Ri Jonas 2 - Quiché Bible

Ri Jonas xubochi'j ri Dios chupam ri cär

¹ Xuban c'u ch'awem ri Jonas ruc' ri Ajawaxel ri u Dios kas chupam ri cär, je c'u xubij wa:

² “Pa ri nu rikoj c'ax xintz'onoj tok'ob che la, Ajawaxel, xban c'u la ri tok'ob ri xintz'onoj che la. In c'o chic pa ri cämical xinta' tok'ob che la xintatabej c'u la.

³ Xinq'uiak la pa ri u choil ri plo, xinquipis c'u tak ri ja', ri nimak tak rekbala' ri cätakan la paquiwi' xeboc'ow tak panuwi'.

⁴ Xinna' wib chi naj in q'uiakom wi la bic chwäch la; xinchomaj chi mawi jubik' quinwil chic ri tastalicalaj achoch la.

⁵ Ri ja' xquisutij wij; ri nimalaj plo xinumuku; ri k'ayes xquira'lij quib pa nu jolom.

⁶ Xinekaj c'ä chquixe' tak ri juyub; ¡xinna' wib chi in junalic rajpache'! Are c'u ri lal, Ajawaxel nu Dios, xinesaj la pa ri cämical.

⁷ Man c'o ta chi c'u cu'bisabal nu c'u'x, xnataj c'u la chwe Ajawaxel; ri nu ch'awem xopan chwäch la pa ri tastalicalaj achoch la.

⁸ Ri quequiterenej ri e diosib man e jic ta chic che la,

⁹ are c'u ri in, ruc' quicotemal quinjach na tabal tok'ob chwäch la; quintoj na ri chi'nic ri e nu banom chwäch la. ¡Xuwi ri lal Ajawaxel cäcuin la che to'tajisanic!”

¹⁰ Are' c'u ri Ajawaxel xubano chi ri cär xuxawaj can ri Jonas cho cowilaj ulew.