Ri Lucax 17 - Quiché Bible

Sibalaj c'ax we jun cätzak pa mac

¹ Xubij ri Jesus chque ri u tijoxelab: “Kas quepe wi ri takchibal mac. C'ax c'u re ri winak ri rumal rech quepetic.

² Are ta utz na ri' che, we ta cätzayabax jun ca' chukul, cäq'uiak ta c'u pa ri plo. Utz na wa' chuwäch we cutzakisaj jun chque we ch'utik ri'.

³ Chichajij iwib. We ri awachalal camacunic, chapixbej. We cuq'uex c'u ri u c'u'x, chasacha' u mac.

⁴ We wukmul c'ut pa jun k'ij cuban jun mac chawe, we wukmul pa jun k'ij cätzelej na awuc', cubij, xinq'uex nu c'u'x, chasacha' ba' u mac.”

C'o u cuinem ri jun ri c'o u cojonic

⁵ Xquibij ri takom che ri Ajawaxel: “Chbana' la chke chi cujcowir pa ri ka cojonic.”

⁶ Xubij c'u ri Ajawaxel: “We ta c'o i cojonic je jas ri jun u bak' moxtansa, quibij ta ri' che we juwi' mo'r ri': ‘Chaboko awib, chatica' awib pa ri plo’, cunimaj c'u ri' ri i tzij.”

Ri rajawaxic cuban jun ajchac

⁷ “We c'o lo jun chiwe ri c'o jun pataninel re' ri cuban tajin o cäbe pa yuk', aretak cätzelej ulok cho ja, ¿la c'o jun cubij ta che ri pataninel: ‘Tasaj chanim, chatt'uyulok, chatwokok’?

⁸ Xane' nabe cubij che ri pataninel: ‘Chabana' ri nu wa re xk'ekal, chacojo ri awatz'iak, chinapatanij c'ä quinwa' na quinuq'uian na. Te c'u ri' chatwok at, chatuq'uianok.’

⁹ ¿La cäban ta c'u maltioxinic che we pataninel ri' rumal rech chi xuban jas ri xtak wi che u banic? Man rajawaxic ta maltioxinic che we pataninel ri'.

¹⁰ Je c'u ri ix xukuje', aretak i banom chic ronojel jas ri ix takom che u banic, rajawaxic quibij: ‘Uj ajchaquib ri man c'o ta quechbex chke, xuwi ri rajawaxic u banic xkabano.’ ”

Ri Jesus xebucunaj lajuj achijab ri c'o ch'a'c chquij

¹¹ Pa jun k'ij aretak benak ri Jesus pa Jerusalen, coc'ow na pa ri qui c'ulbatil ri Samar ruc' ri Galiley.

¹² Aretak xopan pa jun alaj tinimit, xebel ulok lajuj achijab xa' col man cäquic'ulaj c'ut, ri c'o ch'a'c chquij. Ri e are' xetaq'ui' c'ut,

¹³ co xech'awic, xquibij: “¡Jesus, Ajtij, chel c'u'x la chke!”

¹⁴ Ri Jesus xerilo, xubij chque: “Jix, chic'utu' iwib chquiwäch ri e cojol tabal tok'ob.” Pa ri qui binem c'ut, xecunatajic, e sak chic.

¹⁵ Jun chque, aretak xril rib chi xcunatajic, xtzelejic, co xch'awic, xunimarisaj u k'ij ri Dios.

¹⁶ Xxuqui' chuwäch ri Jesus, xukasaj ri u palaj cho ri ulew, xumaltioxij che. Ri are' c'ut aj Samar.

¹⁷ Ri Jesus xubij: “¿La ma ta ne e lajuj ri xch'ajan ri ch'a'c chquij? E c'u ri belejeb, ¿jawije' e c'o wi?

¹⁸ ¿La ma ta c'o jun chic ri xtzelej ta ulok che u nimarisaxic u k'ij ri Dios, xane' xuwi we jun achi ri' ri man ka winakil taj?”

¹⁹ Xubij che ri achi: “Chatwalijok, jät. Xatutzir rumal ri a cojonic.”

Jas cäban na aretak cäpe ri rajawibal ri Dios

²⁰ Ri pariseyib xquic'ot u chi' ri Jesus chi jampa' cäpe ri rajawibal ri Dios. Ri Jesus xubij chque: “Ri rajawibal ri Dios aretak cäpetic man quilitaj taj.

²¹ Man cäbix ta na: ‘Chiwilampe', c'o waral, chiwilampe', c'o chila'.’ Xane' chiwilampe', ri rajawibal ri Dios c'o chi chixo'l.”

²² Xubij chque ri u tijoxelab: “Quepe na k'ij, aretak sibalaj quirayij na rilic jun chque ri u k'ij ri Rija'l Winak, man quiwil ta c'ut.

²³ Cäbix na chiwe: ‘Chiwilampe', c'o waral’, o ‘chiwilampe', c'o chila'’. Mixbec, mixteri chquij ri je cäquibij wa' chiwe.

²⁴ Je jas ri caypa', cätunun cho ri caj c'ä jela', k'alaj c'ä jewa', jewa' ri cux na ri Rija'l Winak pa ri k'ij ri cätzelej ulok.

²⁵ Rajawaxic c'ut chi sibalaj curik na c'ax nabe, quetzelax na u wäch cumal ri winak cho ri uwächulew pa ri k'ij ri'.

²⁶ Jas ri xc'ulmax pa tak ri u k'ij ri Noe, jeri' xukuje' cäc'ulmax na pa tak ri u k'ij ri Rija'l Winak.

²⁷ Ri winak quewa'ic, quebuq'uianic, quec'uli'c, quequiya' ri calc'ual che c'ulanem, c'ä pa ri k'ij aretak xoc ri Noe pa ri jucub. Xpe c'u ri nimalaj k'ekal jäb, xusach qui wäch conojel.

²⁸ Junam xukuje' jas ri xban pa tak ri u k'ij ri Lot. Ri winak quewa'ic, quebuq'uianic, quelok'omanic, quec'ayinic, queticonijic, quequiyac tak ja.

²⁹ Pa ri k'ij c'ut aretak xel bic ri Lot pa Sodom, xkaj ulok k'ak' ruc' asubre chicaj, xusach qui wäch conojel.

³⁰ Jewa' cäbantaj na pa ri k'ij aretak ri Rija'l Winak aretak cuc'ut na rib.

³¹ Pa ri k'ij ri', apachin ri c'o puwi' ri ja, mäkaj ulok che qui c'amic bic ri jastak re ri e c'o pa ja, chanimaj ba chanim. Apachin ri c'o pa ri juyub, mätzelej chi na cho ja.

³² Chnataj ri rixokil ri Lot chiwe.

³³ Apachin ri cutzucuj u to'tajisaxic ri u c'aslemal, are ri' cutzak na. Apachin c'u ri cutzak ri u c'aslemal, cuc'ol na.

³⁴ Quinbij chiwe chi pa ri ak'ab ri' e c'o quieb pa jun ch'at. Ri jun cäc'am na bic, ri jun chic cäya' canok.

³⁵ Quieb ixokib junam quequienic. Ri jun cäc'am bic, ri jun chic cäya' canok.

³⁶ Quieb achijab e c'o pa ri juyub. Ri jun cäc'am bic, ri jun chic cäya' canok.”

³⁷ Ri u tijoxelab xquibij che: “¿Jawije' cac'ulmataj wi na wa', Kajaw?” Ri Jesus xubij chque: “Jawije' ri c'o wi ri cäminak, chila' c'ut cäquimulij wi na quib ri c'uch.”