Ri Josue 7 - Quiché Bible

Ri macunic ri xuban ri Acan

¹ Jun c'ut chque ri ramak' ri Juda, Acan u bi' u c'ojol ri Carmi, ri' u mam ri Zabdi u xiquin u mam ri Zar, xebuc'am quieb oxib jastak chque ri e tasom che u sachisaxic qui wäch, rumal c'u rech wa' conojel ri aj israelib xebux ajchak'maquib chuwäch ri Ajawaxel chi xc'am ri u yo'm wi takanic ri Ajawaxel chi casachisax u wäch. Rumal c'u rech wa' ri Ajawaxel xnicow ri royowal paquiwi' ri aj israelib.

Ri c'äjisabal wäch rumal ri mac: ri qui ch'äquic cumal ri Hai

² Ri Josue e u takom chi bic jujun achijab kas pa Jerico, rech quebe c'ä pa Hai, ri c'o pa elebal k'ij che ri Betel, chunakaj ri Bet-aben, xuya' takanic chque chi chequila' ri ulew. Xebe c'u che rilic ri Hai,

³ aretak c'u xetzelej ulok xquibij che ri Josue: “Man rajawaxic taj chi ronojel ri tinimit quech'ojin ruc' ri Hai, quieb o xib mil achijab quebubana' che u majixic ri tinimit. Matak la bic ronojel ri tinimit, ri e chajil rech ri tinimit man e q'ui taj.”

⁴ Je c'u ri', oxib mil achijab xepaki' che u banic ch'o'j ruc' ri Hai. Xech'äc c'u cumal ri aj Hai xebanimaj c'u chquiwäch;

⁵ craj c'u ne xequicämisaj juwinak waklajuj (36) aj israelib, ri xequiterenej niq'uiaj c'ut ri kas chuchi' ulok ri roquibal ri tinimit c'ä pa ri paxibal abaj, xequisoc c'ut pa ri xuluxic. Rumal rech wa' ri winak xuban quieb qui c'u'x xechukchubic.

⁶ Ri Josue xukuje' ri e nimak tak tatayib aj Israel xequijis tak ri catz'iak xquiya' ulew pa tak qui jolom che u c'utic ri c'axc'ol; xquimej c'u quib chuwäch ri u caxa ri Ajawaxel xquiya' ri qui palaj cho ri ulew, c'ä xpe na ri xk'ekal.

⁷ Xcha' c'u ri Josue: “¡Ay, Ajawaxel, Ajawaxel! ¿Jasche xban la' chi we tinimit ri' xroc'owisaj ri nima' Jordan? ¿La xa pa lo che ka jachic pa qui k'ab ri amoreyib, rech casachisax ka wäch cumal? ¡C'o ta banom wi xujcanaj ta can ch'käp che ri Jordan!

⁸ ¡Ay, Ajawaxel, Ajawaxel! ¿Jas ta ri cuya' quinbij ta chic camic chi ri Israel animajinak chquiwäch tak ri e qui c'ulel?

⁹ Ri aj cananeyib xukuje' conojel ri e jekel pa ri ulew caquinabej na ri c'ulmatajinak, cujquich'äc c'u na junam, mawi c'u ne ta ri natabal kech cacanajic. ¿Jas c'u lo ri cuc'ulmaj na ri nimalaj bi' la?”

¹⁰ Ri Ajawaxel xutzelej u bixic che: “Chatwalijok. ¿Jas ri caban chi', cho ri ulew?

¹¹ Ri aj israelib e macuninak, quiyojim ri c'ulwächinic ri xinban cuc'. Xequimajij ri jastak ri ya'tal u sachisaxic qui wäch; xequeläk'aj queta'm c'ut chi man utz ta ri caquibano, e qui c'olom c'u chquixo'l ri jastak quech.

¹² Rumal ri' ri aj israelib man que cuintaj quech'äcan paquiwi' ri e qui c'ulel. Quebanimaj na chquiwäch, are' c'u ri camic ri aj israelib takal chque chi casachisax qui wäch. We c'u ri ix man qui sachisaj ta u wäch ri xinya' wi takanic chi casachisax u wäch, man quintakej ta c'olem iwuc'.

