Ri Josue 6 - Quiché Bible

Ri xban che u ch'äquic ri Jerico

¹ Man c'o ta jun cacuinic coc bic mawi quel ulok pa Jerico, xetz'apix c'ut ri e u chi' ri tinimit che u to'ic chquiwäch ri aj israelib.

² Are' c'ut ri Ajawaxel xubij che ri Josue: “In nu jachom ri Jerico rachil ri rajawinel xukuje' tak ri e rajch'ojab pa a k'ab.

³ Ix, ajch'ojab ri aj israelib, wakib k'ij chiya' jusut chrij ri tinimit.

⁴ Wukub e cojol tabal tok'ob quenabej na chuwäch ri caxa ri c'o wi ri c'ulwächinic, chquijujunal chcuc'aj jujun trompet re ruc'a' chij, pa ri uwuk k'ij c'ut quiya' na wukub su't chrij ri tinimit, ri e cojol tabal tok'ob caquitakej c'u na cok'isaxic tak ri trompet.

⁵ Aretak c'u i tom chic ri trompet cuban jun rok'ibal ri jalanic, chiraka' i chi' ruc' ronojel ri i chuk'ab, ri nimalaj u tapia ri tinimit cätzak na. Rajawaxic c'ut chi chijujunal quixoc chupam ri tinimit.”

⁶ Ri Josue xebusiq'uij ri e cojol tabal tok'ob xubij c'u chque: “Chic'ama' bic ri caxa ri c'o wi ri u c'ulwächinic ri Ajawaxel, wukub c'ut chiwe chenabej chuwäch ri caxa, cacuc'aj bic trompet quech cuc'a' chij.”

⁷ Che c'u ri tinimit xubij wi: “Jix chiya' jusut chrij ri tinimit. Ri achijab ri quech'ojinic, chenabej chuwäch ri u caxa ri Ajawaxel.”

⁸ Conojel xquiban ri xetak che u banic rumal ri Josue. Ri wukub e cojol tabal tok'ob e benak chuwäch ri caxa ri c'o wi ri u c'ulwächinic ri Ajawaxel, cätajin cacok'isaj ri wukub trompet, benak c'u ri caxa chquij.

⁹ Ri achijab ri e banal ch'o'j e benak chquiwäch ri e cojol tabal tok'ob, are c'u ri q'uialaj winak e benak chrij ri caxa e are tak c'ut ri e cojol tabal tok'ob man caquitanaba' ta c'u cok'esaxic tak ri trompet.

¹⁰ Xuya' c'u takanic ri Josue chque ri ajch'ojab chi che bin ruc' yinelijem, c'ä cuya' na takanic chque che u rakic qui chi' ruc' ronojel ri qui chuk'ab.

Ri u majixic ri Jerico

¹¹ Ri Josue xubano chi ri u caxa ri Ajawaxel xuya' jusut chrij ri tinimit. C'äte c'u ri' xtzelej pa ri kajebal, chila' c'u xcoc'owisaj wi ri chak'ab.

¹² Chucab k'ij, sibalaj ak'ab, xwalij ri Josue e are' tak c'ut ri e cojol tabal tok'ob xquitelej ri u caxa ri Ajawaxel.

¹³ Ri wukub e cojol tabal tok'ob e nabe' chuwäch ri u caxa ri Ajawaxel, man xquitanaba' ta binem mawi xquitanaba' cok'esaxic tak ri qui trompet. Ri achijab ri e banal ch'o'j e nabe chquiwäch, ri niq'uiaj chic e benak chrij ri caxa. Ri trompet man caquitanaba' ta ok'enic.

¹⁴ Chucab k'ij xquiya' chi jusut chrij ri tinimit xetzelej chi c'u pa ri qui kajebal. Wakib k'ij je xquitakej u banic wa'.

¹⁵ Pa ri uwuk k'ij ak'ab xewalijic xebin chi c'u chrij ri tinimit, jacha' ri qui banom canok nabe, pa ri k'ij c'ut ri' xquiya' wukub su't chrij.

