Ri Jonas 4 - Quiché Bible

Ri royowal ri Jonas

¹ Ri Jonas sibalaj man utz taj xrilo ri xuban ri Dios, sibalaj xyojtajic,

² rumal ri' xtzijon ruc' ri Ajawaxel xubij che: “Chilampe' la Ajawaxel, xak junam wa' ruc' ri xinchomaj chi cäc'ulmataj na aretak c'ä in c'o pa ri wulew. Rumal ri' xinanimaj bic pa Tarsis, weta'm c'ut chi lal jun ch'uch'ujalaj Dios ri quel c'u'x la, ri man chanim taj cäpe oyowal la, chi sibalaj nim ri lok'ok'ebal c'u'x la chi aretak caya' la u bixic jun c'äjisabal wächaj chanim c'ut cäq'uex c'u'x la.

³ Rumal ri' Ajawaxel, quintz'onoj tok'ob che la chi chesaj la ri nu c'aslemal. Are utz na chwe chi quincämic chuq'uexwäch chi quintakej c'aslemal.”

⁴ Ri Ajawaxel xubij che: “¿La are pa c'u'x chi utz ri cabano catoyowaric?”

⁵ Ri Jonas xel bic pa ri tinimit xec'ol pa elebal k'ij che ri tinimit; chila' xuyac wi jun u cäbal xt'uyi' c'u chuxe' ri u mu'jal, xreyej rilic ri cuc'ulmaj na ri tinimit.

⁶ Ri Ajawaxel xubano chi xq'uiy ulok juwi' chimach'o puwi' ri u cäbal ri Jonas, are' c'u ri u mu'jbal cäch'uk ri u jolom rech utz cuna'o; ri Jonas sibalaj cäquicot ruc' ri juwi' chimach'o.

⁷ Aretak c'u xsakar chucab k'ij, ri Dios xubano chi xpe jun xjut che u ramixic ri juwi' chimach'o, xchaki'jar c'ut.

⁸ Aretak xel ulok ri k'ij, ri Dios xubano chi xpe jun c'atanalaj quiakik' pa elebal k'ij, aretak c'u xq'uiakan ri k'ij che ri u jolom ri Jonas, ri are' xuna' chi cätuktubic are ta c'u xraj xcämic. “Are utz na chwe chi quincämic chuq'uexwäch chi quintakej c'aslemal,” xcha'.

⁹ Ri Dios xutzelej u bixic che: “¿La utz chawe chi je awoyowaric wa u mac rech ri u chaki'jaric ri chimach'o?” “¡Chwe in utz!” xutzelej u bixic ri Jonas. “¡Cämic c'u quinban che ch'ujilal!”

¹⁰ Xubij c'ut ri Ajawaxel che: “Man at ta xatticow ri juwi' chimach'o, mawi at xatq'uiyisanic; pa jun chak'ab xq'uiyic pa ri jun chi chak'ab xcämic. Quel c'u ne a c'u'x che.

¹¹ Are c'u nim na u banic chi rajawaxic quel na nu c'u'x che, ri Ninibe, ri tinimit ri nim u k'ij ri e c'o wi jun sient juwinak mil (120,000) ac'alab ri man c'o ta qui mac, xukuje' jumulaj awaj.”