Ri Lucax 15 - Quiché Bible

Ri c'ambal no'j chrij ri chij ri xsachic

¹ Xebopan conojel ri e tok'il tak alcabal xukuje' ri ajmaquib ruc' ri Jesus che u tatabexic ri u tzij.

² Xewixwit c'u ri pariseyib xukuje' ri ajtijab re ri pixab, xquibij: “We achi ri' quebuc'ulaj ri ajmaquib, cäwa' cuc'.”

³ Ri Jesus c'ut xutzijoj we c'ambal no'j ri' chque, xubij:

⁴ “¿La c'o lo jun winak chiwe, we c'o jun sient u chij, cusach c'u jun chque, ri ma ta quebuya' can ri jumuch' belejlajuj pa ri chaki'j uwo sak, cäbe c'u che u tzucuxic ri jun ri xsachic, c'ä curik na?

⁵ Aretak curiko, cuya' ulok chrij u wi', cäquicotic.

⁶ Copan c'u cho rachoch, quebusiq'uij ri rachil xukuje' ri e u c'ul tak ja, cubij chque: ‘Chixquicot wuc', rumal rech chi nu rikom ri nu chij ri xsach na canok.’

⁷ Quinbij chiwe, jeri' c'o na quicotemal chila' chicaj rumal rech jun ajmac ri cuq'uex u c'u'x, chquiwäch ri jumuch' belejlajuj suc', ri man rajawaxic taj u q'uexic qui c'u'x.”

Ri c'ambal no'j chrij ri puak ri xtzakic

⁸ “Jachin ta ri ixok ri c'o lajuj rakan puak ruc'. We cutzak jun chque, ¿la ma ta cutzij ri u chäj, cumes ri u pa ja, cärilij u tzucuxic, c'ä curik na?

⁹ Aretak u rikom chic, quebusiq'uij ri rachil xukuje' ri e u c'ul tak ja, cubij: ‘Chixquicot wuc', rumal rech chi nu rikom ri puak ri nu tzakom.’

¹⁰ Je c'u ri' quinbij chiwe chi quequicot ri e aj cajalaj tak u tako'n ri Dios rumal rech jun ajmac ri cuq'uex u c'u'x.”

Ri c'ambal no'j chrij ri ala ri xusach u wäch ri rechbal

¹¹ Xubij ri Jesus: “C'o jun achi c'o quieb u c'ojol.

¹² Ri chak'axel xubij che ri u tat: ‘Tat, ya' la chwe ri quinwechbej na che ri k'inomal.’ Ri achi xujach c'u ri jastak rech chquiwäch ri e u c'ojol.

¹³ Oc'owinak chi quieb oxib k'ij, ri chak'axel u c'ojol xumulij bic ri puak, xbe naj pa jun ulew chic. Chila' c'ut xak xusachila' wi ri u k'inomal, xuban ronojel jas ri u rayinic.

¹⁴ Aretak ronojel u sachom chic u wäch xpe jun nimalaj wi'jal pa ri ulew ri'. Ri ala xux meba', man c'o ta chi c'o ruc'.

¹⁵ Xbec, xutzucuj u chac ruc' jun achi re ri ulew jawije' ri c'o wi. Ri xutak bic pa ri rulew che qui yuk'uxic ak.

¹⁶ Sibalaj curayij cutij ri rij quinak' ri cäquitij ri ak. Man c'o ta c'u jun cäyo'w ta che.

¹⁷ Xul c'u ri ala pa sak, xubij: ‘¡C'o q'ui rajchaquib ri nu tat, sibalaj c'o ri caquitijo. Ri in c'ut waral quincäm rumal ri wi'jal!

¹⁸ Quinwalijic, quinbe na ruc' ri nu tat, quinbij c'u na che: ‘Tat, in macuninak chuwäch ri Dios xukuje' chwäch la.

¹⁹ Man takal ta chic cäbij ta c'ojol la chwe. Bana' la chi quinux je jas jun chque ri ajchaquib la.’

²⁰ Xwalij ri ala, xbe ruc' ri u tat. C'ä c'o c'u chi naj, xilitaj apan rumal ri u tat. Ri are' c'ut xel u c'u'x che, xxiq'uinic xbec, xuk'aluj ri ala, xutz'umaj.

²¹ Ri u c'ojol xubij che: ‘Tat, in macuninak chuwäch ri Dios xukuje' chwäch la. Man takal ta chic cäbij ta c'ojol la chwe.’

²² Are c'u ri u tat xubij chque ri pataninel tak rech: ‘Chiwesaj ulok ri utzalaj atz'iak, chicojo' che. Chicojo' mulk'ab che ri u k'ab. Chicojo' xajäb chque ri rakan.

²³ Chic'ama' ulok ri alaj chom ama' wacax, chipila'. ¡Chujwok, chujquicot c'ut kabana' nimak'ij!

²⁴ Rumal rech chi we nu c'ojol ri' cäminak chic, xc'astaj c'u ulok, xsach na, xriktaj c'ut.’ Xquichaplej c'u nimak'ij.

²⁵ Ri c'ojolaxel nabeal c'o pa ri juyub. Aretak petinak xnakajin che ri ja, xuta' ri k'ojom, xukuje' ri xojowem.

²⁶ Xusiq'uij jun chque ri alabom, xuc'ot u chi' jas ri cätajin cäbanic.

²⁷ Ri are' xubij che: ‘Ulinak ri a chak'. Ri a tat xupil ri alaj chom ama' wacax, rumal rech chi utz u wäch xulic.’

²⁸ Sibalaj c'u xpe royowal ri nabeal, chi man cäraj taj coc bic. Xel c'u ulok ri u tat che u bochi'xic.

²⁹ Ri ala xubij c'u che ri u tat: ‘Chilampe' la, q'ui junab lal nu patanim, amak'el quinnimaj ri takanic la. Mawi jumul c'ut yo'm la jun alaj q'uisic' chwe, rech quinban nimak'ij cuc' ri wachil.

³⁰ Aretak c'ut xpe we c'ojol la ri', ri xusachala' ri jastak ech la cuc' ixokib quech nim ch'utin, xpil c'u la ri alaj chom ama' wacax che.’

³¹ Ri u tat xubij che: ‘Nu c'ojol, ri at amak'el at c'o wuc', conojel ri jastak wech e awech.

³² Rajawaxic u banic nimak'ij, rajawaxic chi cujquicotic, rumal rech chi we a chak' ri' ri cäminak chic, xc'astaj c'ut. Xsach na, xriktaj c'ut.’ ”