Ri Josue 13 - Quiché Bible

Ri ulew ri cajwataj na u ch'äquic

¹ Aretak c'u sibalaj nim winak chic ri Josue, ri Ajawaxel xubij che: “Ri at sibalaj e oc'owinak chic ri a junab, sibalaj c'u nim na ri ulew ri cajwataj na u ch'äquic.

² C'ä cäraj na ronojel ri culew ri pilisteyib xukuje' ri culew ri jerjeseyib,

³ ri cäbe chuchi' ri nima' Sihor, pa ri elebal k'ij che ri Ejipt, quetakal c'ä pa ri u c'ulbatil ri Ecron, pa ri iquiak'ab, culew c'ut ri aj cananeyib wa'; e c'o c'u job quinimal tak ri pilisteyib chila', ri e are' wa' ri Gaz, ri Asdod, ri Ascalon, ri Gat xukuje' ri Ecron. C'o xukuje' ri culew ri abeyib,

⁴ pa ri u mox relebal k'ij, xukuje' ronojel ri culew ri cananeyib, cachaptaj cuc' tak ri qui tinimit ri aj Sidon copan pa Apec, pa ri qui c'ulbatil ri amoreyib.

⁵ C'o na xukuje' ri culew ri jibleyib, xukuje' ronojel ri Libano chusuq'uil ri elebal k'ij, kas pa Baal-gad, chuxe' ri Hermon, c'ä pa ri oquibal pa Hamat.

⁶ Quebenwesaj bic ri sidonib chquiwäch ri aj israelib xukuje' ri e c'o pa tak ri c'ache'laj, kas ruc' ri Libano c'ä pa Misrepot-maim. Ri at are' chatoc il che ri jachanic chajacha' c'ut ri ulew pa qui k'ab ri aj israelib je jacha' ri takanic ri nu yo'm chawe.

⁷ Chajacha' we ulew ri' chquiwäch ri belejeb amak' xukuje' che ri pa niq'uiaj ramak' ri Manases.”

Ri ulew tak re Manases, re Ruben xukuje' re ri Gad

⁸ Ri amak' tak aj Ruben aj Gad xukuje' ri aj pa niq'uiaj ramak' ri Manases xquic'am ri quechbal aretak ri Moises xebuya' ri ulew chque ri e c'o pa ri elebal k'ij che ri Jordan.

⁹ Are' xya'taj ri ulew chque ri cächaptaj bic kas pa Aroer, chuchi' ri nima' Arnon, xukuje' ri tinimit ri c'o pa u niq'uiajil ri beya', xukuje' ronojel ri u lianic ri Medeb, copan c'ä pa Dibon,

¹⁰ e are' c'u juch'ob tak ri u tinimit ri Sehon, ri cajawinel ri amoreyib re Hesbon, copan c'ä pa ri qui c'ulbatil ri aj amonib.

¹¹ Xuc'am xukuje' ri Galaad chque xukuje' ri culew ri jesureyib xukuje' ri quech ri maacatib, cutz'akatij c'u ri juyub Hermon xukuje' ronojel ri ulew re Basan copan c'ä pa Salca,

¹² carachilaj ri xtakan wi ri Og, ajawinel pa Basan, ri xajawin pa Astarot xukuje' Edrey, are' c'u wa' ri q'uisbal quech ri repaimib, ri xebuch'äc ri Moises ri xerokataj bic pa jun c'olbal chic.

¹³ Ri aj Jesur xukuje' ri aj Maac man xebesax ta bic chila', xquitakej jekelem chquixo'l ri aj israelib jacha' ri qui banom camic.

¹⁴ Che ri ramak' ri Levi man e c'o ta echbal xuya' ri Moises chque, ri quechbal e are' ri tabal tak tok'ob ri queporox che u ya'ic u k'ij ri Ajawaxel xukuje' u Dios ri Israel, kas are' c'u ne bininak canok.

