Ri Lucax 4 - Quiché Bible

Ri Jesus xtakchi'x che macaj

¹ Ri Jesus, nojinak che ri Ruxlabal ri Dios, xel bic pa ri nima' Jordan, xtzelejic. Xc'am bic rumal ri Uxlabaxel pa ri chaki'j uwo sak.

² Cawinak k'ij xc'oji' chila', xtakchi'x c'u che mac rumal ri itzel. Man xwitaj pa tak ri k'ij ri'. Xpe c'ut u numic.

³ Xubij ri itzel che: “We at u C'ojol ri Dios, chabij che we abaj ri' chi chux caxlanwa.”

⁴ Ri Jesus xubij che: “Tz'ibatalic: ‘Man xuwi ta rumal ri wa cac'asi' ri winak, xane' rumal ronojel ri u tzij ri Dios.’ ”

⁵ Xc'am c'u bic puwi' jun nimalaj juyub rumal ri itzel. Ri itzel xa' pa jok'otaj xebuc'ut conojel ri ajawibal chuwäch ri e c'o cho ri uwächulew.

⁶ Xubij c'u ri itzel che: “Quebenya' conojel ri takanic pa a k'ab, quinya' ronojel ri qui juluwem chawe. E jachom chwe in, quebenya' che jachin ri quinwaj quinya' wi.”

⁷ We c'u quinak'ijilaj, quinya' ronojel chawe.

⁸ Ri Jesus xubij che: “Chatel chnuwäch, Satanas. Tz'ibatal c'ut: ‘Are cak'ijilaj na ri Ajawaxel a Dios. Xuwi capatanij ri are'.’ ”

⁹ Ri itzel xuc'am bic ri Jesus pa Jerusalen, xutac'aba' puwi' ri kas u chicajil ri rachoch Dios, xubij che: “We at u C'ojol ri Dios, chaq'uiaka' bic awib waral c'ä iquim.

¹⁰ Tz'ibatal c'ut: ‘Cuya' na takanic chque ri e u tako'nib aj caj chawij, che a chajixic.

¹¹ Catcuc'aj c'u na bic pa qui k'ab, rech man cachak'ij taj ri awakan cho abaj.’ ”

¹² Ri Jesus cubij che: “Tz'ibatalic: ‘Mac'ambejej ri Ajawaxel a Dios.’ ”

¹³ Ri itzel, aretak xutz'akatisaj ronojel ri takchibal mac, xuya' can ri Jesus quieb oxib k'ij.

Ri Jesus xuchap ri u chac pa Galiley

¹⁴ Ri Jesus xtzelej pa Galiley, c'o ri u cuinem ri Uxlabaxel ruc'. Xel u tzijol pa tak conojel ri ulew ri e c'o chila'.

¹⁵ Ri Jesus xebutijoj ri winak pa tak ri ja ri cäquitijoj wi quib ri aj judeyib che ri pixab. Conojel ri winak xquinimarisaj u k'ij.

Ri Jesus c'o pa Nazaret

¹⁶ Ri Jesus xopan pa Nazaret, are ri tinimit jawije' xq'uiyisax wi. Pa ri k'ij re uxlanem, xoc bic pa ri ja ri cäquitijoj wi quib ri aj judeyib che ri pixab, jas ri u nak'atisabal. Xtaq'ui' c'ut che u siq'uixic ri wuj.

¹⁷ Xya' ri u wuj ri Isaiy che, ri k'axal tzij. Aretak xujako xurik ri c'olbal ri tz'ibatal wi we tzij ri':

¹⁸ “Ri Ruxlabal ri Ajawaxel c'o panuwi'. Rumal rech chi in u tasom che qui tzijoxic ri utzalaj tak tzij chque ri mebayib; che qui tzijoxic chque ri winak ri e tz'apim pa che'; che qui jakic ri qui bak'wäch ri moyab che quitzokopixic, ri qui rikom c'ax pa qui k'ab ri qui c'ulel.

¹⁹ In takom ulok che u tzijoxic ri utzalaj tak k'ij re ri Ajawaxel.”

²⁰ Xubot c'u ri wuj, xuya' che ri xyo'w che, xt'uyic. Conojel ri winak ri e c'o pa ri ja, queca'y che.

²¹ Ri Jesus xuchaplej u bixic chque: “Camic xbantaj chiwäch jas ri cubij we Tz'ibatalic ri' ri xito.”

²² Conojel ri winak xquiya' utzalaj k'alajisanic chrij ri Jesus. Xquimay c'u ri tzij re tok'ob ri xubij ri Jesus, xquiban c'otojchi'aj: “¿La ma ta are wa' ri u c'ojol ri Jose?”

²³ Ri Jesus xubij chque: “Kastzij quibij na we tzij ri' chwe: ‘¡Aj cun, chacunaj awib! Conojel jastak ri e ka tom ri xeban pa Capernaum, chabana' xukuje' waral pa we awulew ri'.’ ”

²⁴ Xch'awic xubij: “Kastzij quinbij chiwe, chi man c'o ta jun k'axal tzij utz ta u c'ulaxic cäban rumal ri kas rulew.

