri e rachil ri Simon. Ri Jesus xubij che ri Simon: “Maxe'j awib. Kas camic cachaplej qui cäraxic winak.”

¹¹ Aretak xesataj ulok ri jucub cho ri ulew, xquiya' can ronojel, xquiterenej ri Jesus.

Ri Jesus xucunaj jun achi c'o ch'a'c chrij

¹² Aretak c'o ri Jesus pa jun chque ri tinimit, c'o c'u jun achi chila', sibalaj yawab che ch'a'c. Aretak ri are' xril ri Jesus, xxuquic, xukasaj ri u palaj cho ri ulew. Xubochi'j ri Jesus, xubij che: “Ajawaxel, we caj la, cäcuin la che nu josk'ixic.”

¹³ Ri Jesus xuyuk ri u k'ab, xunak ocok, xubij: “Quinwaj, chatjosk'itajok.” Chanim c'ut xel ri ch'a'c che.

¹⁴ Ri Jesus xuya' takanic che ri achi: “C'o jun mabij wi xcha' che. Xubij che. Jät, chac'utu' awib chuwäch ri cojol tabal tok'ob. Chaya' ri sipanic ri xtakan wi ri Moises che k'alajisanic chquiwäch chi at sak chic.”

¹⁵ Xesax c'u u tzijoxic ri Jesus pa ronojel c'olbal. Rumal ri' cäquimulij quib q'uialaj winak che u tatabexic ri u tzij xukuje' che qui cunaxic chque tak ri qui yab.

¹⁶ Are c'u ri Jesus cäbe pa tak c'olbal pa ri chaki'j uwo sak che u banic ch'awem ruc' Dios jawije' man c'o ta wi winak.

Ri Jesus xucunaj jun ri cäminak u cuerp

¹⁷ Pa jun k'ij, aretak ri Jesus cätajin quebutijoj ri winak, e t'uyut'oj c'u ri pariseyib chila' xukuje' ajtijab re ri pixab, ri e petinak pa conojel alaj tak tinimit re Galiley, re Judey xukuje' pa Jerusalen. Are c'u ri u cuinem ri Ajawaxel c'o ruc' ri Jesus che cunanic.

¹⁸ Xepe c'u jujun achijab cuc'am jun achi cäminak u cuerp, k'oyol cho jun pop. Ri achijab cäquitzucuj u cojic bic ri achi chuwäch ri Jesus chupam ri ja.

¹⁹ Man xquirik ta c'ut jawije' cäquicoj wi bic, rumal rech chi e q'ui ri winak e c'olic. Xepaki' c'u puwi' ri ja, xquikasaj bic puwi' ri u xotil ri ja ruc' ri pop pa qui niq'uiajil conojel, chuwäch ri Jesus.

²⁰ Aretak ri Jesus xrilo ri qui cojonic ri achijab, xubij: “Achi, ri a mac quesachtajic.”

²¹ C'äte c'u ri' ri ajtijab re ri pixab xukuje' ri pariseyib xquichaplej chomanic pa canima', xquibij: “¿Jachin wa', ri cuc'ulelaj ri Dios? ¿Jachin ta ri cäcuin che u sachic mac, xane' xuwi ri Dios?”

²² Ri Jesus reta'm ri qui chomanic, xubij chque: “¿Jasche je quichomaj wa' pa ri iwanima'?

²³ ¿Jachique c'ut ri man c'ax ta u bixic: ‘Ri a mac quesachtajic’, o ri u bixic: ‘Chatwalijok, chatbinok’?

²⁴ Quinc'ut c'u na chiwäch chi ri Rija'l Winak c'o takanic pa u k'ab che u sachic qui mac ri winak cho ri uwächulew.” Xubij c'u che ri cäminak u cuerp: “Quinbij chawe, chatwalijok, chawalijisaj ri a pop, jät cho awachoch.”

²⁵ Chanim xwalij ri achi chquiwäch, xuwalijisaj ri u pop ri k'oyol wi, xbe cho rachoch, xunimarisaj u k'ij ri Dios.

²⁶ Conojel xquimayo, xquinimarisaj u k'ij ri Dios. Xenoj che xe'n ib, xquibij: “Camic kilom mayibal tak jastak.”

Ri Jesus xusiq'uij ri Levi rech cäterenex rumal

²⁷ E bantajinak chi c'u wa', xel bic ri Jesus, xril jun tok'il alcabal, Levi u bi', t'uyul jawije' cätoj wi ri alcabal. Ri Jesus xubij che: “Chinaterenej.”

²⁸ Ri Levi xuya' can ronojel, xwalijic, xuterenej bic ri Jesus.

²⁹ Ri Levi xuban jun nimalaj ula'nic che ri Jesus cho rachoch. E c'o q'ui tok'il tak alcabal xukuje' niq'uiaj winak chic ri e c'o pa ri mexa cuc'.

³⁰ Ri pariseyib cuc' ri ajtijab re ri pixab xech'ach'at chquij ri u tijoxelab ri Jesus, xequichaplej qui c'ulelaxic, xquibij chque: “¿Jasche quixwa'ic, quixuq'uian cuc' tok'il tak alcabal xukuje' cuc' ajmaquib?”

³¹ Ri Jesus xubij chque: “Ri man e yawabib taj, man rajawaxic ta cunal quech, xane' ri c'o yabil chque.

³² Man in petinak ta che qui siq'uixic suc'alaj tak winak. Xane' in petinak che qui siq'uixic ajmaquib, rech cäquiq'uex qui c'u'x.”

Ri man u tijowic ta ri wa

³³ Xquibij c'u che: “Ri u tijoxelab ri Xuan xukuje' ri quech ri pariseyib q'ui mul man cäquitij ta qui wa xukuje' q'ui mul cäquiban ch'awem ruc' Dios. E are c'u ri a tijoxelab quewa'ic, quebuq'uian amak'el.”

³⁴ Ri Jesus xubij chque: “Ri winak ri e c'o pa c'ulanem, ¿la cuya' man quewa' taj aretak c'ä c'o ri achajilaxel cuc'?

³⁵ Quepe c'u na k'ij aretak quesax ri achajilaxel chquixo'l. C'äte c'u ri' man quewa' ta na.”

³⁶ Xukuje' xubij jun c'ambal no'j chque: “Man c'o ta jun cucoj jun c'ac' atz'iak che u c'ojoxic jun k'e'l atz'iak. We jeri', ri c'ac' cutek'tobisaj ri' ri k'e'l. Xukuje' ri c'ojbal ri esam che ri c'ac' atz'iak, man cuc'ulajij ta ri' ri k'e'l.

³⁷ Xukuje' man c'o ta jun cuya' c'ac' u wa'l uva pa k'e'l tak tz'um. We ta jeri', ri c'ac' u wa'l uva quebut'ubij ri' ri tz'um, cätix c'u ri' ri u wa'l uva, quebetzeletaj ri' ri tz'um.

³⁸ Are ri c'ac' u wa'l uva rajawaxic cäya' pa c'ac' tak tz'um.

³⁹ Man c'o ta jun cäraj ri c'ac' u wa'l uva aretak u tijom chi re ri u wa'l uva ri k'obisam. Cubij c'ut: ‘Are utz na ri k'obisam u wa'l uva.’ ”