Ri Lucax 22 - Quiché Bible

Ri Judas xuchomaj cuc' ri winak chi cujach ri Jesus pa qui k'ab

¹ Nakaj chic ri nimak'ij re ri caxlanwa ri man cäya' ta ch'am ruc'. Ri cäbix Oc'owem che.

² Ri qui nimakil ri e cojol tabal tok'ob xukuje' ri ajtijab re ri pixab cäquitzucuj jas cäquiban na che u cämisaxic ri Jesus. Cäquixe'j c'u quib chquiwäch ri winak.

³ Xoc c'u ri Satanas pa ranima' ri Judas, ri cäbix Iscariot che, are jun chque ri cablajuj tijoxelab.

⁴ Ri are' xel bic, xech'aw cuc' ri e qui nimakil ri e cojol tabal tok'ob xukuje' ri qui nimakil ri e chajinel re ri rachoch Dios, chi jas cuban na che u jachic ri Jesus pa qui k'ab.

⁵ Ri e are' c'ut xequicotic, xquichomaj chi cäquiya' puak che.

⁶ Ri Judas xuya' rib chuxe' che u banic wa'. Cutzucuj c'u jun jok'otaj che u jachic ri Jesus pa qui k'ab aretak man e c'o ta winak.

Ri Jesus xwa' cuc' ri u tijoxelab

⁷ Xopan c'u ri k'ij re ri caxlanwa ri man cäya' ta ch'am ruc', aretak rajawaxic u cämisaxic ri alaj chij re ri Oc'owem.

⁸ Ri Jesus xebutak c'u bic ri Lu' xukuje' ri Xuan, xubij chque: “Jix, chisuc'umaj ri wa'im re ri Oc'owem, rech cäkatijo.”

⁹ Xquibij c'u che: “¿Jawije' ri caj wi la chi cakasuc'umaj wi?”

¹⁰ Ri Jesus xubij chque: “Chiwilampe', aretak quixopan pa ri tinimit, quixuc'ulaj na jun achi, ri ruc'am jun k'ebal ja'. Chiterenej bic c'ä cho ri ja ri coc wi.

¹¹ Chibij che ri rajaw ja: ‘Ri Kajtij cubij chawe: ¿Jawije' c'o wi ri c'olbal ri cäkatij wi na ri wa'im re ri Oc'owem cuc' ri nu tijoxelab?’

¹² Ri are' cuc'ut na chiwäch jun nimalaj c'olbal suc'umatal chic pa ri cawik ja. Chisuc'umaj ri wa'im re ri Oc'owem chila'.”

¹³ Xebe c'u ri u tijoxelab, je xequirika' jas ri xubij bic chque. Xquisuc'umaj c'u ri wa'im re ri Oc'owem.

¹⁴ Aretak xopan ri jok'otaj, ri Jesus e rachil ri takomxenlab xet'uyi' pa ri mexa.

¹⁵ Ri Jesus xubij chque: “Sibalaj nu rayim u tijic we wa'im ri' re ri Oc'owem iwuc' c'ä majok quinrik c'ax.

¹⁶ Quinbij c'u chiwe, chi mawi jumul quintij ta chi we, c'ä cätz'akat na pa ri rajawibal ri Dios.”

¹⁷ Xuc'am c'ut jun kumubal, xumaltioxij che ri Dios, xubij chque ri u tijoxelab: “Chic'ama' wa', chijacha chiwäch.

¹⁸ Quinbij c'u chiwe, chi kas camic man quintij ta chi we ri u wa'l uva, c'ä cäpe na ri rajawibal ri Dios.”

¹⁹ Xuc'am ri wa, xumaltioxij che ri Dios, xupiro, xuya' chque ri u tijoxelab, xubij: “Are nu cuerp wa', ri jachom u mac iwech. Chitija' wa' che natabal wech.”

²⁰ Aretak e wokinak chic, xuc'am xukuje' ri kumubal, xubij: “We kumubal ri' are' ri c'ac' c'ulwächinic pa ri nu quiq'uel, ri xch'etow u mac iwech.

²¹ Chiwilampe', ri jachal wech cätajin cäwa' wuc' pa ri mexa.

²² Kastzij ri Rija'l Winak cäbec, jas ri chomam ulok. ¡Tok'ob c'u u wäch ri achi ri' ri cäjachowic!”

²³ C'äte ri' xquichaplej u c'otic qui chi' chbil quib, chi jachin lo chque ri cäbanow na wa'.

Jachin ri nim u banic

²⁴ Xwalij c'u jun ch'obonic chquixo'l ri tijoxelab che retamaxic jachin lo ri nim na u k'ij chquixo'l.

²⁵ Ri Jesus c'ut xubij chque: “Ri cajawinelab ri man aj judeyib taj quetakan paquiwi'. Ri c'o qui takanic paquiwi' ri winak, caquibij quib chi e banal tak utzil.

