Ri Josue 2 - Quiché Bible

Ri Josue xebutak bic ri ya'l tak qui wäch pa Jerico

¹ Kas pa Sitim, ri Josue xebutak bic quieb ya'l tak qui wäch chic'uyal, xubij c'u chque: “Jix che rilic ri ulew xukuje' ri tinimit Jerico.” Xebe c'ut, xebopan cho rachoch jun ixok re nim ch'utin ri jekel pa Jerico Rahab ri u bi', chila' c'u xcoc'owisaj wi ri jun ak'ab.

² C'o c'u lo jachin xyo'w u bixic che ri rajawinel ri Jerico, je xbix wa' che: “Jujun aj israelib chak'ab chic xebulic e petinak che rilic ri ulew.”

³ Xutak c'u u bixic ri ajawinel che ri Rahab: “Chebawesaj ulok ri achijab ri xepe che awilic ri e c'o chupam ri awachoch, xa c'u e ya'l tak qui wäch.”

⁴ E u c'olom chi c'ut ri ixok, xubij c'ut: “Kastzij chi xepe jujun achijab che nu solixic, man c'u xinwetamaj taj jawije' quepewi.

⁵ Pa ri roquibal ak'ab xebec chi' c'ut catz'apix ri u chi' ri tinimit, man weta'm ta c'ut jawije' ri xebe wi. We c'u quixbe aninak che cokataxic, quixcuinic quebirika'.”

⁶ Kas c'u ne e u pakabam ri ixok, puwi' ri ja, quic'u'm c'u quib chila', pa jujun tak yataj lino ri cätajin quechaki'jarisaxic.

⁷ Ri e rachijab ri ajawinel xequiterenej pa cakan chusuq'uil ri nima' Jordan, c'ä xebopan na jawije' e c'o wi ri k'axebal. Xuwi c'u xebel bic ri ajch'ojab, xtz'apix ri u chi' ri tinimit.

⁸ C'ä majok c'u chewar ri ya'l tak qui wäch, ri Rahab xpaki' puwi' ri ja xubij c'u chque:

⁹ “In weta'm chi ri Ajawaxel u yo'm we ulew ri' chiwe, u banom c'ut chi ri uj sibalaj ka xe'n kib chiwäch. Conojel ri e jekel waral e cäminak che xe'n ib u mac iwech.

¹⁰ Keta'm chi aretak xixel ulok pa Ejipt, ri Ajawaxel xuchaki'jarisaj ri u ja'il ri Quiäk Plo rech cuya' quixoc'owic. Xukuje' keta'm chi ri ix xiq'uis tzij puwi' ri Sehon xukuje' ri Og, ri quieb cajawinel ri aj amoreyib ri' e c'o ch'käp che ri Jordan.

¹¹ Sibalaj nim ri xe'n ib ri i yo'm chke aretak xketamaj, chi man c'o ta jachin cuchajij ta anima' che u tac'abaxic rib chiwäch. Rumal rech chi ri Ajawaxel, ri i Dios, are' ri Dios ri c'o chicaj xukuje' iquim cho ri uwächulew.

¹² Rumal ri' quintz'onoj chiwe chi chibana' ri chi'nic ri kas cäban na chnuwäch waral, rumal ri Ajawaxel, chi quitok'obisaj qui wäch ri walaxic, je jas ri tok'obisam wächaj ri xinban in chiwe. Chiya' c'u jun etal chwe ri quinjiquiba' ta wi nu c'u'x,

¹³ chisacha' c'u u mac ri nu tat, ri nu nan, ri e nu xibal xukuje' tak ri canab, xukuje' conojel ri jastak quech. ¡Chujito'tajisaj chuwäch ri cämical!”

¹⁴ Ri achijab xquitzelej u bixic che: “Cakajach na ri ka c'aslemal che qui q'uexwäch ri i c'aslemal, xuwi ta ne we man cawesaj ka tzijol. Aretak ri Ajawaxel u yo'm chic we ulew ri' chke, uj cakaban na utzil chawe ruc' tz'akatil.”

¹⁵ Rumal c'u rech chi jekel ri Rahab chupam jun ja ri yacom puwi' ri u tapia ri tinimit, ruc' jun colob xebukasaj bic pa ri wenta'n.

¹⁶ Xubij c'u chque: “Jix pa ri c'ache'laj, rech man quixrik ta cumal ri quixtzucunic. Oxib k'ij chi c'u' na iwib chila', c'ä quetzelej na ulok pa ri tinimit. C'äte c'u ri' cuya' quitakej ri i be.”

¹⁷ Ri achijab xquitzelej u bixic che: “Uj cakatz'akatisaj na ri chi'nic ri kas cäban na, ri ka bim ri xatz'onoj chi cakaban chawe.

¹⁸ Aretak c'u chujoc pa ri ulew, ri at catzayiba' we quiäk colop ri' chrij ri u chi' ri wenta'n ri xakasabej bic kech. Chebamulij ba' cho awachoch, ri a tat, ri a nan, ri e awachalal xukuje' conojel ri e ralaxic ri a tat.

¹⁹ We c'o quel bic pa ri awachoch, are' ajchak'mac ri' che ri u cämical; man c'o ta ka mac che. We c'u c'o jachin cächapow ri e c'o awuc' pa ri awachoch, uj cujkajben wa'.

²⁰ We c'u c'o cujatzijoj wi, ri uj man cakatz'akatisaj ta chic u banic ri chi'nic ri kas cäban na ri uj chokinak chawäch.”

²¹ “Je ba' chbanok,” xutzelej u bixic ri ixok. “Chiwila' ba' iwib,” xcha' bic chque, xebe c'ut ri achijab. Xuxim c'u na ri quiäk colob ri ixok che ri wenta'n.

²² Ri quieb ya'l qui wäch xepaki' pa tak ri c'ache'laj oxib k'ij c'ut xquic'ol quib chila', cätajin c'u quetzucux cumal ri ajch'ojab pa conojel tak c'olbal man c'u xecuin ta che qui rikic, chuq'uisbalil c'ut xetzelej pa Jerico.

²³ Xekaj c'u ulok ri ya'l qui wäch pa tak ri c'ache'laj xeboc'ow chupam ri nima' Jordan xetzelej c'u pa ri c'olbal ri c'o wi ri Josue:

²⁴ Xquibij che: “Ri Ajawaxel u jachom ronojel ri ulew pa ka k'ab. Rumal kech uj, conojel ri winak ri e c'o chila' e cäminak che xe'n ib.”