²⁵ Kastzij quinbij chiwe, chi e q'ui chuchuyib malca'nib xec'oji' pa Israel pa tak ri u k'ij ri Eliy, aretak xtz'apitaj ri caj oxib junab ruc' wakib ic', xc'oji' c'u jun nimalaj wi'jal pa ronojel ri ulew.

²⁶ Man xtak ta c'u bic ri Eliy ruc' jun chque ri malca'nib aj Israel, xane' xtak bic ruc' jun chuchu' malca'n pa Sarepta re Sidon.

²⁷ Xukuje' e q'ui c'o ch'a'c chquij pa Israel pa tak ri u k'ijol ri Elisey ri k'axal tzij. Man c'o ta c'u jun chque ri e are' xcunax ta rumal ri Elisey, xane' are' xcunax ri Naaman ri aj Siriy.”

²⁸ C'äte ri' conojel ri e c'o pa ri ja sibalaj xpe coyowal che ri Jesus, aretak xquita' we jastak ri'.

²⁹ Xewalijic, xquesaj bic pa ri tinimit, xquic'am bic c'ä tza'm ri juyub ri yacom wi ri qui tinimit, are ta xcaj xquiq'uiak bic chupam ri siwan.

³⁰ Xoc'ow c'u ri Jesus pa qui niq'uiajil, xbec.

Jun achi c'o itzel uxlabal che

³¹ Ri Jesus xkaj bic pa Capernaum, tinimit re Galiley. Quebutijoj ri winak pa tak ri k'ij re uxlanem.

³² Xquimay ri u tijonic, rumal rech chi c'o u cuinem ri u tzij.

³³ Chila' pa ri ja ri cäquitijoj wi quib ri aj judeyib che ri pixab, c'o jun achi ri c'o itzel uxlabal che. Ri are' xurak u chi' ruc' chuk'ab,

³⁴ xubij: “¡E! ¿Jas awe chke, Jesus aj Nazaret? ¿La at petinak che u sachic ka wäch? Weta'm jachin ri at, at ri' ri at u tasom ri Dios.”

³⁵ Ri Jesus xuyajo, xubij: “Chatz'apij u pa chi', chatel che we achi ri'.” C'äte ri' ri itzel uxlabal xuq'uiak ri achi pa qui niq'uiajil ri winak, xel bic che, man c'o ta c'ax xuban can che.

³⁶ Conojel xquimayo, xquixe'j quib. Xquitzijobela' quib, xquibij: “¿Jas wa' we tzij ri', chi ruc' takanic, ruc' cuinem quebutak ri itzel tak uxlabal, quebel c'u bic?”

³⁷ Xel c'u u tzijol ri Jesus pa ronojel c'olbal chunakaj ri ulew ri'.

Ri Jesus xucunaj ri u ji' chuchu' ri Simon Lu'

³⁸ Ri Jesus xel bic pa ri ja ri cäquitijoj wi quib ri aj judeyib che ri pixab. Xoc pa rachoch ri Simon. Ri u ji' chuchu' ri Simon kajinak che jun nimalaj k'ak'. Xquibochi'j c'u ri Jesus puwi' ri chuchu'.

³⁹ Ri Jesus xket ruc' ri chuchu', xtaq'ui' cok che rilic. Xuyaj ri nimalaj k'ak', xtäni' c'u ri k'ak' che. Chanim xwalij ri chuchu', xebupatanij.

Ri Jesus xebucunaj e q'ui yawabib

⁴⁰ Aretak xkaj ri k'ij, conojel ri c'o yawabib cuc' re ronojel u wäch yabil, xequic'am ulok chuwäch ri Jesus. Ri are' xuya' ri u k'ab paquiwi' chquijujunal, xebucunaj.

⁴¹ Xukuje' xebel itzel tak uxlabal chque q'ui, cäquirak qui chi', cäquibij: “At ri' ri u C'ojol ri Dios.” Xeyaj c'ut rumal ri Jesus, man xuya' ta chque chi quetzijonic, rumal rech chi queta'm chi ri Jesus are' ri Crist.

Ri Jesus xutzijoj ri u tzij ri Dios pa Galiley

⁴² Aretak xsakaric, ri Jesus xel bic, xbe pa jun c'olbal pa ri chaki'j uwo sak. Ri winak sibalaj xquitzucuj. Aretak xquiriko, xquik'atij c'ut rech man quel ta bic chquixo'l.

⁴³ Ri Jesus xubij chque: “Rajawaxic chi xukuje' quinbe pa tak niq'uiaj tinimit chic, quintzijoj ri utzalaj tak tzij re ri rajawibal ri Dios chque ri winak chila', che c'u wa' in takom wi ulok.”

⁴⁴ Xbe ri Jesus pa tak ri qui tinimit ri aj judeyib. Xtzijon c'ut pa tak ri ja ri cäquitijoj wi quib ri aj judeyib che ri pixab.