²⁶ Are c'u ri ix, man je ta wa'. Xane' ri nabeal chixo'l chux je ta ne ri sibalaj ac'al na. Ri cätakanic chux pataninel iwech.

²⁷ ¿Jachin c'u ri nim na u banic, a are' ri cät'uyi' pa ri mexa, o are ri cäpataninic? ¿La ma ta are' ri cät'uyi' pa ri mexa? Are c'u ri in chixo'l, in je jas ri cäpataninic.

²⁸ Ix c'u ri' ri xixc'oji' wuc' pa tak ri nu rikoj c'ax.

²⁹ Ri in c'ut quinya' chiwe jun iwajawibal jas ri xuya' ri nu Tat chwe,

³⁰ rech quixwa'ic, quixuq'uian pa ri nu mexa pa ri wajawibal, rech quixt'uyi' paquiwi' tak tem che u k'atic tzij paquiwi' ri cablajuj ramak' ri Israel.”

Ri Jesus xuya' u bixic chi ri Lu' man cuk'alajisaj ta na

³¹ Xubij c'ut ri Ajawaxel: “Simon, Simon, chawilampe', ri Satanas xixuto rech quixya' che, rech quixuyicopisaj je jas cäban che ri trico.

³² Xinbochi'n c'u pawi', rech man caya' ta can ri a cojonic. Ri at c'ut, aretak chaq'uex chi na a c'u'x, chaya' qui chuk'ab ri awachalal.”

³³ Ri Lu' c'ut xubij che: “Wajaw, in c'olic rech quinbe uc' la, pune' pa che', pune' pa cämical.”

³⁴ Xubij c'u ri Jesus: “Lu', quinbij chawe chi c'ä maja' cok' ri ama' ec' camic, cabij na oxmul chi man aweta'm ta nu wäch.”

Nakaj chic ri u c'axc'obisaxic ri Jesus

³⁵ Te c'u ri' xubij ri Jesus chque ri u tijoxelab: “Aretak xixintak bic man ruc' ta u c'abal i puak, mawi i chi'm, mawi i xajäb, ¿la c'o jas xajwataj chiwe?” Xquibij c'ut: “Man c'o taj.”

³⁶ Xubij c'u chque: “Camic c'ut apachin ri c'o u c'abal u puak, chuc'ama', junam xukuje' ri u chi'm. Are' c'ut ri man c'o ta u ch'ich' re ch'o'j, chuc'ayij ri u k'u' che u lok'ic.

³⁷ Quinbij c'u chiwe chi rajawaxic cäbantaj na chwe we tz'ibatalic ri': ‘Xajilax c'u chquixo'l ri e banal tak etzelal.’ Are c'u ri tz'ibatal chwij, cäbantaj na.”

³⁸ Ri e are' xquibij che: “Kajaw, chilampe' la, c'o quieb ch'ich' re ch'o'j waral.” Xubij chque: “Ruc' wa'.”

Ri Jesus xch'aw ruc' Dios pa Jetsemani

³⁹ Ri Jesus xel bic, xbe pa ri qui Juyubal tak ri u Che'al Aseitun, jas ri u nak'atisam wi rib. Xukuje' ri u tijoxelab xquiterenej bic.

⁴⁰ Aretak xebopan chila', ri Jesus xubij chque: “Chibana' ch'awem ruc' Dios, rech man quixtzak taj aretak quixtakchi'x che mac.”

⁴¹ Ri are' c'ut xutas apan rib chquij jas ri u najil ri quetakal wi jun abaj. Xxuquic, xuban ch'awem ruc' Dios,

⁴² xubij: “Tat, we are' ri rayibal la, najtajisaj la we kumubal ri' chwe; are c'u mabanataj ri nu rayibal xane' are' ri rayibal la.”

⁴³ Jun tako'n c'ut aj chicaj xuc'ut rib chuwäch, xuya' u chuk'ab.

⁴⁴ Aretak xel ch'u'j ri ranima', sibalaj xbochi'n che ri Dios. Are ri u c'atanal je jas ri ju tak tz'uj quic' ri cäkaj cho ri ulew.

⁴⁵ Xwalij c'u che ri ch'awem ruc' Dios, xopan cuc' ri u tijoxelab, xeburika' quewar rumal ri bis.

⁴⁶ Xubij chque; “¿Jasche quixwaric? Chixwalijok, chibana' ch'awem ruc' Dios, rech man quixtzak taj aretak quixtakchi'x che mac.”

Ri winak xquichap ri Jesus, xquic'am bic

⁴⁷ C'ä cätajin cach'aw ri Jesus, aretak xebopan q'ui winak. Ri u binam Judas ri are jun chque ri cablajuj tijoxelab, are' c'amowinak qui be. Wa' xnakajin che u tz'umaxic ri Jesus.