¹³ Chatwalijok chamulij ri tinimit. Chabij chque chi chquisuc'umaj quib rech quepe che u tac'abaxic quib chnuwäch chwek, rumal rech chi ri in, ri Ajawaxel xukuje' u Dios ri Israel, je quinbij wa': ‘At, Israel, a majim ri kas ya'tal u sachisaxic u wäch, we c'u man casachisaj ta u wäch xukuje' we man cawesaj ta bic awuc', man catcuin taj catch'äcan paquiwi' ri a c'ulel.’

¹⁴ Chwek chixeltac'al iwonojel pa jujun tak amak', are' c'u ri amak' ri quinc'utu caquitac'aba' na quib pa tak u k'ab achalaxic, ri u k'ab achalaxic ri quinc'utu quebutac'aba' na ri jujun ja winak ri jun ja winak ri quinc'utu quebutac'aba' na ri jujun tak rachijab.

¹⁵ Jachin c'ut ri c'o pa u k'ab ri ya'tal u sachisaxic u wäch, caporox na querachilaj na ri ralaxic xukuje' conojel ri jastak quech, rumal rech chi xuban jun jasach ri man ya'tal ta u banic pa Israel xukuje' chi man xutz'akatisaj ta ri u c'ulwächinic ri Ajawaxel.”

Ri c'äjisabal u wäch ri Acan

¹⁶ Chucab k'ij, ri Josue sibalaj ak'ab xwalijic xuya' c'u takanic chque ri winak chi chebeltac'alok chequitasala' tak quib pa tak amak'. Ri Ajawaxel xuc'ut ri ramak' ri Juda.

¹⁷ Xuban c'ut ri Josue chi ri ramak' ri Juda quebutac'aba' na ri u k'ab rachalaxic chquijujunal are' c'u xc'ut ri u k'ab rachalaxic ri Zar. Chquixo'l c'ut ri aj Zar are xc'ut ri ralaxic ri Zabdi.

¹⁸ Aretak c'u xequitac'aba' quib ri achijab chquijujunal, are' xc'ut ri Acan, ri u c'ojol ri Carmi, ri' u mam ri Zabdi u xiquin u mam c'ut ri Zar, ri aj ramak' ri Juda.

¹⁹ Xubij c'ut ri Josue che ri Acan: “Nu c'ojol, chaya' u k'ij xukuje' chak'ijilaj ri Ajawaxel ri xukuje' u Dios ri Israel, chabij ba' chwe jas ri a banom. ¡Mach'uk chnuwäch!”

²⁰ Ri Acan xutzelej u bixic che: “Kastzij, quink'alajisaj chi in macuninak chuwäch ri Ajawaxel ri u Dios ri Israel. Are' wa' ri xinbano:

²¹ Chquixo'l ri jastak ri xekamajij pa Jerico, xtaki' nu wäch che ri jun je'lalaj c'ul aj Babilon, quieb sient sak puak jurabaj k'an puak ri craj capajan jun libra. Xekaj we jastak ri' chnuwäch, xecanaj c'u can wuc', nu mukum c'u chuxe' ri nu cäbal lic'om ri nu tanim, nu yo'm c'u ri puak chuxe'.”

²² Ri Josue xebutak bic jujun achijab pa ri u cäbal ri lic'om ri Acan, ri xequirika' c'u ronojel ri c'olotal chila' c'o ri puak chuxe'.

²³ Xquimulij xquic'am c'u bic ruc' ri Josue xukuje' chquiwäch ri aj israelib, ri xquiya' chuwäch ri Ajawaxel.

²⁴ Xquic'am c'u bic ri Acan pa ri beya' re Acor junam ruc' ri sak puak, ri c'ul ri jurabaj k'an puak, ri e u c'ojol xukuje' ri e u mia'l, ri e u wacax, ri e u bur xukuje' tak ri u chij, ri u cäbal ri lic'om xukuje' ronojel ri c'o ruc'.

²⁵ Ri Josue xubij che: “¿Jasche xac'am ulok we u q'ueyowal ri' pakawi'? Camic, are' ri Ajawaxel chubana' chi chkaj ri u q'ueyowal pawi' ri xac'am ulok pakawi'.” Xuwi xbitaj wa', conojel ri aj israelib xquicämisaj ri Acan che abaj xukuje' ri e c'o ruc', xequiporoj c'ut.

²⁶ Xya' c'u jumulaj abaj puwi', ri c'ä c'o camic. Rumal rech wa' we c'olbal ri' c'ä cäbix beya' re Acor che. Je xban wa' che u jamarisaxic ri royowal ri Ajawaxel puwi' ri Israel.