Ri Lucax 10 - Quiché Bible

Ri Jesus xebutak bic ri oxc'al cablajuj

¹ E bantajinak chi c'u we jastak ri', ri Ajawaxel xebucha' jujun chic, e oxc'al cablajuj (72). Pa cacabil xebutak bic rech quenabej bic chuwäch, pa ronojel tinimit, pa ronojel c'olbal ri cäbe wi na ri are'.

² Xubij chque: “Kastzij ri k'atoj sibalaj nim, are c'u ri ajchaquib xa' e quieb oxib. Chibochi'j ba ri rajaw ri k'atoj, chi chebutaka' bic ajchaquib pa ri u k'atoj.

³ Jix. Chiwilampe', quixintak bic je jas ri alaj tak chij chquixo'l ri utiw.

⁴ Miwuc'aj bic c'olbal i rajil, mawi chi'm mawi xajäb; man c'o ta jun quiya' rutzil u wäch pa ri be.

⁵ Apachique ja ri quixoc wi, chibij nabe: ‘Jamaril che we ja ri'.’

⁶ We e c'o c'u winak chila' aj jamaril, puwi' cäpe wi na ri jamaril. We c'u man c'olic, catzelej ri jamaril iwuc'.

⁷ Chixcanaj can pa ri ja ri'. Chitija' iwe xukuje' chiwuq'uiaj iwe ri c'o cuc', rumal rech chi takal che ri ajchac ri tojbal rech. Mixk'ax chi tak ja.

⁸ Apachique tinimit ri quixoc wi, we quixquic'ulaj ri winak chila', chitija' ri cäya' chiwe.

⁹ Chebicunaj ri yawabib ri e c'o chila'. Chibij chque: ‘Nakaj chic c'o wi ri rajawibal ri Dios chiwe.’

¹⁰ Apachique tinimit ri quixoc wi, we man quixquic'ulaj ri winak chila', jix xo'l tak ri ja, chibij:

¹¹ ‘Xukuje' ne ri puc'uc' ulew re ri tinimit ri nac'al chque ri kakan, cäkatota' can chiwij. Chiwetamaj ba' chi ri rajawibal ri Dios nakaj chic c'o wi chiwe.’

¹² Quinbij c'u chiwe, chi pa ri k'ij aretak quesach na qui wäch tak ri tinimit, nim na ri c'ax curik we tinimit ri' chuwäch ri Sodom.”

Ri tinimit tak ri man e nimanelab taj

¹³ “¡C'ax cärik na, tinimit Corazin! ¡C'ax cärik na, tinimit Betsaid! We ta pa Tir pa Sidon xeban wi ri nimak tak mayibal ri e bantajinak iwuc', ojer ta ri' xquiq'uex ri qui c'u'x, xet'uyi' ta ri pa chaj, xquicoj ta atz'iak wakwoj ri che u c'utic chi quebison rumal ri qui mac.

¹⁴ Aretak cäban na ri k'atoj tzij, c'ax na ri c'äjisabal i wäch ix chquiwäch ri Tir ri Sidon.

¹⁵ Ri at c'ut, Capernaum, ¿la cachomaj chi at walijisam c'ä chicaj? Jayi', xane' catkasax bic pa ri qui c'olbal ri cäminakib.

¹⁶ Apachin ri cutatabej ri i tzij, in ri' qui nu tatabej. Apachin ri man nim ta quixril wi, in ri' man nim ta quinrilo. Apachin ri man nim ta quinrilo, man nim ta cäril wi ri' ri xinutak ulok.”

Xetzelej ulok ri oxc'al cablajuj

¹⁷ Xetzelej ulok ri oxc'al cablajuj (72) ruc' quicotemal, xquibij: “Kajaw, xukuje' ne ri itzel tak uxlabal cäquiya' quib pa takic chke pa ri bi' la.”

¹⁸ Ri Jesus xubij chque: “In xinwil ri Satanas, je jas jun caypa' xtzak ulok chicaj.

¹⁹ Chiwilampe', nu yo'm i cuinem che qui tac'alexic cumätz xukuje' sina'j. Nu yo'm i cuinem puwi' ronojel ri u chuk'ab ri ka c'ulel, man c'o ta c'u cäbanow c'ax chiwe.

²⁰ Mixquicot rumal wa', chi ri uxlabal cäquiya' quib pa takic chiwe. Xane' chixquicotok chi ri i bi' e tz'ibam chila' chicaj.”

Cäquicot ri Jesus

²¹ Pa ri jok'otaj ri', sibalaj xquicot ri Jesus rumal ri Ruxlabal ri Dios, xubij: “Quink'ijlan che la, Tat, Rajaw caj ulew, xec'u' la we jastak ri' chquiwäch ri c'o qui no'j xukuje' ri c'o quetamabal, xc'ut c'u la chquiwäch ri ac'alab. Je, Tat, je c'u wa' xkaj chwäch la.

