Ri Josue 8 - Quiché Bible

Ri aj israelib cäquich'äc ri tinimit Hai

¹ Ri Ajawaxel xubij che ri Josue: “Maxe'j awib mawi mat chukuchubic. Chebamulij conojel ri ajch'ojab jät che u banic ch'o'j ruc' ri Hai, quinya' c'u na ri ch'äcanic chawe puwi' ri rajawinel ri Hai xukuje' ri u winak. Ri u tinimit xukuje' tak rirulew quecanaj na pa a k'ab,

² ri at caban na ruc' ri Hai xukuje' ri rajawinel jacha' ri xaban che ri Jerico xukuje' ri rajawinel, che c'u we jutij ri' cuya' quiban iwech chque ri jastak xukuje' tak ri cawaj ri e ch'äctajinak. Chasuc'umaj jun ch'äcanic ri man c'o ta cänabexic, chrij ri tinimit.”

³ Ri Josue xusuc'umaj rib junam cuc' conojel ri e u rajch'ojab che u banic ch'o'j ruc' ri Hai. Xebucha' juwinak lajuj mil ajch'ojab, ri xebutak bic chak'ab

⁴ xuya' c'ut we takanic ri' chque: “Utz u tatabexic chibana': jix chiya' iwib chrij ri tinimit, chi c'u iwib chunakaj xak c'u chixc'ol che reyexic ri u banic ri ch'o'j.

⁵ Are' c'u ri in xukuje' conojel ri winak ri e c'o wuc' cujnakajin che ri tinimit, aretak c'u chebel ulok ri winak chupam ri tinimit che u banic ch'o'j kuc' cujanimaj c'u na chquiwäch, jacha' ri nabe.

⁶ We winak ri' cujcokataj na aretak chujanimaj chuwäch ri tinimit, are c'u pa qui c'u'x chi uj animajinak chic jumul chquiwäch.

⁷ Quixel c'u ulok ix pa ri c'ubal iwib qui majij c'u na ri tinimit, are' c'ut ri Ajawaxel ri i Dios cujach na pa i k'ab.

⁸ Aretak c'u i majim chic, chiporoj, je jacha' ri u bim ri Ajawaxel. Jun takanic wa'.”

⁹ Xuya' c'u takanic ri Josue chque chi quebec, xebe c'ut xequic'u' quib chuxo'l ri Betel ruc' ri Hai, pa ri u kajebal k'ij che ri Hai, are c'u ri Josue xroc'owisaj na ri jun ak'ab pa kajebal.

¹⁰ Chucab k'ij, sibalaj ak'ab xwalij ri Josue xebusolij ri u winak. Xuya' c'u rib chquiwäch, junam cuc' ri e qui rija'l ri Israel, xebe c'u che u banic ch'o'j ruc' ri Hai.

¹¹ Xekeb ruc' ri tinimit chusuq'uil ri u wäch xquiya' c'u quib pa ri riquiak'ab ri Hai, xcanaj ri beya' chquiwäch ruc' ri tinimit.

¹² Ri Josue xebuc'u' job mil (5000) achijab chuxo'l ri Betel ruc' ri Hai, pa ri u kajebal k'ij che ri tinimit,

¹³ jeri' chi ri ajch'ojab quieb xquibano ri juk'at xuc'u' rib pa ri u kajebal k'ij che ri tinimit, ri juk'at chic xquiya' quib pa ri iquiak'ab. Ri Josue xutakej u be pa ri chak'ab ri' c'ä xopan na pa u niq'uiajil ri beya'.

¹⁴ Aretak ri rajawinel ri Hai xeril ri ajch'ojab, xucoj aninakil xel c'u ulok cuc' conojel ri e rajch'ojab che u banic ch'o'j cuc' ri aj israelib pa ri beya' re ri Jordan, man xunabej ta c'ut chi e c'o chi niq'uiaj aj israelib quic'u'm quib chrij ri tinimit.

¹⁵ Ri Josue xukuje' ri rachijab xquiban quib chi quebanimajic, xebanimaj c'u chquiwäch ri aj Hai xebe pa ri u be ri cäbe pa ri chaki'j uwo sak.

¹⁶ Conojel c'ut ri cajch'ojab ri aj Hai xya' takanic chque che qui ternexic, rumal c'ut ri u ternexic ri Josue xenajtin che ri tinimit.

¹⁷ Man c'o ta jun achi aj Hai mawi aj Betel ri ma ta xel ulok che qui ternexic ri aj israelib; rumal c'u rech chi kas xbe canima' che qui ternexic man c'o ta xecanaj che u to'ic ri tinimit.

¹⁸ Xubij c'ut ri Ajawaxel che ri Josue: “Chaya' ri etal che u ch'äquic ri tinimit re Hai quinjach c'u na pa a k'ab.”

