Ri Joel 3 - Quiché Bible

¹ Cächa' ri Ajawaxel: “Aretak chopan we jok'otaj ri' quinban na chi cäq'uextaj ri u taklebem ri Juda xukuje' ri Jerusalen.

² Quebenmulij na conojel tak ri nimak tak tinimit, queben c'am na bic chupam ri beya' re Josapat chila' c'ut quink'at wi na tzij paquiwi' che ri xquiban che ri nu tinimit Israel. Xequijabuj c'u ri aj israelib pa ronojel ri uwächulew, xquijach c'ut ri wulew chquiwäch.

³ Xquijach ri nu tinimit chquij ri quequitaklej, xebequic'ayij ri alaj tak alabom xukuje' ri alaj tak alitomab, xequisacha' c'ut ri puak che u lok'ic u wa'l uva xukuje' che qui tojic tak ixokib quech nim ch'utin.”

Ri Ajawaxel cuk'at tzij paquiwi' ri nimak tak tinimit

⁴ “¿Jas ri qui waj chwe in, Tir, Sidon xukuje' pilistey? ¿La are quiwaj quinya' rajil q'uexelal chiwe? ¿La are quiwaj c'o jas qui tok'ij? ¡Quinyaxtaj c'u na ri takal chiwe!

⁵ Ri ix xiweläk'aj ri nu sak puak xukuje' ri nu k'an puak, xebic'am tak bic ri e nu k'inomal xebiya' chquipam tak ri e cachoch tak ri e i diosib.

⁶ Naj, xebic'am wi bic tak ri winak aj Juda, xukuje' tak ri aj Jerusalen, xebic'ayij c'ut jacha' ta ne lok'om tak pataninelab chque ri aj gresib.

⁷ Are c'u ri in quebenwesaj ulok chupam ri c'olbal jawije' tak ri xebic'ayij wi, quenbana' c'u na' chiwe ix chi quebicoch' na ri junam taklebenic.

⁸ Quebenc'ayij na tak ri e i c'ojol xukuje' tak ri e i mia'l chque tak ri aj judeyib, rech e are' quebec'ayin chque ri uj Sebeyib, winak ri naj e c'o wi tak ri culew. In, ri Ajawaxel, nu yo'm u bixic.”

⁹ Chiya' u bixic wa' chque ri nimak tak tinimit; ¡Chik'alajisaj ri tastalicalaj ch'o'j! ¡Chesiq'uix ri cowilaj tak achijab! ¡Chepetok chebequich'äca' ri e banal tak ch'o'j!

¹⁰ Chebequibana' ch'ich' re ch'o'j chque tak ri casaron, xukuje' tak tz'imaj ch'ich' chque tak ri qui jos, chubij c'ut ri tukar: “¡In c'o nu chuk'ab!”

¹¹ Iwonojel ix, c'ulja nimak tak tinimit, ¡Chixpet aninak, chixpet che u mulixic iwib! ¡Chi xukuje' ne ri aj jamaril cux banal ch'o'j!

¹² Chiquicolomaj tak quib ri nimak tak tinimit chebopan c'ut chupam ri beya' re Josapat, chila' c'u cuk'at wi na tzij ri Ajawaxel paquiwi' ri c'ulja ri nimak tak tinimit.

¹³ Rumal c'u rech chi sibalaj e itzel tak winak, chek'atok jacha' ri caban che ri trico aretak chaki'j chic, u k'ijol chi c'ut ri k'atoj; chebixak'alela' jacha' cäban chque tak ri uva, ronojel c'ut suc'umatal chic che resaxic u wa'l uva.

¹⁴ E c'o e q'uia winak chupam ri beya' re ri k'atan tzij, rumal rech chi nakaj chic c'o wi ri u k'ij ri Ajawaxel.

¹⁵ Ri k'ij xukuje' ri ic' quek'ekumaric xukuje' tak ri ch'imil man quequiya' ta chic ri qui jolk'inic.

¹⁶ Ri Ajawaxel aretak chubano chi chatataj ri u ch'abal re cakulja c'ä pa ri juyub Sion, pa Jerusalen, ri caj xukuje' ri ulew caquichaplej birbitem. Are c'u ri Ajawaxel are jun panibal to'balib chque ri aj israelib, ri e u tinimit.

Ri nimalaj utzil ri cäc'oji' wi na ri Juda

¹⁷ “Ri ix quitzelej chi na iwib che retamaxic chi in ri' ri Ajawaxel ri i Dios, in jekel pa Sion, ri nu juyub ri tastalic. Ri Jerusalen cux na jun tinimit ri tastalic: mawi jumul cach'äc ta chi na cumal tak winak ri naj quepe wi.

¹⁸ Pa ri k'ijol ri', ri u wa'l uva xukuje' ri leche quebelel na jacha' ta ne ja' pa tak ri juyub xukuje' paquiwi' tak ri juyub, are c'u ri alaj tak nima' re Juda telechi'm ri ja' caquic'am ulok. Chupam ri wachoch cäq'uiy wi na u bic jun bulbux ja' ri cäjan ri beya' re Sitim.

¹⁹ Ri Ejipt cäcanaj na pa etzeletajic, are c'u ri Edom caq'uextaj na pa jun chaki'j uwo sak, rumal rech chi xquiban c'ax chque ri winak ri aj Juda xquitix c'ut ri quic' ri man c'o ta u mac pa ri culew.

^20-21 In quintok'ij na ri rajil u quiq'uel ri quic' chque ri man nu tok'im taj. Are c'u ri Juda xukuje' ri Jerusalen amak'el quejujayir na winak chquipam, are c'u ri in quinjujayir na chupam ri juyub aj Sion.”