Ri Josue 3 - Quiché Bible

Ri aj israelib queboc'ow pa ri Jordan

¹ Chucab k'ij, sibalaj ak'ab, ri Josue xukuje' conojel ri aj israelib xebel bic pa Sitim xebopan chuchi' ri nima' Jordan c'ä majok c'u que k'axic xekaj na chila'.

² Aretak c'u xoc'ow oxib k'ij ri e c'amal tak be xquisolij ri kajebal.

³ Xquiya' c'ut we takanic ri' chque ri aj israelib: “Xuwi quiwilo chi aretak coc'ow ri u caxa ri Ajawaxel, c'amom bic cumal ri e cojol tabal tok'ob aj levitib, chixel bic jawije' tak ri ix c'o wi chiterenej c'ut.

⁴ Jeri' quiwetamaj na jawije' ri quixbe wi na, man c'o ta c'u jun chiwe oc'owinak ta nabe pa we be ri'. Man quixkeb ta c'ut ruc' ri caxa', xane' amak'el chixcanaj chrij, chc'ol jun mil quieb sient (1200) bara' i xo'l ruc'.”

⁵ Xubij c'u ri Josue chque “Chi josk'ila' iwib, rumal rech chi chwek quiwil na ri Ajawaxel quebuban tak mayibal.”

⁶ Chque tak ri e cojol tabal tok'ob xubij chque: “Chic'ama' ri caxa ri c'o wi ri c'ulwächinic chixoc'ow c'u chupam ri nima' chquiwäch ri winak.” Ri e cojol tabal tok'ob xquic'am ri caxa ri c'o wi ri c'ulwächinic xenabej c'u chquiwäch ri winak.

⁷ Xubij c'u ri Ajawaxel che ri Josue: “Camic quinchaplej bic u nimarisaxic a k'ij chquiwäch ri aj israelib. Jeri' ri e are' caquil na chi in c'o awuc' jacha' ri xinc'oji' ruc' ri Moises.

⁸ At chebataka' ri e cojol tabal tok'ob chi chquic'ama' bic ri caxa ri c'o wi ri c'ulwächinic aretak c'u, chebopan chuchi' ri Jordan, quetaq'ui chupam ri nima'.”

⁹ Xubij c'u ri Josue chque ri aj israelib: “Chitatabej ri cubij ri Ajawaxel ri i Dios.

¹⁰ Are' cac'utuw wa' chi ri c'aslic Dios c'o pa i niq'uiajil, quebupac c'ut ri aj cananeyib ri quebirik pa ri i be, ri aj hititib, ri aj hebeyib, ri aj perezeyib, ri aj jerjeseyib, ri aj amoreyib xukuje' ri aj jebuseyib.

¹¹ Chiwila', ri caxa ri c'o wi ri u c'ulwächinic ri Ajawaxel ri aj chak'e ronojel ri uwächulew cak'ax chupam ri Jordan chiwäch.

¹² Rumal ri', chebicha' ba' cablajuj achijab, jun che qui jujunal ri cablajuj amak' aj israelib.

¹³ Aretak ri e cojol tabal tok'ob ri e uc'aninak ri u caxa ri Ajawaxel, ri Ajawaxel re ronojel ri uwächulew cäquinim ri cakan chupam ri ja', ri nima' cuk'at na rib pa quieb, ri ja' ri cäpe ajsic cutanaba' binem cuk'il na rib cux na jun nimalaj cho.”

¹⁴ Ri aj israelib xebel ulok chupam tak ri qui cäbal ri lic'om ri e jekel wi che oc'owem chupam ri nima', chquiwäch c'u e benak wi ri e cojol tabal tok'ob ri e uc'aninak ri caxa ri c'o wi ri c'ulwächinic.

¹⁵ Xak xuwi c'u xeboc ri e cojol tabal tok'ob chupam ri nima' xech'aki' c'u ri cakan rumal ri ja' ri c'o chuchi' (pa ri k'ijol ri cayac ri u wächinic ri ulew ri Jordan capulinic) ri ja' ri petinak ajsic xutanaba' binem xuk'il rib xux jun nimalaj cho. Sibalaj naj xcanaj wi, pa Adam, ri tinimit ri c'o chunakaj ri Saretan.

¹⁶ Are' c'u ri ja' ri benak pa ri Cäminak Cho xutakej binem c'ä xq'uis na bic. Jewa' ri xc'ulmatajic aretak xuban quieb ri ja' rech ri nima', ri aj israelib xek'ax chupam chuwäch ri tinimit Jerico.

¹⁷ Ronojel ri tinimit xoc'ow chupam ri Jordan pa chaki'jal, aretak ri e cojol tabal tok'ob ri e uc'aninak ri caxa ri c'o wi ri u c'ulwächinic ri Ajawaxel canajinak pa u niq'uiajil ri Jordan, co tac'al pa chaki'j ulew.