Ri Josue 21 - Quiché Bible

Ri qui tinimit ri aj levitib

^1-2 Ri e c'amal tak qui be ri jujun tak ja winak aj levitib xebe pa Sil, pa ri ulew Canaan, rech quebetzijon na ruc' ri Eleazar, ri cojol tabal tok'ob, ruc' ri Josue xukuje' cuc' ri c'amal tak qui be ri jujun tak ja winak pa tak ri camak' ri aj israelib. Chila' xquibij wi chque: “Rumal ri Moises, ri Ajawaxel xuya' takanic chi cheyok tak tinimit chke jawije' ri cujjeki' wi, e cachil tak juyub re yuk'bal chque tak ri ka waj.”

³ E are' c'ut ri aj israelib xequiya' chque ri aj levitib jujun chque tak ri qui tinimit xukuje' tak juyub re yuk'bal, je jacha' ri bim rumal ri Ajawaxel.

⁴ Nabe xban ri taklebenic chque ri u k'ab achalaxic aj levitib ri e petinak che ri Coat. Chque ri aj coatib ri e rija'lil ri Aaron, ri cojol tabal tok'ob, xya'taj oxlajuj tak tinimit chque, ri e rech ri ramak' ri Juda, ri Simeon, xukuje' ri Benjamin.

⁵ Chque ri niq'uiaj aj coatib chic xequitaklebej lajuj tak tinimit, ri e rech ri ramak' ri Eprain ri Dan xukuje' ri e rech ri pa niq'uiaj ramak' ri Manases.

⁶ Chuwi' chi c'u wa', e are' chic ri e u k'ab cachalaxic ri e aj levitib ri e petinak che ri Jerson xya'taj chque pa taklebenic oxlajuj tak tinimit, ri e rech ri ramak' ri Isacar, ri Aser, ri Neptali xukuje' ri pa niq'uiaj che ri ramak' ri Manases ri c'o pa Basan.

⁷ Chque chi c'ut ri u k'ab cachalaxic ri aj levitib ri e petinak che ri Merar xequitaklebej cablajuj tak tinimit, ri e rech; ri ramak' ri Ruben, ri Gad, xukuje' ri Zabulon.

⁸ Ri aj israelib xequijach chquiwäch ri aj levitib, pa taklebenic, tak tinimit xukuje' tak juyub re yuk'bal, je jacha' ri takanic ri u yo'm ri Ajawaxel rumal ri Moises.

⁹ We tinimit tak ri' ri quenatax tak ri qui bi', e are' xeyo'w ri aj ramak' ri Juda xukuje' ri ramak' ri Simeon,

¹⁰ xequirik c'ut ri aj levitib ri e qui tz'akatil ri e u k'ab rachalaxic ri Coat, ri e petinak che ri Aaron, e are' c'u xerikow ri nabe taklebenic.

¹¹ Pa ri c'ache'laj ulew re ri Juda xeya' ri Quiriat-arba chque, ri u bixic, ri Hebron, u chuch qui tinimit ri e u k'ab tak rachalaxic ri tac'atic Anac, e cachil tak ri qui juyub re yuk'bal.

¹² E are' c'ut ri rulew xukuje' ri e u k'ab tak u tinimit we tinimit ri' xeya' che ri rechbal ri Caleb, ri u c'ojol ri Jepon.

¹³ Man xuwi ta c'ut ri Hebron, ri tinimit re to'bal ib xya' chque ri man caquichomaj ta caquiban jun cämic, xeya' chque ri e u k'ab tak rachalaxic ri cojol tabal tok'ob ri Aaron we tinimit tak ri': Libna,

¹⁴ Jatir, Estemo,

¹⁵ Holon, Debir,

¹⁶ Ain, Jut xukuje' Bet-sems. We belejeb tak tinimit ri' e c'o tak ri culew re yuk'bal.

¹⁷ Che c'ut ri ramak' ri Benjamin xeya' che ri Gabaon, ri Jeb,

¹⁸ ri Anatot xukuje' ri Almon (e quiejeb tak tinimit e cachil tak ri qui juyub re yuk'bal),

¹⁹ jeri' chi ri qui tinimit tak ri e cojol tabal tok'ob ri e rija'l ri Aaron e oxlajuj chi conojel, chquijujunal e c'o tak ri qui juyub re yuk'bal.

²⁰ Chque chic ri niq'uiaj quija'l ri aj levitib ri e u k'ab rachalaxic ri Coat xejach tak tinimit chquiwäch ri e rech ri ramak' ri Eprain.

