Ri Josue 1 - Quiché Bible

Ri Dios cusiq'uij ri Josue

¹ Aretak c'u cäminak chic ri Moises, ri pataninel rech ri Ajawaxel, xtzijon ri Ajawaxel ruc' ri Josue, u c'ojol ri Nun ri xtoban ruc' ri Moises, xubij c'u che:

² “Rumal c'u rech chi cäminak chic ri Moises ri pataninel wech, camic at ri rajawaxic catk'ax chupam ri nima' Jordan ruc' ronojel ri tinimit Israel, rech quixbe pa ri ulew ri quenya' chiwe.

³ Jacha' ri xinchi'j che ri Moises, in quinya' na ronojel ri ulew chiwe ri quiya' wi ri iwakan.

⁴ Quinya' na ri ulew chiwe ri cächaptaj bic pa ri chaki'j uwo sak xukuje' ri u c'ache'laj ri Libano quetakal c'ä pa ri nima' Euprats, carachilaj ri culew ri aj hititib, copan c'ä chuchi' ri Plo Mediteran.

⁵ Man c'o ta jun cacuin ta che a ch'äquic pa ronojel ri a c'aslemal, are' c'u ri in quinc'oji' na awuc' jacha' xinc'oji' ruc' ri Moises, man catinya' ta canok mawi jubik' catinwonoba' ta canok.

⁶ Chachajij anima' xukuje' co chattac'alok, at c'ut catjachow na ri ulew che we tinimit ri', are' c'u echbal wa' ri xinchi'j chque ri e a mam,

⁷ xuwi wa' ri quintz'onoj chawe chi sibalaj chachajij anima' xukuje' co chattac'alok, chatz'akatisaj c'u ronojel ri cubij ri pixab ri xuya' ri Moises ri pataninel wech chawe. Je chabana' jas ri tz'ibatalic rech utz quel na ronojel ri cabano.

⁸ Amak'el chatzelela' u bixic ri cubij ri wuj ri tz'ibatal wi ri u pixab ri Dios, chachomaj ri cubij chi pa k'ij chi chak'ab, rech amak'el caban ri catakan wi wa'. Jeri' ronojel ri cabano utz quel na.

⁹ In ri' ri catintako chi chachajij anima' xukuje' cochattac'alok. Maxe'j awib mawi maqueblaj a c'u'x rumal rech chi ri in, ri Awajawaxel xukuje' a Dios, quinc'oji' na awuc' apawije' ta ne ri catbe wi.”

Ri Josue cusuc'umaj rib che ri ch'äcanic

¹⁰ Xuya' c'u takanic ri Josue chque ri c'amal tak u be ri tinimit:

¹¹ “Jix cuc' conojel ri e c'o pa ri kajebal chiya' takanic chque conojel chi chquisuc'umaj ri caquitijo, xa c'u pa oxib k'ij cujk'ax chupam ri nima' Jordan rech cujoc che rechbexic ri ulew ri cuya' na ri Ajawaxel ri ka Dios chke.”

¹² Ri Josue xukuje' xtzijon cuc' ri ramak' ri Ruben ri Gad xukuje' ruc' ri pa niq'uiaj che ri ramak' ri Manases, xubij c'u chque:

¹³ “Chnataj chiwe ri takanic ri xuya' ri Moises chiwe, ri pataninel rech ri Ajawaxel, aretak xubij chiwe chi ri Ajawaxel, ri i Dios, cuya' we ulew ri' chiwe rech cuya' quixuxlanic.

¹⁴ Chebiya' can tak ri iwixokil waral, ri ac'alab xukuje' tak ri iwawaj pa we ulew ri' ri xuya' ri Moises chiwe jewa' che ri Jordan. Conojel c'ut ri e utz che u banic ch'o'j che qui c'ama' tak ri qui ch'ojibal chenabej chquiwäch tak ri cachalal, che qui to'ic,

¹⁵ c'ä cuya' na ri Ajawaxel chque jun c'olbal re uxlanibal, jacha' ri xuya' chiwe, c'ä quebux c'u na ajchak'e ri ulew ri cuya' na ri Ajawaxel chque. C'äte c'u ri' ri ix cuya' quixtzelej pa tak ri e iwulew chupam we c'olbal ri' pa ri elebal k'ij che ri nima', rech kas xa jumul quixoc che rechbexic we ulew ri' ri xuya' ri Moises chiwe, ri pataninel rech ri Dios.”

¹⁶ Ri e are' xquitzelej u bixic: “Cakaban na ronojel ri uj a takom che u banic, cujbe c'u na jawije' ri cujatak wi.

¹⁷ Amak'el cujniman na chawe, jacha' ri xkaban nabe xujniman che ri Moises. Xuwi wa' cakatz'onoj chi chatachilax rumal ri Ajawaxel ri a Dios jacha' ri xuban che rachilaxic ri Moises.

¹⁸ Ronojel ri catuc'ulelaj o man cunimaj ta joropa' ri cättakan wi, cacäm na. Xuwi cakatz'onoj chi chachajij anima' xukuje' co chattac'alok.”