Ri Josue 11 - Quiché Bible

Ri Josue cuch'äc ri Jabin xukuje' ri e to'l tak rech

¹ Aretak ri Jabin ajawinel re Hazor, xretamaj ronojel wa, xebutak bic tako'n che u banic junamil ruc' ri ajawinel Jobab re Madon xukuje' cuc' ri ajawinelab re Simron xukuje' ri e re Acsap,

² xukuje' cuc' conojel ri ajawinelab ri e c'o pa ri c'ache'laj tak ulew pa ri riquiak'ab, ri u beya' ri Jordan pa u moxk'ab ri cho Sineret, pa ri lianic xukuje' ri e c'o chunakaj ri Dor ri c'o pa ri u kajebal k'ij,

³ cuc' ri aj cananeyib ri e c'o pa ri elebal k'ij xukuje' pa ri u kajebal k'ij, cuc' ri amoreyib, ri hititib, ri perezeyib, ri jebuseyib ri e c'o pa tak ri c'ache'laj xukuje' ri hebeyib ri e c'o chunakaj ri juyub Hermon, pa ri juyub Mizpa.

⁴ Conojel tak we ajawinelab ri' xebel ulok, e cachil tak ri cajch'ojab e cuc'am quiej ri man quebajilataj taj xukuje' tak carwaj re ch'o'j. Sibalaj c'u e q'ui ri ajch'ojab rumal ri' man cuya' taj quebajilaxic, e jacha' sanyeb ri e c'o chuchi' ri plo.

⁵ Conojel wa' xquiban junamil, xquimulij c'u quib chuchi' ri ja' ri c'o pa Merom, che u banic ch'o'j cuc' ri aj israelib.

⁶ Xubij c'ut ri Ajawaxel che ri Josue: “Maxe'j awib chquiwäch, quinban c'u na in chi je tak wa' chwek, conojel e cäminak quetzak chiwäch. Chebak'ajisaj c'ut ri qui ch'ec tak ri qui quiej chebaporoj tak ri qui carwaj re ch'o'j.”

⁷ Are' c'u ri Josue xukuje' conojel ri rajch'ojab man c'o ta caquinabej ri qui c'ulel xekaj paquiwi' chquinakaj tak ri ja' re Merom,

⁸ ri Ajawaxel Dios xuya' ri ch'äcanic chque ri aj israelib, xquitakej c'u qui cämisaxic c'ä xebopan na pa ri tinimit Sidon xukuje' pa Misrepot-maim, pa ri elebal k'ij c'ä pa ri lianic pa Mizpa. Mawi jun chque xc'asi' ta canok.

⁹ Ri Josue xutz'akatisaj ri takanic ri xuya' ri Ajawaxel che, xebuk'ajisaj c'ut ri qui ch'ec tak ri qui quiej ri c'ulel xukuje' xebuporoj tak ri qui carwaj re ch'o'j.

¹⁰ Xtzelej chi c'u pa rakan are' chi xumajij ri tinimit Hazor, are c'u ne u c'u'x wa' ri junamil ri xbanic, xucämisaj c'ut ri rajawinel.

¹¹ Xukuje' conojel ri e jekel chila'. Ronojel xquiq'uis tzij puwi', xquiporoj c'ut ri tinimit.

¹² Je chi c'u xuban chque ri niq'uiaj tak tinimit chic ri e are' juch'ob che we junamil ri': xebumajij xebucämisaj tak c'ut ri cajawinelab, xuq'uis c'u tzij paquiwi', je jacha' ri takanic ri u yo'm ri Moises che, ri pataninel rech ri Ajawaxel.

¹³ Ri aj israelib man c'o ta c'u ne jun chque tak ri tinimit ri e c'o paquiwi' tak ri juyub ri xequiporoj taj, xane' xuwi' ri Hazor.

¹⁴ Conojel ri winak ri e jekel pa ri tinimit ri' xequicämisaj, man c'o ta c'u jun ri xquic'asba' ta canok, xequechbej c'ut conojel ri awajib xukuje' tak ri jastak ri e c'o chila'.

Ri Josue xebutz'akatisaj ri e u takanic ri Moises

¹⁵ Ri Ajawaxel xebuya' ri u takanic che ri Moises, are' chi c'u ri Moises xebuya' che ri Josue, ri xebutz'akatisaj conojel, man c'o ta c'u jun ri ma ta xutz'akatisaj.

¹⁶ Ri Josue xuch'äc ronojel ri ulew ri', ri u bixic, ri ulew ri c'o wi c'ache'laj, ronojel ri Negueb, ronojel ri ulew re Gosen, ri lianic xukuje' ri beya' re ri Jordan, xukuje' conojel ri c'ache'laj xukuje' tak ri lianic re Israel.

¹⁷ Cachaptaj kas ruc' ri juyub Halac, ri cawalij chu suq'uil ri Seir, c'ä pa Baal-gad, ri c'o pa tak ri lianic rech ri Libano, chuxe' ri juyub Hermon, ri Josue xebuchapo xukuje' xebucämisaj conojel tak ri cajawinelab tak we ulew ri',

¹⁸ naj c'u xch'ojin na cuc'.

¹⁹ Ri tinimit ri xuban jun c'ulwächinic cuc', xuwi ri quech ri hebeyib re ri Gabaon. Conojel ri niq'uiaj chic ruc' chuk'ab xemajixic,

²⁰ are' c'u ri Ajawaxel xbanowic chi ri e c'ulel xquicowirisaj ri canima' xquik'atij c'u qui wäch ri aj israelib rech man ruc' ta elebal c'uxaj, ri aj israelib caquiq'uis tzij paquiwi', je jacha' ri takanic ri u yo'm ri Ajawaxel che Moises.

²¹ Xukuje' pa tak ri k'ij ri', ri Josue xebuch'äco, xukuje' xuq'uis tzij paquiwi' conojel tak ri qui tinimit ri anaquib ri xejeki' can pa ri juyub Hebron, pa Debir, pa Anab xukuje' pa tak ri juyub re Juda xukuje' re Israel,

²² je c'u ri' man c'o ta mawi jun rija'lil ri Anac ri tac'atic achi xcanaj ta pa ronojel ri rulew re Israel. Xuwi xecanaj rija'lil ri tac'atic Anac pa Gaz, pa Gat xukuje' pa Asdod.

²³ Je c'u ri', ri Josue xuch'äc ronojel ri ulew, junam c'u xel ruc' ronojel ri xuchi'j ri Ajawaxel che ri Moises. Xujach c'u chquixo'l tak ri camak' ri aj israelib rech cux quechbal. Aretak xbantaj wa' xc'oji' jamaril pa ri ulew.