Ri Jonas 1 - Quiché Bible

Ri Jonas canimaj chuwäch ri Dios

¹ Ri Ajawaxel xubij che ri Jonas (ri Amitay are' ri u tat ri Jonas):

² Chacowij, jät pa ri Ninibe, tinimit ri nim u k'ij, chabij c'u che chi quinsach na u wäch, ulinak c'u u tzijol ri quetzelal wuc'.

³ Ri Jonas ri are ta xnimanic, xane' xa' xa'nimaj chuwäch ri Ajawaxel xbec jawije' c'o wi ri elebal pa Jop, chila' c'u xurika' wi jun jucub ri benam cuban pa Tarsis; xutoj c'ut ri u c'amic bic xoc chupam ri jucub rech cäbe cuc' ri winak ri quebe pa Tarsis.

⁴ Ri Ajawaxel xutak ulok jun nimalaj quiakik', xwalij c'u jun nimalaj quiakik' jäb puwi' ri plo ri je ta ne ri cuban ch'akatak che ri jucub.

⁵ Ri achijab ri quechacun pa ri jucub sibalaj xquixe'j quib, chquijujunal xquita' tok'ob che ri qui dios. Che c'u resaxic ri a'lal ri c'o chupam ri jucub, xequesaj can ri eka'n xquiq'uiak can pa ri plo. Are' c'u ri Jonas kajinak bic pa jun u tas ri jucub chila' c'ut kajinak wi che jun nimalaj waram.

⁶ Ri achi ri qui nimal ri e c'o pa ri jucub xopan ruc' ri Jonas, xubij che: “¿Jas che catwaric, ajwaram? ¡Chatwalijok, chata' tok'ob che ri a Dios! Craj ne cutok'obisaj ka wäch cujuto' c'ut.”

⁷ Are' c'u ri achijab ri quechacun pa ri jucub xquibila' chbil tak quib: “Kaq'uiaka' ij, rech cäkilo jachin ri ajchak'mac che we quiäkasakil ri'.” Xequiq'uiak c'u ij, are' c'u ajchak'mac ri Jonas.

⁸ Xquibij c'u che: “Chabij chke jasche petinak we etzelal ri' pakawi'. ¿Jasche xatpe chupam we jucub ri'? ¿Jawije' ri catpe wi? ¿Jawije' ri awulewal? ¿E jachin tak ri awinakil?”

⁹ Ri Jonas xubij chque: “In aj hebrey, quink'ijilaj ri Ajawaxel, ri Dios aj caj ri banowinak ri plo xukuje' ri ulew.”

^10-11 Ri Jonas xutzijoj chque ri achijab ri e aj jucub chi xa' cätajin canimaj chuwäch ri Ajawaxel, we achijab ri', aretak xquito aretak c'u xquilo chi ri plo xa' sibalaj cätajin cach'ujiric, xquina' jun nimalaj xe'n ib xquic'ot u chi': “¿Jasche je a banom wa'? ¿Jas ri ya'talic cakaban chawe rech cäjamar ri plo?

¹² Chiniq'uiaka' ba bic pa ri plo, cäjamar c'u na ri plo,” xcha' ri Jonas chque. “In kas weta'm chi in ri ajchak'mac chi xpe ri nimalaj quiakik' jäb piwi'.”

¹³ Ri achijab ri quechacun pa ri jucub xquicoj qui chuk'ab che u c'amic u be ri jucub rech cäkeb chuchi' ri ulew, man xecuin ta c'ut rumal rech chi xa' cätajin cänimataj u c'anaric ri plo.

¹⁴ Xquichaplej c'u u ta'ic tok'ob che ri Ajawaxel, xquibij: “Ajawaxel, mujya' ba' la pa cämical u mac rech we achi ri'. Mawi mak'abaj ne la ri u cämical chkij we ne man c'o ta u mac, are c'u ri lal, Ajawaxel are caban la jachique ri rayibal la.”

¹⁵ Xuwi xbitaj wa', xquiq'uiak c'u bic ri Jonas pa ri plo, xjamar c'ut ri plo.

¹⁶ Aretak xquil ri achijab ri e aj jucub, xquina' jun nimalaj oquem il chuwäch ri Ajawaxel, xquichi'j jun tabal tok'ob chuwäch, xequiban c'u tak chi'nic chuwäch.

¹⁷ Are' c'u ri Ajawaxel xutak ulok jun nimalaj cär che u bik'ic ri Jonas. Xcanaj c'u oxib k'ij oxib ak'ab ri Jonas chupam ri cär.