Ri Joel 2 - Quiché Bible

¹ Chiwok'isaj ri trompet chupam ri juyub Sion; chiya' ri u bixic chupam ri tastalic u juyub ri Ajawaxel. Chebirbot conojel ri e jekel pa Juda, rumal rech chi nakaj chic c'o wi ri u k'ij ri Ajawaxel;

² k'ij re k'ekumalil xukuje' raxc'anac'ojil, k'ij que tak sutz'al xukuje' tak mujal. Juk'at banal tak ch'o'j ri sibalaj quebuchuwic qui cholajim quib paquiwi' tak ri juyub jacha' ri sakil re ri u sakaric. Mawi jubik' ilom, mawi quil chi na, man c'o ta jas ri quejunamataj ta wi.

Ri nimalaj c'ax ri xquiban ri sac'

³ Quejunamataj ruc' ri k'ak', ri ronojel cujarisaj; ri caporon chic c'a maja' coc'owic xukuje' c'une' aretak oc'owinak chic. Ri ulew, aretak c'a maja' quebopanic are jun ticonijibal ri sibalaj je'lic, aretak quebec cajunamataj chi can ruc' jun chaki'j uwo sak. ¡Man c'o ta jas ri cäto'taj ta can cumal!

⁴ Ri u bantajic jacha' ta ne ri cäpe quiej, quexiq'uinilobic e jacha' ta ne e ajquiejab.

⁵ Ri u pa cakan aretak quech'opin paquiwi' tak ri juyub xak junam cuc' ri u pa cakan tak carwaj re ch'o'j, jacha' ri qui pak'ak'em ri chaki'jalaj tak u xak che' ri quenicow pa ri k'ak'. E jacha' ta ne cowilaj tak ajch'ojab ri qui cholajim tak quib che u banic ch'o'j.

⁶ Ri winak quebirbitic aretak quequilo, conojel tak c'ut ri palajaj quesakperic.

⁷ E jacha' cowilaj tak achijab ajch'ojab, quexiq'uinilobic, quepaki' paquiwi' tak ri nimak tak tapia quetaken c'ut quebe tak chquiwäch, man c'o ta jun cujech'obisaj ta ri u be.

⁸ Man caquipuq'uila' ta c'u quib; chquijujunal caquitakela' tak ri qui be, caquiq'uiakala' c'u quib chquixo'l tak ri ch'ab man caquituquij ta c'ut ri u cholajixic quib ri qui banom.

⁹ Quequiq'uiaka' quib chupam ri tinimit, quexiq'uinilob paquiwi' tak ri nimak tak tapia, quepaki' paquiwi' tak ri ja e jacha' ta ne tak eläk'omab quequitzayabala' tak quib chque tak ri wenta'n.

¹⁰ Ri ulew cabirbit chquiwäch, ri caj cäyicopic, ri k'ij xukuje' ri ic' quek'ekumar ri qui wäch xukuje' ri ch'imil quechup tak ri qui repc'unic.

¹¹ Ri Ajawaxel, cänabej chquiwäch ri rajch'ojab cubano chi cätataj ri u ch'abal jacha' cakulja. Ri rajch'ojab man quebajilataj taj, ri queniman che ri u banic tak ri e u takanic. ¡Sibalaj nim xukuje' xibibal ri u k'ij ri Ajawaxel! Man c'o ta jachin ta cacoch'owic.

Ri relebal u c'u'x ri Ajawaxel

¹² Cujiquiba' u bixic ri Ajawaxel: “Are c'u ri camic chixtzelej ba' wuc' ruc' ronojel iwanima'. ¡Chiya' i tzij chi man quixwa' ta na, chiraka' i chi' xukuje' chixok'ok!”

¹³ ¡Chixtzelej ba' ix ruc' ri Ajawaxel ri i Dios, chi t'ubu' c'ut ri iwanima' che u q'uexwäch ri u t'ubic ri iwatz'iak! Rumal rech chi ri Ajawaxel ch'uch'uj xukuje' quel u c'u'x, coch'onel xukuje' ronojel lok'ok'ebal c'uxaj, amak'el xak reyem jampa' cuwalijisaj ri c'äjisabal wächaj.

¹⁴ Craj ne cuchomaj chi man cuc'äjisaj taj i wäch ix, quebutak ta c'u ulok tewichibal piwi' c'äj xukuje' u wa'l uva chque tak ri e sipanic che ri Ajawaxel ri i Dios.

¹⁵ ¡Chiwok'esaj ri trompet pa ri juyub Sion! Chisiq'uij ri tinimit chixtakenok chi man catij ta wa;

¹⁶ chimulij ri u tinimit ri Dios, chi ch'ajch'ojirisaj c'ut; chebimulij ri ri'jab tak tatayib, ri alaj tak ac'alab xukuje' tak ne ri ac'alab ri c'ä quetunic. ¡Xukuje' ne ri c'äte' xec'ulic chebel ulok chupam ri qui warabal!

