Ri Joel 1 - Quiché Bible

Ri sac' xequisach qui wäch tak ri tico'n

¹ Are tzijol wa' ri xujach ri Ajawaxel che ri Joel (ri Petuel are' ri u tat ri Joel).

² Kas utz u tatabexic wa' chibana', nimak tak tatayib, ri ix aj waral. ¿La c'o ta jumul iwilom ta jun jasach ri junam ta ruc' wa'? ¿La c'o jumul ilom ta jun jasach ri cajunamataj ta ruc' wa' pa tak ri e qui k'ijol tak ri e i mam?

³ Chitzijoj chque tak ri e i c'ojol e are chi c'ut ri e are' caquitzijoj chque ri e quech, e are' chi c'u wa' chque ri c'äte quebalax na.

⁴ Ronojel xequic'ux tak ri sac': ri xeya' can cumal jujun, jule' chic xepe che u c'uxic.

⁵ ¡Ix, k'abarelab, chixc'astajok! ¡Chichapa' ok'ej, ri ix u q'uial u wa'l uva, quesax c'u ne na ri u wa'l ri uva chiwe!

⁶ Are c'u ri sac', e jacha' juk'at cowilaj tak banal ch'o'j ri sibalaj quebuchuwic, ri e c'o qui ware coj cuc' xukuje' e u tz'i' ati't coj, u majim ri ulew.

⁷ U sachisam qui wäch tak ri e ticbal tak ka uva, u q'uisom tzij paquiwi' tak ri e u che'al tak ka higo, kas utz u ch'ololexic u banom c'ä xesakar na can tak ri e u k'ab.

⁸ Jacha' ri ali ri cok'ic ri quebucoj tak atz'iak re bis rumal ri u cämical ri quec'ulan wi,

⁹ are jewa' ri ok'ej ri caquiban ri cojol tabal tok'ob rumal rech chi man c'o ta chic c'äj mawi u wa'l uva chupam ri rachoch Dios che ri sipanic che ri Ajawaxel.

¹⁰ Ri e ticonijibal e tolonic; ri ulew e c'o pa bis. Ri trico sachinak u wäch, ri ticbal tak uva e chaki'jarinak xukuje' tak ri qui che'al tak aseitun e yututurinak.

¹¹ Ix, ri quixchacun pa tak ri ulew re ticonijibal xukuje' pa ticbal tak uva, chixok'ok ix nojinak che bis, xsach c'u qui wäch tak ri tico'n xukuje' tak ri trico ri ticom xukuje' tak ri sebad.

¹² E chaki'jarinak tak ri uva ri e ticom sachinak qui wäch tak ri e qui che'al tak higo. Chaki'j xukuje' xecanaj can tak ri e qui che'al tak ri crabaj qui che'al tak tut qui che'al tak mansa'n xukuje' conojel tak ri che' ri e c'o pa tak ri ulew. ¡Rumal we c'ulmatajic ri' conojel ri winak quitzakom ri qui quicotemal!

¹³ Ix, cojol tabal tok'ob pataninelab rech ri porobal, chebicojo wakwoj tak atz'iak chixok' c'u rumal k'oxomal, rumal rech chi pa ri rachoch ri i Dios man e c'o ta chic c'äj mawi u wa'l uva che quiya'ic tak sipanic.

¹⁴ Chisiq'uij ri tinimit co c'u chiraka' i chi' che u bixic chi chyok ib pa numic; chebimulij chupam ri rachoch ri Ajawaxel ri nimak tak tatayib xukuje' conojel ri winak ri e c'o pa ri ulew, chisiq'uij ri Ajawaxel.

¹⁵ ¡Ay, cänakajin ri u k'ij ri Ajawaxel! ¡Xibibalalaj k'ij, ri cuc'am ulok sachoj wächaj pakawi' rumal ri c'o ronojel u cuinem!

¹⁶ Chquiwäch ri ka bak'wäch xebesax ri ka wa kuq'uia', xq'uis c'ut ri quicotemal chupam ri rachoch ri ka Dios.

¹⁷ Ri ija' xcäm xo'l tak ri k'et, ri trico xsach u wäch xeyojquen tak c'ut ri c'uja.

¹⁸ ¡Quewun c'u ne tak ri wacax! Xak lok' caquitzucuj tak quecha' ri ati'tab tak wacax; ri jumulaj tak chij cätajin quecämic.

¹⁹ ¡Che la quinrak wi nu chi', Ajawaxel, ri k'ak' u porom ri k'ayes ri c'o pa ri chaki'j uwo sak xukuje' tak ri che' ri e c'o pa tak ri juyub!

²⁰ ¡Xukuje' ne ri juyubal tak awaj caquirak qui chi' che la, e tzajinak c'ut ri nima' are c'u ri k'ak quebuporoj tak ri echa'!