Ri Josue 4 - Quiché Bible

Ri cablajuj abaj ri xec'am chupam ri Jordan

¹ Aretak c'u conojel e oc'owinak chic chupam ri nima' Jordan, ri Ajawaxel xubij che ri Josue:

² “Chebacha' cablajuj achijab ri e re ri tinimit, jujun chquixo'l jujun amak',

³ chabij c'u chque chi chquesaj cablajuj abaj pa u niq'uiajil ri nima', pa ri c'olbal ri e tac'atoj wi ri e cojol tabal tok'ob, chequic'ama' c'u bic chequiya' c'ut pa ri c'olbal ri quebekaj wi camic chak'ab.”

⁴ Xebusiq'uij c'ut ri Josue ri cablajuj achijab ri e chatajinak rumal,

⁵ xubij c'u chque: “Chixoc c'ä pa u niq'uiajil ri Jordan, chuwäch ri u caxa' ri Ajawaxel, ri i Dios, chijujunal c'ut chiya' jujun tak abaj chila' puwi' ri i teleb, jun abaj che u q'uexwäch jun ramak' ri Israel, rech e cablajuj chi conojel.

⁶ Quebajwataj wa' chiwe che jun c'utbal, pa tak ri k'ij ri quepe na, aretak ri e iwalc'ual caquic'ot na i chi, caquibij na: ‘¿Jas ri quelcaquibij wa' we abaj ri'?’

⁷ Ix quibij na chque: ‘Aretak ri caxa ri c'o wi ri u c'ulwächinic ri Ajawaxel xoc'ow chupam ri Jordan, ri u ja'il ri nima' xuk'at rib chuwäch ri caxa. We abaj tak ri' quebajwatajic rech amak'el canataj chque ri aj israelib ri xc'ulmataj waral.’ ”

⁸ Ri e are' xquiban ri takanic ri xuya' ri Josue chque. Xequic'am cablajuj abaj ri e c'o chupam ri Jordan, jun che qui q'uexwäch jujun ramak' ri Israel, xequic'am c'u bic c'ä pa ri kajebal, chila' c'u xequinutu' wi, jacha' ri u bim ri Ajawaxel che ri Josue.

⁹ Ri Josue xebucoj chi c'u cablajuj abaj pa ri c'olbal chupam ri nima' ri xetaq'ui' wi ri e cojol tabal tok'ob ri e uc'aninak bicri caxa ri c'o wi ri c'ulwächinic. We abaj ri' c'ä e c'o c'u chila' camic.

¹⁰ Ri e cojol tabal tok'ob ri e uc'aninak bic ri caxa ri c'o wi ri c'ulwächinic xecanaj pa u niq'uiajil ri Jordan aretak ri aj israelib cätajin quequiban conojel ri jastak ri xetak che qui banic rumal ri Ajawaxel rumal ri Josue. Ri winak xeboc'ow aninak,

¹¹ aretak c'u conojel e k'axenak chic ch'käp, xquiq'uis oc'owem ri e cojol tabal tok'ob ri e uc'aninak ri u caxa ri Ajawaxel, xenabej c'u chuwäch ronojel ri tinimit.

¹² Xukuje' xek'ax ch'käp che ri nima' ri ajch'ojab aj ramak' ri Ruben ri Gad xukuje' ri e rech ri pa niq'uiaj ramak' ri Manases. E cuc'am tak ri qui ch'ojibal xeboc'owic, e benak c'u chquiwäch ri niq'uiaj aj israelib chic, je jas ri takanic ri u yo'm ri Moises chque.

¹³ Xa col man e cawinak mil ri achijab ri e cuc'am tak qui ch'ojibal e suc'umatal che u banic ri ch'o'j xeboc'ow chuwäch ri Ajawaxel, xebe pa ri lianic chunakaj ri Jerico.

¹⁴ Pa ri k'ij ri' ri Ajawaxel xubano chi ronojel Israel chumayijij xukuje' chi nim chi rila' wi ri Josue, jacha' ri xuban che ri Moises pa ronojel ri u c'aslemal.

¹⁵ Xubij c'ut ri Ajawaxel che ri Josue:

¹⁶ “Che ba' taka' ri e cojol tabal tok'ob ri e uc'aninak ri caxa ri c'o wi ri c'ulwächinic, chi chebel ulok chupam ri Jordan.”

¹⁷ Ri Josue xuya' takanic chque chi chebel ulok,

¹⁸ xuwi c'u xebel ulok ri e cojol tabal tok'ob pa ri Jordan xquiya' c'ut ri cakan pa jun chaki'j c'olbal, ri u ja'il ri nima' xtzelej pa ri u binibal xpulin chi c'u ri u chi' jacha' ri nabe'.

¹⁹ Ri aj israelib xebel bic chunakaj ri Jordan pa ri lajuj rajilabal ri nabe ic', xebekaj c'u pa Jilgal, pa ri elebal k'ij che ri Jerico.

²⁰ Chila' c'u xebuya' wi ri Josue ri cablajuj abaj ri xec'am ulok chupam ri Jordan.

²¹ Xubij c'u chque ri aj israelib: “Pa tak ri k'ij ri quepe na, aretak ri e iwalc'ual caquic'ot na i chi': ‘¿Jas quel caquibij tak wa' we abaj ri'?’,

²² chebitzijoj chque ri xquiban ri aj israelib xeboc'ow chupam ri nima' Jordan pa chaki'jal,

²³ xukuje' ri xuban ri Ajawaxel ri u Dios xuchaki'jarisaj ri u ja'il ri Jordan aretak xixoc'ow ix, jacha' ri u chaki'jarisaxic canok ri Quiäk Plo aretak xujoc'ow uj.

²⁴ Jeri' conojel ri tinimit ri e c'o cho ri uwächulew caquetamaj na chi sibalaj nim ri u cuinem ri Ajawaxel, are' c'u ri ix nim quiwil wi na amak'el ri Ajawaxel ri i Dios.”