¹⁹ E are' tak c'ut ri qui c'u'm quib ruc' aninakil xebel ulok pa ri c'ubal tak quib, xbequiq'uiaka' quib pa ri tinimit xquimajij c'ut, xquit'ikaxtaj c'u k'ak' che.

²⁰ Aretak ri achijab aj Hai xquitzalc'atij quib xeca'y chquij, xtaki' qui wäch chi ri u sibal ri tinimit xpaki' c'ä cho ri caj. Man c'o ta chi jawije' caquito' ta chi wi quib, are' c'u ri aj israelib ri xebanimaj pa ri chaki'j uwo sak, xquitzalc'atij quib che u banic ri ch'o'j.

²¹ Aretak c'u xril ri Josue xukuje' conojel ri aj israelib chi ri xquic'u' quib qui majim chic ri tinimit, qui t'ikom chi c'u k'ak' che, xetzelej chquij xech'ojin cuc' ri aj Hai.

²² Ri xemajin ri tinimit aninak xebel ulok chupam, xelak'aputaj c'u can ri aj Hai cumal ri cak'at cajch'ojab ri aj israelib ri xeboc che u banic ch'o'j cuc' ri aj Hai c'ä xq'uis na qui cämisaxic conojel.

²³ Xuwi xquic'asba' canok ri rajawinel ri Hai, ri xquichapo xquic'am c'u bic chuwäch ri Josue.

²⁴ Aretak c'u e cämisatajinak chic conojel ri aj Hai ri xebel ulok che qui ch'äquic, ri aj israelib, xetzelej pa Hai xequicämisaj c'ut ri e canajinak canok.

²⁵ Pa ri k'ij ri' xecäm ri cablajuj mil (12,000) winak ri e c'o pa Hai, chi achijab chi ixokib,

²⁶ ri Josue man xuk'il ta ri takanic che qui cämisaxic ri e c'o pa ri tinimit c'ä xuq'uis na tzij paquiwi' chnimalaj conojel.

²⁷ Ri aj israelib xequic'am conojel ri awaj xukuje' ri jastak ri e c'o pa ri tinimit, jacha' ri u bim ri Ajawaxel che ri Josue,

²⁸ ri Josue xuporoj ri Hai xa c'u jumul xuq'uistzij puwi', jas ri quilitaj camic.

²⁹ Ri rajawinel ri Hai xxequebax che ri u k'ab jun che' rumal ri Josue c'ä pa ri benak k'ij, aretak c'u xkaj ri k'ij, xtakanic chi chkasaxok chrokobax c'ut chuchi' ri oquibal chupam ri tinimit, chmulix c'u abaj puwi'. Ri jumulaj abaj c'ä c'o chila' camic.

Ri Josue cuya' u siq'uibal ri pixab puwi' ri juyub Ebal

³⁰ Ri Josue xuwoc c'u jun porobal che ri Ajawaxel, ri u Dios ri Israel, pa ri juyub Ebal,

³¹ je jacha' ri takanic ri xuya' ri Moises ri pataninel rech ri Ajawaxel chque ri aj israelib je jacha' ri tz'ibatal chupam ri wuj re ri u pixab ri Moises: “Jun porobal que abaj ri man cätzoc' taj.” E are' c'u ri aj israelib xequichi'j tabal tok'ob ri cächajirisaxic puwi' ri porobal, xequiya' c'u tabal tak tok'ob re utzirisan ib.

³² Chquiwäch c'ut ri aj israelib, ri Josue xutz'ibaj c'u chquiwäch tak ri abaj re ri porobal, ri pixab ri u yo'm ri Moises chque.

³³ Ronojel c'ut ri tinimit, ri e rija'lil ri Israel jacha' xukuje' ri man e qui winakil taj, xukuje' ri e qui rija'l, ri takanelab xukuje' ri k'atal tak tzij xquiya' quib pa tak u xcut ri caxa ri c'o wi ri u c'ulwächinic ri Ajawaxel, chquiwäch ri e cojol tabal tok'ob aj levitib ri e uc'aninak puwi' qui teleb. Che ri u tewichibal ri tinimit Israel, pa niq'uiaj chque e c'o pa u xcut ri juyub Jerizim, ri jun pa niq'uiaj chic pa u xcut ri juyub Ebal, je jacha' ri takanic ri xuya' ri Moises kas pa ri chaplebal, ri pataninel rech ri Ajawaxel.

³⁴ Ri Josue xebuya' qui siq'uixic tak ri tzij ri tz'ibatal pa ri wuj re ri pixab, ri e re tewichibal jacha' ri e re c'okonic.

³⁵ Man c'o ta xa ta ne jun tzij che ronojel ri takaninak wi ri Moises, ri ma ta xuya' u siq'uixic ri Josue chquiwäch conojel ri aj israelib, chi ixokib chi ac'alab, xukuje' ne ri man e qui winakil taj ri e jekel chquixo'l.