²² Conojel ri jastak e jachom chwe rumal ri nu Tat. Man c'o ta jun reta'm jachin ri' ri C'ojolaxel, xuwi ri Tataxel reta'm. Mawi c'o jun reta'm jachin ri' ri Tataxel, xuwi ri C'ojolaxel xukuje' jachin chquiwäch ri C'ojolaxel cäraj cuc'ut wi.”

²³ Ri Jesus xkeb cuc' ri u tijoxelab pa qui tuquiel wi, xubij chque: “Caquirik quicotemal ri winak ri cäquilo jas ri quiwil ix.

²⁴ Quinbij chiwe chi q'ui k'axal tak tzij xukuje' q'ui ajawinelab xcaj xquilo jas ri quiwilo, man xquil ta c'ut. Xcaj xquito jas ri quito, man xquita' ta c'ut.”

Ri c'ambal no'j chrij ri utzalaj achi aj Samar

²⁵ Jun ajtij rech ri pixab xbe che u tzijobexic ri Jesus xukuje' c'u che u c'ambejexic xuc'ot u chi': “Ajtij, ¿jas rajawaxic quinbano rech quinrik ri junalic c'aslemal?”

²⁶ Ri Jesus xubij che: “¿Jas ri tz'ibatal pa ri pixab? ¿Jas ri casiq'uij u wäch?”

²⁷ Ri ajtij re ri pixab xutzelej u bixic che: “Cubij ri pixab: Chalok'ok'ej ri Ajawaxel a Dios ruc' ronojel awanima', ruc' ronojel a c'aslibal, ruc' ronojel a chuk'ab, xukuje' ruc' ronojel a chomanic. Xukuje' chalok'ok'ej ri awajil a tz'akat je jas ri u lok'ok'exic awib chbil awib.”

²⁸ Ri Jesus xubij che: “Suc' ri xabij. Chabana' wa', catc'asi' c'ut.”

²⁹ Are c'u ri ajtij xraj xuk'alajisaj rib chi suc', xubij che ri Jesus: “¿Jachin ri' ri wajil nu tz'akat?”

³⁰ Ri Jesus xubij che: “C'o jun achi xkaj ulok pa Jerusalen benam re pa Jerico. Xkaj pa qui k'ab eläk'omab. Xquesaj bic ri ratz'iak, xquich'ayo. Xebec, xquiya' can ri achi xa jubik' man cäcämic.

³¹ Xkaj c'u bic jun cojol tabal tok'ob pa ri be ri'. Aretak xril ri achi, naj xoc'ow wi che.

³² Xukuje' jun aj levi xopan pa ri c'olbal ri'. Aretak xril ri socotajinak, junam xubano, naj xoc'ow wi che.

³³ Petinak jun aj Samar pa ri be, xopan chunakaj ri socotajinak. Aretak xrilo, xel u c'u'x che.

³⁴ Xkeb ruc', xebubotz' ri e u socotajic, xucoj aseit ruc' u wa'l uva chque. Xuya' chrij ri u quiej, xuc'am bic pa jun ja okxanibal, xrilij c'ut.

³⁵ Chucab k'ij c'ut, aretak xbec, xeresaj quieb puak, xuya' che ri rajaw ri ja okxanibal, xubij: ‘Chawilij ri achi. Ronojel ri casach na, aretak quintzelej na ulok quintoj na chawe.’ ”

³⁶ Ri Jesus xuch'abej ri ajtij re ri pixab: “¿Jas cabij at? ¿Jachin chque ri oxib achijab ri' xux rajil u tz'akat ri xkaj pa qui k'ab eläk'omab?”

³⁷ Ri are' xubij: “Are ri xel u c'u'x che.” C'äte ri' xubij ri Jesus che: “Jät, junam chabana'.”

Ri Jesus xebusolij ri Mart xukuje' ri Mariy

³⁸ E benak c'u pa jun be, ri Jesus xoc pa jun alaj tinimit. Ri c'o wi jun ixok, Mart u bi', ri xuc'amowaj cho rachoch.

³⁹ Ri are' c'o jun rachalal Mariy u bi'. Ri Mariy xt'uyi' chuwäch ri Jesus che u tatabexic ri u tzij.

⁴⁰ Are c'u ri Mart sibalaj latz' u wäch rumal rech chi q'ui ri u patan ri cubano. Xnakajin chuwäch ri Jesus, xubij che: “Wajaw, ¿la ma ta coc la il chi ri wachalal quinuya' can nu tuquiel che ri patan? Bij ba la che chi chinuto'.”

⁴¹ Ri Ajawaxel xubij che: “Mart, Mart, sibalaj catoc il chque q'uialaj jastak, sachinak a c'u'x cumal.

⁴² Xa' c'u jun jasach ri rajawaxic, are ri Mariy u cha'om ri utz na, ri man quesax ta che.”