¹⁷ Chebok' tak ri e cojol tabal tok'ob, ri e u pataninelab ri Ajawaxel, chechok c'ut chuxo'l ri rakan ja ruc' ri porobal: “Ajawaxel, sacha' la u mac ri tinimit la; maya' la c'olbal chi c'o ta jachin cätze'n qui wäch ri e ech la; maya' la c'olbal chi jule' nimak tak tinimit chic quebajawin ta paquiwi' chquibij ta c'u ne tak ri e k'ijilal tak diosib: ‘¿Jawije' c'o wi ri qui Dios?’ ”

¹⁸ Xuc'ut c'ut ri Ajawaxel ri u lok'ok'ebal c'uxaj che ri rulew; xel u c'u'x che ri u tinimit,

¹⁹ xubij c'ut: “Quintak na ulok trico, u wa'l uva xukuje' aseit, c'a quenoj na; man quinya' ta chi c'u c'olbal chi ri e k'ijilal tak diosib caquitze'j ta chi na i wäch.

²⁰ Quebennajtajisaj tak na chiwe ri sac' ri quepe pa ri elebal k'ij, quebenq'uiak c'u na bic chupam ri chaki'j uwo sak. Quebenjik'isaj na ri e nabejinak chquiwäch chupam ri Cäminak Cho are c'ut ri e teren ulok chquij chupam ri Plo ri Mediteran, ri e qui cuerp quepuk'pup na quetakak c'u na. ¡Quebenbana' na nimak tak jastak!”

²¹ Sibalaj chatjajatok, ulew maxe'j c'u awib, rumal rech chi ri Ajawaxel quebubana' nimak tak jastak.

²² Mixe'j iwib juyubal tak awaj, ri echa' c'ut queraxar tak na, ri juwi' tak che' quequiya' na tak ri qui wächinic, sibalaj c'u quetz'ebe na ri qui wächinic ri qui che'al tak higo xukuje' ri juwi' tak uva.

²³ ¡Chixquicotok ix ri ix jekel pa Sion, chixquicot rumal ri Ajawaxel ri Dios! Are yowinak tak ri jäb chiwe pa ri k'ijol ri rajawaxic, ri nabe tak jäb xukuje' ri q'uisbal tak jäb, je jacha' ri xuban nabe.

²⁴ Cäpe na utzalaj u wächinic ri trico xukuje' tz'ebem u wa'l uva xukuje' aseit.

²⁵ “In quinya' na rajil qui q'uexelal ri junab chiwe ri xebitzako qui mac quech ri c'axalaj tak sac', we juk'at banal c'ax ri' ri xebentak ulok piwi'.

²⁶ Ri ix quixewok na c'ä quixnoj na, quixk'ijilan c'u na che ri Ajawaxel ri i Dios, ri in xebenban nimak tak mayibal che i to'ic. Mawi ta chi c'u jumul cacanaj ta chi can ri nu tinimit nojinak ta che q'uixbal,

²⁷ are c'u ri ix, aj israelib, rajawaxic u ch'obic iwumal chi ri in, ri Ajawaxel, in c'o iwuc', chi in c'ut ri i Dios man c'o ta chi c'u jachin ta jun chic c'olic. ¡Mawi jumul cacanaj ta chi can ri nu tinimit nojinak ta che q'uixbal!”

Cäpe ri ruxlabal ri Dios

²⁸ “Aretak e bantajinak chic we jastak ri' quinjamij na ri wuxlabal puwi' ronojel winak: ri e i c'ojolab xukuje' ri e i mia'laxelab quech'aw na wumal, ri ri'jab tak tatayib quequiban tak na ichic' ri c'ojolab quequil tak na c'utwächinic.

²⁹ Xukuje' paquiwi' tak ri pataninelab chi achijab chi ixokib quinjamij na ri wuxlabal pa tak ri k'ij ri';

³⁰ quebenc'ut na nimak tak mayibal cho ri caj, xukuje' quic', k'ak' xukuje' u sutz'al sib cho ri uwächulew.

³¹ Ri k'ij cux na k'ekumalil, ri ic' cux na quic' c'ä majok chopan ri u k'ij ri Ajawaxel, nimalaj k'ij xukuje' xibibal.”

³² Conojel c'ut ri caquiya' u k'ij ri Ajawaxel quecuinic caquito'tajisaj quib man querik ta na rumal ri cämical, chupam c'ut ri juyub re Sion, pa Jerusalen, cac'oji' wi na ri to'tajisabal ib, je jacha' ri u chi'm ri Ajawaxel. Ri e u cha'om quec'asi' na canok.