Ri Josue 18 - Quiché Bible

Ri ulew ri quech ri niq'uiaj tak amak' chic

¹ Conojel ri tinimit aj israelib xquimulij quib pa Sil, che u jekebaxic ri Lic'om Ja re rikoj ib ruc' ri Dios. Pa tak ri k'ij ri' ri ulew ch'äctajinak chic,

² c'ä e canajinak c'u ne na wukub amak' aj israelib ri man yo'm ta ri culew.

³ Xubij c'u ri Josue chque ri aj Israel: “¿Jas ri iweyem chi man ic'amom ta ri ulew ri yo'm che iwechbal rumal ri Ajawaxel, ri qui Dios ri e i mam?

⁴ Chebicha' ox ox achijab chquixo'l jujun amak', rech quebentak bic che u solixic ri ulew chelquiya' c'u u bixic chwe jas ri caban che u jachic.

⁵ We achijab ri' che qui bana' wukub ch'akatak chque ri ulew, che quitasa' c'u can ri rulew ri Juda ri e c'o pa ri u mox k'ab elebal k'ij, xukuje' ri e culew ri e rija'lil ri Jose ri e c'o pa ri riquiak'ab ri elebal k'ij.

⁶ Aretak c'u qui jachom chic ri ulew pa wukub ch'akatak, chelquiya' u bixic chwe, jas ri u banom quinyuj c'ut ri u jachic chque chuwäch ri Ajawaxel.

⁷ Chque ri aj levitib man c'o ta jun ch'akap caya' ta chque, ri ya'tajinak chque are', are' ri u chac ri cojol tabal tok'ob chuwäch ri Ajawaxel. E are' c'ut ri ramak' ri Gad ri ramak' ri Ruben xukuje' ri pa niq'uiaj ramak' ri Manases, c'o chic ri quechbal pa ri ulew ri c'o pa ri elebal k'ij che ri nima' Jordan ri xuya' ri Moises chque, ri pataninel rech ri Ajawaxel.”

⁸ Ri quebe che rilic ri ulew jas u banom rech quelquiya' u bixic, xebel bic, ri Josue xuya' bic qui takquil xubij chque: “Jix pa ronojel ri ulew chijacha' u wäch, chixtzelej c'u ulok xuwi cabantaj iwumal, rech quinyuj waral pa Sil, chuwäch ri Ajawaxel.”

⁹ We achijab ri' xquibinibej c'u ronojel ri ulew, xequijach qui wäch ri tak ri tinimit pa wukub mulaj xquitz'ibaj c'u ronojel. Xetzelej c'u ulok pa ri kajebal ri c'o pa Sil, ri c'o wi ri Josue.

¹⁰ Xujach c'u ri Josue ri ulew chquixo'l tak ri aj israelib chila' pa Sil. Xuyuj c'u u jachic chuwäch ri Ajawaxel.

Ri rulew ri ramak' ri Benjamin

¹¹ Aretak xbantaj ri yujinic, ri e u k'ab rachalaxic ri ramak' ri Benjamin xquitaklebej tak ri culew chquixo'l tak ri culew ri aj Juda xukuje' ri aj Jose.

¹² Ri u c'ulbatil we ulew ri' cachaptaj, pa ri riquiak'ab elebal k'ij, che ri nima' Jordan, culic' c'u rib cabe pa ri riquiak'ab ri Jerico, cataken c'u pa ri c'ache'laj ulew cabe chusuq'uil ri u kajebal k'ij, quetakal pa ri chaki'j uwo sak re Bet-aben.

¹³ Cataken chi c'u bic cabe pa Luz (ri u bixic Betel) pa ri u mox elebal k'ij, quekaj c'ä pa Atarot-adar pa ri juyub ri c'o pa ri u mox elebal k'ij che ri Bet-horon ri c'o iquim;

¹⁴ cucot c'u rib ri c'ulbat cabe chusuq'uil ri Plo Mediteran pa ri u mox elebal k'ij che ri juyub Quiriat-baal ri xukuje' cäbix Quiriat-jearim che ri c'o pa u k'ab ri ramak' ri Juda. Are' c'ulbatil wa' rech ri u kajebal k'ij.

¹⁵ Ri c'ulbat aj u mox elebal k'ij quel chuchi' ri Quiriat-jearim, chusuq'uil ri u kajebal k'ij copan c'ä ruc' ri bulbux ja' ri c'o pa Nepto,

¹⁶ cakaj c'u bic c'ä chuq'uisbalil ri juyub ri c'o chuwäch ri u beya' ri Ben-hinom, pa ri riquiak'ab ri elebal k'ij che ri u beya' ri Hinom, coc'ow pa ri u mox elebal k'ij pa ri pakapic re Jebus, catakenic copan c'ä ruc' ri bulbux ja' re En-rojel.

¹⁷ Catzeletaj chusuq'uil ri riquiak'ab ri elebal k'ij quel pa En-sems, cataken chi c'u bic chila' copan pa Jelilot, ri c'o chuwäch ri pakapic re Adumin, cakaj bic copan c'ä ruc' ri xak ri c'o pa Bohan Ben-Ruben;

¹⁸ coc'ow c'ut pa ri riquiak'ab ri elebal k'ij pa u xcut ri pakapic, chuwäch ri beya' re ri Jordan, cakaj bic copan c'ä chuchi' ri Jordan

¹⁹ coc'ow pa ri riquiak'ab elebal k'ij che ri Bet-hogla, rech queq'uis pa ri oquibal ri c'o pa ri riquiak'ab ri Cäminak cho ri quekaj wi ri Jordan. Are c'ulbatil wa' pa ri u mox elebal k'ij.

²⁰ Ri nima' Jordan are' c'ulbatil pa ri elebal k'ij. E are' tak c'ulbatil wa' re ri ulew ri xjach chquiwäch ri e u k'ab rachalaxic tak ri ramak' ri Benjamin.

²¹ Ri tak tinimit ri xequitaklebej ri e u k'ab rachalaxic tak ri ramak' ri Benjamin e are' tak wa': ri Jerico, Bet-hogla, Emec-casis,

²² Bet-arab, Zemaraim, Betel,

²³ Abim, Para, Opra,

²⁴ Quepar-haamon, Opni xukuje' ri Jeb, jacha' ri e cablajuj (12) tak tinimit e cachil tak ri e u k'ab tak qui tinimit.

²⁵ Xak c'u e u tz'akat chic ri Gabaon, ri Ram, ri Beerot,

²⁶ ri Mizpa, ri Capir, ri Mos,

²⁷ ri Requem, ri Irpeel, ri Taral,

²⁸ ri Zel, ri Elep, ri Jebus (ri u bixic ri Jerusalen), ri Gabaa xukuje' ri Quiriat: cajlajuj (14) tak tinimit e cachil tak ri e u k'ab tak qui tinimit. Are' ulew wa' ri xquitaklebej ri e u k'ab rachalaxic ri ramak' ri Benjamin.