¹⁶ Aretak ri e cojol tabal tok'ob xecok'esaj ri trompet chuwuk mul, ri Josue xuya' we takanic ri' chque ri winak: “¡Chiraka' i chi'! Ri Ajawaxel u jachom ri tinimit pa i k'ab.

¹⁷ Ri tinimit, rachil ronojel ri c'o chupam, cätastaj chnimalaj ronojel che u sachisaxic u wäch rumal rech chi je takanic u yo'm ri Ajawaxel. Xuwi cato'tajisax ri qui c'aslemal ri Rahab ri ixok re nim ch'utin xukuje' ri quito'm quib pa ri rachoch, rumal rech chi xebuc'ol ri ya'l tak qui wäch ri xetak ulok.

¹⁸ Are' c'u ri ix, chichajij iwib chi c'o jas mimajij mawi c'o jas michapo chque ri jastak ri e c'o pa ri tinimit u tasom c'ut ri Ajawaxel che u sachisaxic u wäch, we c'u man je quiban wa' quiya' na ri Israel chuxe' c'okonic quic'am c'u na ulok ri quiäksakil puwi'.

¹⁹ Are' c'u ri k'an puak ri sak puak, xukuje' conojel ri jastak ri e re k'an ch'ich' xukuje' ri e re räx ch'ich', e tastal che ri Ajawaxel, queya' c'u na ruc' ri u k'inomal.”

²⁰ Ri winak xquirak qui chi' xukuje' ri trompet xebok'ic. Aretak ri aj israelib xquita' ri cok'ebal tak ri trompet, xquichaplej u rakic qui chi' ruc' ronojel ri qui chuk'ab, xtzak c'ut ri u tapia ri tinimit. Xekaj c'u puwi' ri tinimit, xquimajij c'ut.

²¹ Xequicämisaj c'ut cuc' ch'ich' re ch'o'j ri achijab, ri ixokib, ri c'ojolab ri ri'jab, xukuje' c'u ne tak ri wacax, ri chij, xukuje' tak ri bur. Ronojel c'ut xquisachisaj u wäch.

²² Ri Josue xubij chque ri quieb ya'l tak qui wäch ri xepe can che rilic ri ulew: “Jix cho rachoch Rahab chiwesaj bic chila' junam cuc' ri e rachalaxic, je jacha' ri xichi'j che.”

²³ Ri e are' xeboc pa ri ja xquesaj bic ri Rahab, ri u tat ri u nan, ri e rachalal xukuje' conojel ri rachalaxic, xequic'am c'u bic pa jun c'olbal ri man c'o ta wi jas caquic'ulmaj chrij ri c'olbal ri e kajinak wi ri aj israelib.

²⁴ Xquiporoj c'ut ri tinimit xukuje' ronojel ri c'o chupam. Xuwi c'u xquesaj ri sak puak, ri k'an puak ri jastak re k'an ch'ich' xukuje' re räx ch'ich', ri xquiya' ruc' ri u k'inomal ri Ajawaxel.

²⁵ Ri Josue xutok'obisaj u wäch ri u c'aslemal ri Rahab xukuje' ri e ralaxic, rumal rech chi xebuc'u' ri e ya'l tak qui wäch ri xetak ulok rumal ri Josue che rilic ri Jerico. Kas pa ri k'ij ri' ri e rija'lil ri Rahab xejeki' can chquixo'l ri aj israelib.

²⁶ Jun chi'nic ri kas cäban na xcha' c'ut ri Josue: “C'okotajinak chuwäch ri Ajawaxel ri cutijtobej u walijisaxic ri tinimit Jerico. Checoj ri u tac'alibal puwi' ri u c'ojol ri nabeal, puwi' chi c'ut ri q'uisbal u c'ojol quecoj tak ri e u tz'apibal ri oquibal.”

²⁷ Ri Ajawaxel xuto' ri Josue, xjabun c'ut ri u tzijol ri Josue pa ronojel ri ulew.