Ri Jonas 3 - Quiché Bible

Ri aj Ninibe xquiq'uex qui c'u'x

¹ Ri Ajawaxel xtzijon chi jumul ruc' ri Jonas, xubij che:

² “Chacowij jät pa Ninibe, tinimit ri nim u k'ij, chaya' u bixic chila' ri quinbij chawe.”

^3-4 Ri Jonas xutakej ri u be, xbe pa Ninibe jacha' ri xbix che rumal ri Ajawaxel. Ri Ninibe are jun tinimit ri nim u k'ij; ri cajwataj oxib k'ij che u binibexic. Ri Jonas xoc pa ri tinimit, xbin c'u ronojel ri jun k'ij co xurak u chi' xubij: “¡pa cawinak k'ij we tinimit Ninibe cäsach na u wäch!”

⁵ Ri winak ri e c'o pa ri tinimit, chi ri'jab chi ac'alab xecojon che ri Dios, xquiya' u bixic chi man cätijow ta wa, xukuje' xequicoj wakwoj tak atz'iak che u c'utic ri k'oxomal.

⁶ Aretak c'u xopan u tzijol ruc' ri ajawinel re Ninibe, xwalij pa ri u tem re ajawibal, xeresaj ri ratz'iak re ajawinel, xucoj wakwoj tak atz'iak, xt'uyi' c'u cho ri ulew.

⁷ Ri ajawinel xukuje' ri e rach k'atal tak tzij xquiya' c'u retamaxic we pixab ri': “C'o jun mutij k'obibal. Chi xukuje' ne metzukic mawi maya' qui joron ri wacax xukuje' tak ri chij.

⁸ Chebicojo c'u wakwoj tak atz'iak chiwij, che u c'utic ri k'oxomal, chitok'olej c'u ri Dios ruc' ronojel ri i chuk'ab. Chequiya' canok chquijujunal ri itzel qui c'aslemal xukuje' ri tokinic ri c'ä cätajin queban camic,

⁹ craj ne cäcuy ri ka mac rumal ri Dios coc'ow c'u ri royowal, xa' je ri' man cujecäm taj.”

¹⁰ Ri Dios xrilo ri caquiban ri winak aj Ninibe ri xquiban che u ya'ic canok ri itzelalaj qui no'jibal, xuchomaj chi man cuc'am ta chi ulok ri c'ax ri u chomam u c'amic ulok paquiwi'.