⁴⁸ Ri Jesus xubij che: “Judas, ¿la ruc' tz'umanic cajach ri Rija'l Winak?”

⁴⁹ Ri e c'o ruc' ri Jesus, aretak xquilo jas ri cäc'ulmax na, xquibij che: “Kajaw, ¿la quekasoc ruc' ch'ich' re ch'o'j?”

⁵⁰ Jun chque xusoc jun pataninel re ri qui nimal ri e cojol tabal tok'ob, xresaj ri u xiquin re u wiquiak'ab.

⁵¹ Ri Jesus xubij che: “Ruc' wa'. Chebiya' canok.” Xuchap ocok ri u xiquin ri pataninel, xucunaj.

⁵² Ri Jesus xubij chque ri e qui nimakil ri e cojol tabal tok'ob, ri e qui nimakil ri e chajil re ri rachoch Dios, xukuje' ri nimak tak tatayib ri e petinak chrij che u chapic: “¿La jas ta ne chrij jun eläk'om ix elinak wi ulok ruc' ch'ich' re ch'o'j, ruc' che'?

⁵³ In c'olinak iwuc' ronojel k'ij pa ri rachoch Dios, man xinichap ta c'ut. Are c'u wa' ri jok'otaj chiwe, c'o ri u cuinem ri k'eku'm iwuc'.”

Ri Lu' xubij chi man reta'm ta u wäch ri Jesus

⁵⁴ Ri winak xquichap ri Jesus, xquic'am ulok pa ri rachoch ri qui nimal ri e cojol tabal tok'ob. Ri Lu' u terenem chi naj.

⁵⁵ Nuc'um chi c'u k'ak' pa ri u niq'uiajil ri uwo ja, conojel junam xet'uyic. Xukuje' ri Lu' xt'uyi' chquixo'l.

⁵⁶ Xilitaj rumal jun ali pataninel chi t'uyul chrij ri k'ak', naj u wi' che, xubij: “Xukuje' we achi ri' xc'oji' ruc' ri Jesus.”

⁵⁷ Ri Lu' xresaj rib chupam, xubij: “Ixok, man weta'm ta u wäch.”

⁵⁸ Man naj ta chi c'ut, ri Lu' xilitaj chi rumal jun, ri xubij: “Xukuje' ri at at jun chque.” Ri Lu' xubij: “Tat, man in taj.”

⁵⁹ Oc'owinak chi jok'otaj, jun chic xucoj u chuk'ab che u bixic, xubij: “Kastzij we achi ri' xc'oji' ruc', aj Galiley c'ut ri are'.”

⁶⁰ Ri Lu' xubij: “Tat, man weta'm taj jas ri cabij.” C'ä cätajin cätzijonic, chanim xok' ri ama' ec'.

⁶¹ C'äte ri' ri Ajawaxel xutzolk'omij rib, xuca'yej ri Lu'. Are c'u ri Lu' xnataj ri u tzij ri Rajaw che, jas ri xubij che: “C'ä maja' cok' ri ama' ec', oxmul cabij na chi man aweta'm ta nu wäch.”

⁶² Xel c'u apan ri Lu', xok' ruc' c'axc'olil.

Xetz'ebex u wäch ri Jesus

⁶³ Are c'u ri achijab ri e c'o chunakaj ri Jesus, xquetz'bej u wäch, xquich'ayo.

⁶⁴ Xquich'uk ri u bak'wäch, xquita' c'u che: “Chach'obo' jachin xatch'ayowic.”

⁶⁵ Xukuje' niq'uiaj q'ui jastak chic xquibij che, xquiyok'o.

Ri Jesus c'o chquiwäch ri comon re ri qui nimakil ri aj judeyib

⁶⁶ Aretak xsakaric, xquimulij quib ri nimak tak tatayib aj judeyib, ri e qui nimakil ri e cojol tabal tok'ob xukuje' ri ajtijab re ri pixab, xquic'am bic ri Jesus chquiwäch ri comon re ri qui nimakil ri aj judeyib ri cäquik'at tzij.

⁶⁷ Xquibij: “We at ri' ri Crist, chabij chke.” Ri Jesus c'ut xubij chque: “We ta quinbij chiwe, man quicoj ta ri'.

⁶⁸ Xukuje' we ta c'o jas quinta' chiwe, man quitzelej ta u wäch ri' ri nu tzij.

⁶⁹ Kas camic c'ut ri Rija'l Winak cät'uyi' na pa ri u wiquiak'ab ri Dios ri c'o u cuinem.”

⁷⁰ Xquibij c'u conojel: “¿La at ba' u C'ojol ri Dios?” Ri Jesus xubij chque: “Je' wa', jacha' ri i bim.”

⁷¹ Xquibij c'ut: “¿Jas ta chi qui patan k'alajisanelab chke? Kas uj xujto'w pu chi'.”