¹⁵ Ri Moises xebujach ulew che ri ramak' ri Ruben je jas ri cajilabal ri e u k'ab rachalaxic,

¹⁶ xulic' c'u bic rib ri rulew kas pa Aroer, chuchi' ri nima' Arnon, kas ruc' ri tinimit ri c'o pa u niq'uiajil ri beya', xukuje' pa ronojel ri u lianic ri Medeb,

¹⁷ c'ä pa Hesbon xukuje' conojel tak ri tinimit ri e c'o pa ri lianic: Dibon, Bamot-baal, Bet-baal-meon,

¹⁸ Jahaz, Cademot, Mepaat,

¹⁹ Quiriataim, Sibma, Zaret-sahar, ri c'o puwi' ri u juyub ri beya',

²⁰ Bet-peor, Bet-jesimot xukuje' tak ri e u tzalatzic ri juyub Pisga,

²¹ ri u bixic, tak ri tinimit re ri lianic xukuje' ronojel ri rajawibal ri Sehon, cajawinel ri amoreyib ri aj Hesbon. Ri Moises are' xch'äcow can ri Sehon xukuje' ri e qui nimal ri aj Madian ri quepatanin che: ri Ebi, ri Requem, ri Zur, ri Hur xukuje' ri Reb.

²² Ri aj israelib xquicämisaj c'u ne ri ch'obonel Balaam, ri u c'ojol ri Beor, xukuje' e q'ui niq'uiaj chic.

²³ Ri rulew ri ramak' ri Ruben, xjachic jacha' ri cajilabal ri e u k'ab rachalaxic, e u tz'akatil conojel tak ri tinimit ri' cuc' ri alaj tak tinimit ri e qui k'ab, xopan c'u c'ä chuchi' ri Jordan.

²⁴ Xukuje' chque ri aj ramak' ri Gad xebujach ulew ri Moises chque, jacha' ri cajilabal ri e u k'ab achalaxic.

²⁵ Are' xeya' ri Jazer chque xukuje' conojel tak ri tinimit re Galaad, pa niq'uiaj che ri culew ri aj amonib c'ä ruc' ri tinimit re Aroer, ri c'o chuwäch ri Raba,

²⁶ xukuje' ri ulew ri c'o chuxo'l ri Hesbon, Ramat-Mizpa xukuje' ri Betonim, xukuje' chuxo'l ri Mahanaim ruc' ri u c'ulbatil ri Debir.

²⁷ Pa ri beya', are' xeya' ri Bet-aram chque, ri Bet-nimra, ri Sucot xukuje' ri Zapon, xuwi chi c'u ne wa' canajinak che ri rajawibal ri Sehon, ajawinel pa Hesbon. Jeri' ri rulew xcanaj pa ri elebal k'ij che ri Jordan c'ä pa ri u mox ri cho re Sineret.

²⁸ E are' tak tinimit wa' ri, e cachil ri e u k'ab tak qui tinimit, e are tak wa' ri xeya' che ri ramak' ri Gad, jas ri cajilabal ri e u k'ab tak rachalaxic.

²⁹ Xukuje' ri pa niq'uiaj che ri ramak' ri Manases ri Moises xujach ri ulew, xjach chquiwäch jas ri u cholajil ri u k'ab cachalaxic.

³⁰ Are' xquitaklebej ronojel ri rech can ri Og nabe, ajawinel pa Basan, ri u bixic ronojel ri Basan, kas pa Mahanaim, xerachilaj ri oxc'al (60) tinimit ri e rech can ri Jair,

³¹ pa niq'uiaj che ri Galaad, xukuje' tak ri u tinimit ri Astarot xukuje' ri Edrey. Ronojel wa' xuc'am che ri pa niq'uiaj chque ri e rija'lil ri Maquir u c'ojol ri Manases, jas ri cajilabal ri u k'ab rachalaxic.

³² E are' tak ulew wa' ri xebuya' ri Moises che quechbal pa tak ri lianic re Moab, pa ri elebal k'ij che ri nima' Jordan, chuwäch ri Jerico.

³³ E are' c'ut ri aj ramak' ri Levi man xuya' ta culew che quechbal, xa ne xubij chque: “Ri Ajawaxel xukuje' u Dios ri Israel are' iwechbal.”