²¹ Chque c'ut ri u juyub ri Eprain xeya' chque ri Siquem, jacha' tinimit re to'bal ib che jachin ri man cuchomaj taj cuban jun cämic, xukuje' c'u ri Jezer,

²² ri kibsaim xukuje' ri Bet-horon, e quiejeb tak tinimit e c'o tak ri qui juyub yuk'bal.

²³ Chque ri aj ramak' ri Dan xequic'am wi ri Eltec, ri Jibeton,

²⁴ ri Ajalon xukuje' ri Gat-rimon, e quiejeb tak tinimit e cachil tak ri qui juyub re yuk'bal;

²⁵ che c'ut ri pa niq'uiaj ramak' ri Manases xequic'am quieb tak tinimit, ri Taanac xukuje' ri Gat-rimon, e cachil tak ri qui juyub re yuk'bal;

²⁶ jeri' ri qui tinimit tak ri e u k'ab rachalaxic tak ri aj coatib e lajuj chi conojel, e cachil tak ri kas qui juyub re yuk'bal.

²⁷ Chque ri aj levitib ri e rija'l ri Jerson xeya' quieb tak tinimit chque, ri e rech ri pa niq'uiaj ramak' ri Manases, e cachil tak ri kas qui juyub re yuk'bal: ri Golan, ri c'o pa Basan, rech cajwataj che jacha' jun tinimit re to'bal ib, xukuje' ri Beester.

²⁸ Che ri ramak' ri Isacar xeya' chque, ri Sison, ri Daberat,

²⁹ ri Jarmut, xukuje' ri En-ganim (e quiejeb tak tinimit), e cachil tak ri kas qui juyub que yuk'bal.

³⁰ Che ri ramak' ri Aser xeya' chque, ri Misael, ri Abdon,

³¹ ri Helcat xukuje' ri Rehob (e quiejeb tak tinimit), e cachil tak ri kas qui juyub que yuk'bal.

³² Che ri ramak' ri Neptali xeya' oxib tak tinimit chque e cachil ri kas e qui juyub que yuk'bal: ri Seds ri c'o pa Galiley, rech cajwataj jacha' che jun tinimit re to'bal ib, ri Hamot-dor xukuje' ri Cartan;

³³ jeri' chi ri qui tinimit tak ri e u k'ab cachalaxic ri jersonib e oxlajuj chi conojel, chquijujunal e cachil tak ri qui juyub re yuk'bal.

³⁴ Chque c'ut ri e u k'ab achalaxic aj levitib ri c'ä e c'o na, e are' tak rija'lil ri Merar, xequiya' chque che ri Zabulon, ri Jocneam, Cart,

³⁵ Dimna xukuje' ri Naalal, e quiejeb tinimit tak e cachil tak ri qui juyub que yuk'bal.

³⁶ Che ri ramak' ri Ruben xeya' ri Beser, ri Jahaz,

³⁷ ri Cademot xukuje' ri Mepaat, e quiejeb tak tinimit e cachil ri kas qui juyub que yuk'bal.

³⁸ Che ri ramak' ri Gad xequiya' chque, ri Ramot re Galaad, rech chajwataj jacha' jun tinimit re to'bal ib, ri Mahanaim,

³⁹ ri Hesbon xukuje' ri Jazer (e quiejeb tak tinimit e cachil tak ri kas qui juyub que yuk'bal),

⁴⁰ jeri' chi tak ri tinimit ri xequitaklebej ri e u k'ab cachalaxic ri aj levitib ri c'ä e canajinak canok, ri u bixic, ri e rija'lil ri Merar, e cablajuj chi conojel.

⁴¹ Ri tak qui tinimit ri aj levitib chquixo'l ri aj israelib e cawinak wajxakib chi conojel, chquijujunal e cachil tak ri kas qui juyub que yuk'bal,

⁴² ri qui sutim quij ri tinimit tak chquijujunal. E je conojel we tinimit ri'.

Ri Ajawaxel are' jic

⁴³ Jewa' xuban ri Ajawaxel che u ya'ic chque ri aj israelib ri ulew ri' ruc' chi'nic ri kas cäban na, chi cuya' chque ri e qui mam xquechbej c'ut xecanaj c'u can chila'.

⁴⁴ Ri Ajawaxel xutz'akatisaj ri xuchi'j chque, xuya' c'u jamaril chque pa ronojel ri ulew. Ri e qui c'ulel man xecuin taj xech'ojin ta chi cuc', are' c'ut xyo'w ri Ajawaxel chque ri ch'äcanic paquiwi' ri qui c'ulel.

⁴⁵ Mawi ta ne xa ta jun tzij xcanajic ri ma ta xtz'akatic chque conojel ri utzalaj tak chi'nic ri xebuchi'j ri Ajawaxel chque ri aj israelib.